Rài yau geh dùl nă klau pơnrao mờ dùl nă ùr pơnrao. Klau pơnrao do geh dùl nă kòn ùr, ùr pơnrao ne kung geh dùl nă kòn ùr sơl. Bàr nă kòn ùr dềt tàm kwèng gơ̆p sùm tam jà lòt nhơl tơnơ̆ hơ̆ rê hờ hìu ùr pơnrao ne. Ùr pơnrao ne sồr kòn ùr klau pơnrao dê: Ơ sao, sao rê tàm hìu sao đơs mờ bèp sao dê là mơi kờñ bao mờ bèp sao dê yơ. Bè hơ̆, den là drim ngai lơi sao kung geh tuh muh mat mờ dà toh mờ ñô ơlak vang, kòn mơi dê den mìng tuh măt mờ dà tờm lơm mờ hùc dà tờm lơm.

Ùr ơruh rê hờ hìu mờ yal wơl jơh ală jơnau do ai bèp he dê in. Klau pơnrao kơlôi is tàm nùs: Wih yờ, ờ gŏ gĭt pal lơh bè lơi do yờ? Bau den là kung niam sơl gơ mơya digơlan kung là bòl glar sơl gơ ì.

Lồi dŭt, klau pơnrao do kơlôi ờ gŏ gĭt pal lơh nền bè lơi, den tàng hồ dùl đah khŏ ding mờ sồr kòn: Ơ kòn, kòn cèng khŏ ding do. Tềng ndơl jơng khŏ geh dùl nơm trồm bluh. Kòn cèng tus hờ cơldŭ dăp tềng dra yồng tềng điñ dờng tơnơ̆ hơ̆ kòn tuh dà tàm khŏ ding yơ. Dilah khŏ ding gàr geh dà den bèp lòt jòi bao pa, dilah dà gơ hòr den bèp ờ jòi bao tai.

Ùr ơruh lơh jăt bơr bèp dê sồr. Dà lơh kơltau gơtồ ndơl ndơp jơh trồm bluh, khŏ bềng dà. Ùr ơruh tus mờ yal bèp in broă gơlik geh. Bèp să tờm tơn tus sền, gŏ di ngan bè hơ̆, ồng tus tơn hờ hìu ùr pơnrao nàng dan bao. Dơ̆ ñô bau geh bơyai lơh. Drim ngai tơnơ̆, tŭ bàr nă ùr ơruh guh bĭc den tềng đăp măt kòn ùr klau pơnrao dê neh geh dà toh nàng tuh măt mờ ơlak vang nàng ñô, ai tềng đăp măt kòn ùr bơh ùr pơnrao dê den mìng geh dà tờm lơm. Drim ngai dơ̆ bàr, tềng đăp măt kòn ùr klau pơnrao dê kung bè kòn ùr ùr pơnrao dê ndrờm geh dà tờm nàng tuh mat mờ dà tờm nàng hùc. Tus ngai dơ̆ pe, tềng đăp măt kòn ùr bơh klau pơnrao dê geh dà tờm nàng tuh mat mờ dà tờm nàng hùc. Ai tềng đăp măt kòn ùr ùr pơnrao dê geh dà toh nàng tuh mat mờ ơlak vang nàng ñô, mờ bè hơ̆ sùm bè hơ̆ sùm tus tơnơ̆ do.

Ùr pơnrao gơjrañ ngan kòn ùr bơklau dê, mìng jòi broă nàng lơh pơn jê pơn sồt khai sơlơ ngai sơlơ bòl glar kal ke tai. Mò do ƀoah gơjrañ tai tài bơh kòn ùr bơklau dê den hàng bơnĕ ngan, sền niam mat ngan, ai kòn ùr mò dê den muh mat să jan iơh ngan mờ nùs nhơm den ờ gŏ niam dùl êt lơi sơl.

Dùl ngai nhai mrềt noăt, trồ tiah bềng piar lơm, piar gơdùh bềng ndơ̆p jơh bơnơm mờ thòng jrô, mò do lơh dùl nơm àu mờ pơ àr, hòi kòn ùr bơklau dê tus mờ sồr: Ai soh ào do ih nàng mŭt tàm brê pik añ in dùl bài plai zờu bềng, añ gơ dan ngan sa plai zơu.

Ùr ơruh hơ: Wơ yàng lơi, kàl mrềt mbè mờ geh plai zơu ơ mơi! Ù tiah mrềt noăt ngan, bềng piar gời lơm. Mờ ñchi gơlơh mơi sồr kòn soh àu pơ àr mờ lòt taih? Hờ bơdìh trồ tiah mrềt noăt ngan, nhơm tă mrềt lơm. Càl khồm gơlơh bè gơ sa tàm să tàm puăc tơn, jê sra bè lò srăp tềng puăc tơn.

Bau bèp dê đơs: Wơi ai den yơ, ai pơndang bơr añ hah? Kờn kis den lòt mhar mờ dilah pik geh bềng dùl bài plai zơu den hơ̆ sồng geh rê wơl yơ.

Tơnơ̆ hơ̆ mò do pà khai in dùl pèt ƀañ ƀùñ kră ngan mờ đơs: Ai sa ƀañ den dùl ngai yơ.

Mò do kơlôi is tàm nùs, kòn ùr bơklau dê lik bơdìh trồ rơ̆p gơtìp chơ̆t tài bơh jơgloh mrềt, bè hơ̆ là ờ gŏ gam pal sền gŏ tai mat khai pah ngai.

