VOV.K'Ho- Geh ală săp ntas cing mpong tus tàm gùl brê bơnơm, iăt tồn là mìng là săp ntas bơh ngai chờ dê. Mơya iăt wơl dồ ết tai, he rơ̆p gŏ tàm hơ̆ geh nùs nhơm tam klăc ƀòn lơgar, geh jơnau tơngkah cau gĭt kis rềp rlau tai, kờñ gơboh bal rlau. Jơnau yal yau “Săp cing hòi bơyô”, yal bè klau pơnu dềt A Linh, kòn cau Sơdàng neh lơh tìs, den gĭt dờp bơta tìs he dê, gĭt iăt kơno. Bơh săp ntas cing ƀòn lơgar dê, A Linh wă geh dùl bơta ƀarah ƀarài mơya jrô ơnàng ngan: săp cing niam ngan rlau jơh ờ gŏ di là săp cing dròng dờng ngan, mờ là săp cing gĭt hòi cau rê wơl bal mờ gơ̆p, gàr bal bơta tàm gơboh mờ hwềng tờm ƀòn lơgar dê.