Geh làng bol bơyai lơh tàm dơ̆ àng kơnhai ndar me nhai 10 nam he pah nam. Bơta niam bơnĕ krơi is ngan bơh dơ̆ lơh chờ do dê là ală plung Ngo jòng pơgăp 30 thơk, cèng uă rùp să, bơka rùp gơglŏ gơcrà ngan bơh ală cau chài kòn cau Khmer dê lơh gơs.

Plung Ngo, dà kòn cau Khmer hòi là Tuk Ngô geh làng bol ngui nàng tàm pơrlòng bal mờ gơ̆p tàm pah tŭ tus dơ̆ lơh chờ Ok Om Bok- Tàm pơrlòng plung Ngo nàng kờñ răc dan mờ Yàng geh mìu nhàc niam, phan tam hòn gơs niam. Cau chài lơh plung Ngo ồng Danh Vũ deh mờ dờng tàm dùl jơi nòi geh bơhiàn mờng chài lơh broă lơh plung Ngo tàm càr Kiên Giang den tàng bơh tŭ gam dềt, bi neh geh gĭt geh ală bơta chài, broă nàng lơh dùl nơm plung Ngo. Jăt bi Danh Vũ yal, bi là cau rài dơ̆ 4 bơh hìu bơnhă jăt broă lơh do dê.

Bi Sơn Sà The gam mờr wăc gơs rùp bơka tàm plung Ngo tàm hìu Yàng Phờk Phú Tứk

Bulah deh mờ dờng tàm càr Kiên Giang mơya bi Danh Vũ lơh geh wơl tiơng pơnrơ tàm càr Sóc Trăng là tiah geh broă lơh plung Ngo bơtàu tơnguh uă ngan rlau jơh tàm tiah ring dà dờng Cửu Long. Jăt bi Danh Vũ yal, nàng gơ gơs là dùl nă cau chài lơh plung Ngo ờ gŏ di là ƀươn soh ờ, bal mờ bơta đòm jăt ală bơta jak chài ngan bơh jơi nòi dê den gam geh bơta kờñ ngan bơh să tờm bơh cau chài dê tai. Dilah bè rài yau, Tuk Ngô là plung dơm chi, geh lơh bơh dùl dơm chi sao mìng gơ lơm den ngai do, tài bơh ală tờm chi sao ndrờm mờ 2 nă cau ùt gơlơh bè ờ gam tai, den tàng bè hơ̆, plung Ngo geh lơh mờ dơm chi sao geh òt gơs tơl nơm mpàn. Dơm chi sao geh rwah lơh plung Ngo pal geh rlau 100 nam. Bi Danh Vũ yal: Dơm chi sao ơn tàm dà den là niam, lài ngan là ờ gơtìp gơmŭt dà. Dơ̆ bàr tai là bơta gơtuà bơh dơm chi sao dê gơ niam ngan. Tus tơngai do den jăt bi bơta mờng chài, ờ gŏ geh dơm chi lơi niam rlau mờ dơm chi sao.

Jơnau nisơna sơnđờm tus mờ broă lơh lơh plung Ngo bơh bi Danh Vũ dê là tàm nam 2002 tŭ bi lơh plung Ngo ai hìu Yàng Phờk Pích in tàm ƀòn drà Vĩnh Châu, càr Sóc Trăng. Plung bơh sơnrờp bi lơh neh ai lòt tàm dà lơngăp lơngai, mờ geh tŭ là gơ gam lòt mhar rlau mờ nggờc tai, tơnơ̆ hơ̆ uă hìu Yàng Phờk tàm tiah do pơn jăt tai jà bi lơh plung Ngo nàng tus bal dơ̆ lơh chờ. Bơh tŭ hơ̆, bi ngan ngồn gơ gơs là dùl nă cau chài lơh plung rài dơ̆ puan bơh jơi nòi dê tŭ ờ hềt tus 30 sơnam.

Dùl nơm plung Ngo ndai bơh bi Sơn Sà The dê wăc bơka rùp tàm càr Sóc Trăng

Đơs bè bơta chài lơh plung Ngo, bi Danh Vũ yal, lơh plung Ngo gơ sồr cau lơh pal chài ngan bè sac rwah dơm chi, nền nòn, kèr chài tê mờ chài ngan bè bơta chài lơh. Bal mờ broă kung gam gàr bè ờs sơl geh bơhiàn niam chài ờs mờng bơh yau bơh plung  Ngo dê, gam pal lơh gơ in gơ lòt mhar ngan tềng hơđang mat dà gơ rơya den tàng bè hơ̆, tŭ tus bal dơ̆ lơh chờ tàm pơrlòng den hơ̆ sồng pơrlòng jai mờ cau. Bi Danh Vũ yal: Kwơmàng ngan rlau jơh là broă he crăp să plung, dilah crăp di, tàm gơ thòt ờ kơryan uă den plung geh lòt mhar. Kờñ plung niam den pal rwah di dơm chi sao, bàr tai là cau chài crăp, 3 là kơ̆t brơm ndàr mờ dơ̆ puan là cau lơh là lơh nền.

Tơl nơm plung Ngo lơh jơh pơgăp dùl nhai mờ nggùl nàng lơh gơs. Kờp tus tŭ do, bi Danh Vũ neh lơh mờ lơh niam wơl pơgăp 100 nơm plung Ngo ai ală hìu Yàng Phờk Khmer in. Tàm hơ̆, pah dơ̆ tus dơ̆ lơh chờ pah nam, bi lơh niam wơl tai mờ lơh tai bàr pe nơm plung Ngo nàng làng bol tus bal dơ̆ lơh chờ. Tŭ do, bi Danh Vũ geh pơneh là dùl nă cau chài lơh plung Ngo niam ngan rlau jơh tàm tiah ring dà dờng Cửu Long tŭ uă ngan plung Ngo bơh bi dê lơh ndrờm pơrlòng lơh geh khà jờng jơnhoa ngan, bè plung Ngo hìu Yàng Phờk Pong Tứk Chắs, hìu Yàng Phờk Ông Kho, hìu Yàng Phờk Tum Núp tàm càr Sóc Trăng, plung Ngo bơh kơngoàl Càng Long, càr Trà Vinh dê....

