VOV.K'Ho- Jat jơnau yal yau kòn cau Bahnar dê, bă ù Vĩnh Thạnh lài do geh mat sơnđan là Tơrñăng Ta Kơn (gơwèt càr Gia Lai), geh bơh bơta geh mat bơh dùl pơnai lŭ dờng ơm dì gùl brê bơnơm dờng ơning ơnàng. Tiah do geh bal mờ jơnau yal mblàng lời wơl bè 3 nă oh mi klau Drum, Drăm mờ ùr rôh Prai Pnang hàng niam. Kơnờm nùs nhơm tam klăc bal, dùl nùs sền gàr ƀòn lơgar, 2 nă oh mi klau Drum mờ Drăm neh bal mờ làng bol ntào tam lơh jai pha mờ ling bol sò tơm, cèng wơl rài kis lơngăp lơngai ai ƀòn lơgar in tàm tiah brê bơnơm dờng. Jơnau yal hơ̆ tus tŭ do kung gam geh sơl kòn cau Bahnar yal wơl bè dùl rùp pơrya niam bè nùs nhơm khin cha mờ bơta pràn bơh bơta tam klăc bal tàm ƀòn lơgar dê.