Ală bơtô ù geh tờ lài tềng rơnưng grồi hìu ồng A Đúy tàm thôn Ngọc Leng, rơhời geh tam bềng bơh ală tờm kơphê sơntìl. Cau jun chi, cau tam tờm tềng bơtô, cau bồr ù hơ̆ sồng tuh dà. Mìng tàm bàr pe jiơ lơm, bă ù sươn lài do mìng tam tờm bùm blàng lơm neh tơn soh tàm să he dà tơlir pa.

Mờr 9 sàu ù bơh hìu bơnhă dê uă nam mìng tam bùm blàng lơm, priă lơh geh ờ huan kơnhăp. Kờñ tam gơl tus tam tờm kơphê mơya priă blơi sơntìl mờ apah cau lơh broă là bơnah priă dờng ir. Ồng A Đúy đơs, dơ̆ do, chi sơntìl geh pà gời, broă tam kung geh kwang bàng mờ mpồl cau ƀòn lơgar dong kờl tus anih tơn, dong hìu bơnhă geh tai gơn kơnờm nàng sơnđờm dùl gùng lơh sa pa.

“Broă geh dong kờl tờm sơntìl kơphê dong hìu bơnhă gơmù ƀà priă tă bơcri bơh chờm mờ geh tơl bơta rề ơnàng bă ù lơh sa. Hìu bơnhă añ gơn kơnờm tờm kơphê rơ̆p hòn dờng niam, cèng wơl priă lơh geh sùm”.

Ờ mìng is hìu bơnhă ồng A Đúy lơm, gĭt nđờ jơ̆t hìu làng bol gơ wèt cau dờng sơnam, cau kwĕt kơlte, hìu bơnhă ơm kis is nă să tàm Tu Mơ Rông kung geh ai lài dong kờl tàm dơ̆ lam lơh bơh chờm. Bơh ngkời rlau 1 tơlak chi sơntìl là dùl broă lơh is ồn ngan.

Ala tài ngui priă tă blơi bơkàu nting bơr gờm chờ ală broă pơrjum, sàh lam lơh broă lơh tơrlòng lài “Pơrjum dờng ờ bơkàu”, hòi jà bơta pràn mpồl bơtiàn dê lơh bal nàng blơi gar sơntìl, lam ờng mờ sơngka sền gàr chi sơntìl, hơ̆ sồng pà ờ sa priă ai làng bol in. Ală căp bơkàu nting bơr gờm chờ neh geh ala mờ ală tờm kơphê kòn, cèng jăt bal gơn kơnờm bè dùl broă lơh broă sa kơnhăp jŏ ai làng bol kòn cau tiah jơnhoa in.

Tàm nhai 7 do, sàh Tu Mơ Rông pơnđơl lơh gơs broă ai pà mờ dong kờl làng bol tam rlau 1 tơlak tờm kơphê tàm bă ù pơgăp 200 lồ. Jơnau kờñ ờ mìng là tơngguh bă ù chi tam lơm mờ gam rơhời gơgơs tiah tam phan tơrgùm bal, lơh gơlik geh bơnàng jă nàng bơtàu tơngguh kơphê jăt ală broă lơh gơlik phan.

Ồng Võ Trung Mạnh, Bí thư Đảng ủy sàh Tu Mơ Rông pà gĭt, rlau 1 tơlak tờm kơphê geh tam tàm kàl mìu do rơ̆p mìng là broă sơnđờm lơm. Tơngai bơh nam 2026- 2030, ƀòn lơgar geh jơnau kờñ dong kờl làng bol tam pa 1 rbô lồ kơphê; Pơnđơl tus nam 2030, kờp jơh bă kơphê jơh gùt sàh dê digơlan geh pơgăp 1 rbô 588 lồ, wèt tus jơnau kờñ tơl hìu làng bol geh êt ngan rlau jơh là bơh 1 lồ kơphê nàng bơtàu tơngguh lơh sa hìu bơnhă. Nàng lơh jăt ngan ngồn jơnau kờñ do, sàh Tu Mơ Rông pơn jăt tai gàr sùm broă lơh pà sơntìl ờ sa priă, bơcri priă lơh ală bơtơ̆t rbòng dà, pơlam bơta chài tam phan, lơh bal mpồl lơh sa kă bro blơi jơh phan bơna mờ gơhòi gơ jà bơcri priă lơh gơlik geh phan niam uă. Ngài rlau là bơ̆t bơtàu tiah lơh sa geh tơl jơnau sồr VietGAp, rơhời gơgơs măt kă bro phan kơphê bơkah pơnrơ is Tu Mơ Rông.

Ồng Võ Trung Mạnh pà gĭt tai: Dilah geh sơngka sền gàr niam mờ geh drà blơi sùm, rlau 1 tơlak tờm kơphê rơ̆p ờ mìng glòm tơlir ală rơnưng grồi lơm mờ gam pờ gơlik tŭ niam tam gơl broă lơh broă sa ai gĭt nđờ rbô hìu làng bol kòn cau Sơdàng in, rơhời ai tờm kơphê gơgơs tờm chi tam tờm tàm bă ù do:

 “Đảng ủy sàh Tu Mơ Rông neh lơh Ală jơnau neh lơh nền bơ̆t bơtàu kơphê bơkah pơnrơ is Tu Mơ Rông. Jăt tàm bơta hơ̆, bol hi rơ̆p pơlam làng bol in tam, sơngka sền gàr, lơh geh jăt jơnau sồr VietGAP, lơh màh tiah tam, mơkung lùp mờ ală mpồl lơh sa kă bro, mpồl lơh broă bal nàng lơh bal kă bro mờ làng bol, lơh gơlik geh phan bơna pơnrơ is bơh sàh Tu Mơ Rông dê, gàr niam măt kă bro kơphê Tu Mơ Rông rơ̆p tăc tàm drà dồ bă ngan ngồn ngan rlau jơh”.