Ờ mìng là tàm pơrlòng niam lơm gời ờ mờ làng bol kòn cau Khmer gam sền gròi ngan tàm broă bơkah plung Ngo bal mờ ală rùp bơka niam bơnĕ ngan cèng uă bơhiàn niam chài niam bơnĕ is ngan bơh jơi bơtiàn dê. Dilah bè bi Danh Vũ pơnrơ là dùl nă cau chài lơh plung Ngo khà dùl tàm tiah ring dà dờng Cửu Long den tàm mpồl ală cau kờñ wăc rùp bơka tiơng pơnrơ tàm ală plung Ngo tŭ do kung pal yal tus bi Sơn Sà The ơm tàm sơnah ƀòn 2, ƀòn dờng Sóc Trăng, càr Sóc Trăng. Bulah sơnam gam dềt mơya bi mờ bơklau he dê là bi Lâm Phiên neh lời wơl uă rùp wăc bơka geh lơh roh uă ngan tŭ jiơ, dà kơlhề mờ niam bơnĕ is ngan.

Tŭ ngai chờ niam chài tàp pràn să jan mờ nhơl chờ làng bol kòn cau Khmer tiah ring đah jum dà lơgar dơ̆ VIII mờ Dơ̆ lơh chờ Ok Om Bok- Tàm pơrlòng plung Ngo Sóc Trăng dơ̆ V, tiah ring dà dờng Cửu Long nam 2022 neh mờr tus rềp, bol añ tìp bi Sơn Sà The tŭ gam wăc rùp bơka mờ rùp pơrya krơi is, mơya kwơmàng ngan rlau jơh là lơh bè lơi nàng tŭ ai lòt tàm dà, tus bal tàm pơrlòng, ală rùp bơka hơ̆ kung gam mpờl gŏ uă ngan ai plung Ngo in, gơhòi gơ jà cau sền. Bi Sơn Sà The, đơs: Bơh sơnrờp, den añ sơng lài, bè là cau dong gàr hìu yàng phờk kờñ rùp dà lơi den he sơng lài rùp dà hơ̆, bè là dà bò, pơrhê, dà phồng...Tơnơ̆ hơ̆ den he ngui phơng bò wăc rùp bơh sơnrờp rùp bơka, geh uă ngan rùp bơka ờs mờng bơh yau mờ hìu yàng phờk neh rwah. Bơdìh hơ̆ tai den he kung wăc rùp ală phan duh khuai, bè là đang grài, rơmìs, klìu, rwas...tàm muh plung gơ jăt tàm bơta sac rwah bơh hìu yàng Phờk dê.

Plung Ngo bơh cau Khmer dê mờ rùp bơka gơklŏ gơcrà ngan

Bơh lùp den hơ̆ sồng gĭt, bi Sơn Sà The là dùl nă cau chài wăc rùp bơka rài dơ̆ pe deh mờ dờng tàm dùl hìu bơnhă geh bơhiàn ờs mờng kờñ wăc rùp kơlik hìu tàm ală hìu Yàng Phờk Khmer mờ trah mòn rùp. Tŭ pa 8 sơnam, bi Sơn Sà The geh ồng deh mè là dùl nă cau chài ngan trah mòn rùp tiơng pơnrơ ngan tàm tiah ring dà dờng Cửu Long mờ mè bi dê kung là dùl nă cau geh mpàng tê chài ngan bơto wơl ală bơta gĭt wă bơta chài bơh broă lơh ƀươn tus broă lơh kal ke ngan tàm broă wăc rùp. Tus 14 sơnam bi neh chài ngan tàm broă lơh. Mờ bơta chài yàng ai pà bal mờ bàr nơm mpàng tê chài ngan, bồ tơngok kơlôi sơnơng bơceh lơh, bi neh gơ gơs là cau chài wăc rùp mờng chài ngan, geh uă hìu Yàng Phờk jà tus wăc ală rùp jăt tàm yal yau tàm sră goh Yàng Phờk kung bè ală rùp wăc bơka tàm ală plung Ngo.

Mờ bơta chài bal mờ bơta ngac ngar bơh he dê, bơh uă nam do, uă cau chài là kòn cau Khmer tàm hơ̆ geh bi Sơn Sà The, Danh Vũ neh lời wơl uă phan lơh geh neh mờ gam geh prăp gàr tàm ală hìu Yàng Phờk Khmer dê tàm tiah ring dà dờng Cửu Long. Bơh hơ̆, pơgồp bơnah geh kwơ ngan tàm broă prăp gàr, sền gàr mờ bơtàu tơnguh rài kis niam chài krơi is kòn cau Khmer tiah ring đah jum dà lơgar dê, lơh gơlik geh bơta niam bơnĕ is ngan ai Ngai chờ Niam chài Tàp pràn să jan mờ Nhơl chờ làng bol kòn cau Khmer tiah ring đah jum dà lơgar dơ̆ VIII in mờ Dơ̆ lơh chờ Ok Om Bok- Tàm pơrlòng plung Ngo Sóc Trăng dơ̆ V, tiah ring dà dờng Cửu Long nam 2022 geh lơh tàm 03 ngai bơh ngai 06 tus ngai 08 nhai 11 nam 2022 do.