Bơh nggùl nhai 4, ală anih ơm kis ing mờ kờp jơh rlau 2 rơbô ơdŭ ơm tàm ƀòn drà dềt Măng Đen, kơnhoàl Kon Plông, càr Kon Tum neh geh năc lòt nhơl dan ơpah lài cơldŭ ơm jơh lơm rao tàm dơ̆ ơm rlô Dà lơgar 30/04 mờ ngai 01/05. Tàm bơta hô hơng bơh lòt nhơl Măng Đen tŭ do dê, kal ke ngan nàng kah wơl là pơgăp mờ do ờ jŏ, ù tiah 7 tơnau 3 ñrùh dà gam là brê bơnơm dờng, uă ngan là gùng lòt dềt mờ bềng klờm mờ sơmăc uă ngan. Lòt gan bơh sơn rờp tơngai kal ke Măng Đen rơ hời đơs nền geh mat kă bro gơ gơs dùl tiah tơrgùm wơl tàm gùng lòt sền gĭt Tây Nguyên dờng ơning ơnàng bơh năc lòt nhơl rềp ngài dê. Ồng Nguyễn Xuân Hùng, dùl nă năc bơh càr lơgar Hà Nội chờ hờp tŭ tus wơl mờ Măng Đen, đơs:“Añ tus mờ Măng Đen kung là uă dơ̆ ngan rao sền gĭt bè tiah ơm kis mờ phan sa bơh tiah do dê. Măng Đen lơbơn niam gơlơh bè dùl nă ùr ơruh 18 sơnam hơ̆ nàng wă rò jơh ală klau pơnu tàm tơl kơnhoàl ù tiah bơh Dà lơgar dê tus tàm do nàng sền gĭt ù tiah niam ngan bơh Măng Đen dê. Dùl nam pal pơnđơl pràn lòt tus 2,3 dơ̆ tus tàm do nàng chờ hờp bal mờ ală bơyô tàm ù tiah Măng Đen do dê”.

3 nam rềp do lòt nhơl Măng Đen- Kon Plông sùm ơm tàm khà gơguh tam gơl pràn, pah nam ndrờm wă tai gĭt nđờ rơhiang rơbô dơ̆ năc lòt nhơl. Ală cau bơcri priă kung bè năc lòt nhơl sùm jòi tus ù tiah do mờ do là bơta gơn kơnờm nàng Măng Đen in tam gơl pah ngai.

Nàng lơh geh bơta gơ hòi gơ jà ai Măng Đen in tàm sră wăc sềr rùp lòt nhơl, tàm ală nam do càr Kon Tum neh ai lơh lài bơcri priă bơta pràn ai bơt bơtàu phan bơna, mpồl lơh broă mờ sơlơ tơnguh tai yal tơngĭt jơnau, tàm tơrbŏ bal lơh geh ală broă lơh lơh bal lòt  nhơl tàm càr mờ bơdìh càr. Ồng Đặng Đình Toán, Lam bồ Cơldŭ Niam chài, Jak chài mờ Yal tơngĭt jơnau kơnhoàl Kon Plông, pà gĭt, mờ pơlam gùng dà bơtàu tơnguh lòt nhơl kơ̆ kơl jăp jŏ jòng pơgồp bal prap gàr mờ ngui niam ală bơta kwơ niam chài ờs mờng bơh làng bol jơi bơtiàn dồ ết nă cau tàm tiah do dê, kơnhoàl neh bơh sơnrờp lơh geh ală phan bơna drơng broă năc lòt nhơl in:“Tus tŭ do bol añ neh geh rlau 142 anih ơm kis ing. Ngan là làng bol jơi bơtiàn dồ ết nă cau neh gĭt ngui bơta ƀuơn bơta pràn bơh hìu bơnhă mờ hìu ơm bơh he dê bơh hơ̆ bơtàu tơnguh drơng broă lòt nhơl. Bè lòt nhơl mờ phan bơna lòt nhơl bol añ sền gròi tàm phan bơna broă lơh sa suơn sre ngui măi mok pa mờ ală phan bơna geh bềng bơta niam chài, bè drà Măng Đen, Tiah lơh sa mang, Suơn niam Măng Đen. Phan bơna lòt nhơl mờ bol añ wèt tus hơ̆ là phan bơna lòt nhơl bè ù tiah brê bơnơm”.

Bal mờ lơh jat niam bơta pràn tàm dơlam is, ù tiah 7 tơnau 3 ñrùh ndu gơn rơh tŭ lài do mờ lòt nhơl Măng Đen- Kon Plông ngai do gam ơm tềng đăp tŭ tơngai niam brồ guh tus dà lềng dờng tŭ càr Quãng Ngãi mờ Kon Tum lơh jat broă tơmut bal.

  Pa do, đơng lam bồ 2 càr Quảng Ngãi mờ Kon Tum neh rơwah Măng Đen nàng bơyai lơh dơ̆ lơh broă sơn rờp cribơyai broă tơmŭt bal càr. Tàm uă tơngume geh cribơyai den broă tơnguh lơh niam gùng dờng Dà lơgar 24 mờ lơh mhar broă bơcri priă lơh gùng rơndeh lòt mhar 2 càr ring bal uă ngan. Ồng Bùi Viết Hà, Củ tịc Mpồl Lòt nhơl Măng Đen pà gĭt, do là bơta ƀuơn ƀoài uă ngan nàng broă lòt nhơl brê bơnơm- dà lềng tơnguh tai bơta gơ hòi gơ jà:“Cíñ phủ ai tơmŭt càr Quảng  Ngãi- Kon Tum, bol añ là ală cau lơh lòt nhơl tàm Măng Đen là chờ hờp ngan. Măng Đen tiah ù tiah ơm tàm anih tờm. Măng Đen kung là anih tờm lòt nhơl bơh càr pa den tàng bol añ pin dờn  ngan là rơ̆p bơtàu tơnguh. Ală cau lơh broă lòt nhơl pal rcang ai he in dùl gơnoar broă sùm sùm crăp rơcang bơcri priă bơh dà kơl hề tus priă jền nàng tam gơl muh mat ƀòn lơgar he dê. Mpồl lòt nhơl bol añ kung cèng bơta gùng dà broă lơh, gùng dà pơlam loh làng nàng di tŭ gĭt mờ broă lơh bơh kơnhoàl ù tiah do dê”.

Bơh ù tiah lời gời tơnơ̆ dơ̆ tam lơh, Măng Đen- Kon Plông tŭ do neh soh tàm să he dê dùl muh mat pa lơngăp lơngai, rềp mềr mờ bềng bơta pràn kis. Ală gùng lòt tàm ù tiah 7 tơnau 3 ñrùh neh gal cau chờ hờp, hô hơng cơnđoà jơng lòt bơh năc lòt nhơl dê. Bơh gùng dà broă lơh tơmŭt bal 2 càr Quảng Ngãi mờ Kon Tum, Măng Đen- Kon Plông gam geh tŭ tơngai niam nàng brồ guh lik tus tàm dà lềng dờng đơs nền ù tiah he dê tàm sră wăc sềr rùp tàm tiah do mờ ală lơgar dê.