Ùr ơruh dòn bơr, soh àu pơ àr tàm să mờ cèng bài lik lòt. Piar gơdùh uă ngan. Ờ sền gŏ dùl tờm chi dềt lơi. Khai mŭt tàm brê gŏ dùl nơm hìu dềt, geh pe nă klau lơyah ntàu sền. Khai teh mpồng mờ còp să khi. Khi sồr khai mŭt tàm hìu. Khai mŭt tàm cơldŭ, nggui tềng dùl nơm cơghĕ jòng kềng gah bơnhă ồs jơr ram. Khai mong jơr ram mờ sa drim. Ală cau lơyah đơs: Pà bol añ in sa bal dùl êt ih.

Khai chờ hờp chờ hờñ klah tơn dùl pèt ƀañ ƀùn lơh bàr đah, mờ pà khi in dùl đah. Khi lùp khai: Wih yờ, trồ tiah mrềt noăt ngan bè do, ai soh àu lơhơ ngan mờ mŭt tàm brê nàng lơh chi lơh hah?

Khai đơs: Ơ yàng lơi, añ pal pik tus bềng dùl bài plai zơu, dilah pik bềng dùl bài plai zơu do den añ hơ̆ sồng khin rê hờ hìu.

Khai jơh sa ƀañ, khi dờp khai in dùl nơm pơrnơs mờ sồr: Ai ià pơrnơs do lòt tus anih mpồng ngkời mờ pơs sàng goh jơh piar yơ.

Tŭ khai neh lik bơdìh hìu, pe nă cau lơyah đơs: Wih yờ, ùr ơruh ne dòn bơr mờ niam nùs ngan tai, tam pà ƀañ ai bol he in, bè hơ̆ den pal ai khai in bơta lơi dô yơ?

Cau dơ̆ dùl đơs: Añ pà khai in bơta hàng bơnĕ ngai sơlơ hàng rlau tai.

Cau dơ̆ bàr đơs: Añ pà khai in bơta do: Đơs dùl dờ den dùl đong priă biàng bơh tàm bơr gơdùh.

Cau dơ̆ pe đơs: Añ pà khai in bơta do: Dùl nă cau bơtau rơ̆p tus bau mờ khai.

Ùr ơruh lơh jăt ală jơnau cau lơyah dê sồr. Khai cèng pơrnơs lòt tus hờ nggkời hìu dềt mờ pơs jơh piar. Mìng plai zơu dum lơm; plai zơu dum mpờl tềng đăp măt khai dê pơrhê ngan tềng ƀlàng bềng piar bò lơm. Khai chờ hờp ngan den tàng dờñ mờ prăp bềng bài. Tơnơ̆ hơ̆ den khai ưn ngài ală cau lơyah, kŭp tê tơl nă cau tơnơ̆ hơ̆ ntoăt rê hờ hìu mờ jàu mơi cồng in phan mờ mò kờñ. Khai mŭt tàm hìu, pa pờ bơr đơs den dùl đong priă gơdùh bơh tàm bơr. Khai sơrbac mhar yal wơl jơh ală broă gơlik geh tàm brê; đơs dùl dờ là geh dùl đong priă biàng gơdùh bơh tàm bơr, mìng dùl êt lơm mờ cơldŭ bềng priă biàng lơm. Kòn ùr mơi cồng dê driau dờng: Wơ yơ, geh cau tơrìs să ngan pơñừ să ngan den, sơrbì priă bè sơrbì sồ siă sơl.

Tàm nùs nhơm bồ tơngoh khai dê là neh gơjrañ ngan kòn ùr bèp cồng dê, den tàng kung kờñ mŭt sơl tàm brê nàng jòi plai zơu. Mè khai dê đơs: Ờ gŏ gơtùi ờ, kòn ùr dềt kờñ gơboh ngan bơh mè dê. Trồ tiah mrềt noăt ngan ơ kòn, kòn mè dê digơlan là chơ̆t mrềt dô hă.

Mơya kòn ùr mơi cồng dê ờ gŏ lời mè in lơngai să, den tàng lồi dŭt, mè khai dê kung pal tơngộ mai khai in dùl nơm àu niam ngan nàng khai in soh, pà khai in dùl nơm ƀañ ƀùñ ƀơ mờ ƀañ lơngồt cèng jăt bal tàm să nàng sa tàm gùng. Khai mŭt tàm brê, tus di hìu dềt. Pe nă cau lơyah kung gam ntàu sền sơl. Mơya, khai ờ gŏ bài kờñ wơl sền khi, kung ờ gŏ kờñ lùp còp khi sơl, mờ bè hơ̆ là mŭt tàm hìu ờ lùp ờ còp cau lơi sơl, nggui kềng bơnhă ồs jơr ram ai ƀañ bùñ ƀơ mờ ƀañ lơngồt nàng sa. Ală cau lơyah dan mờ khai: Wơi, ai pà ƀà bol añ in dùl êt nàng sa ih.

Khai đơs: Wih yờ, kàr do dùl nă añ sa kung ờ gŏ tơl sơl den mbè añ geh mờ pà cau ndai in hơ̆.

Tŭ khai neh jơh sa. Khi sồr: Do geh dùl nơm pơrnơs do, ai cèng pơrnơs do lòt pơs tềng ngkời hìu yơ.

Khai đơs: Wih yờ, añ ờ gŏ di là cau lơh dĭ bol mê dê ờ yơ.

Khai gŏ khi digơlan ờ gŏ pà khai in bơta lơi den tàng sơrbac mhar tơn lòt tus mpồng hìu. Ală cau lơyah tàm bơyai: Wih yờ, kòn ùr dềt do ờ di ngan ih, nùs nhơm ƀoah gơjrañ, ết sơ ềl ngan,  cau lơi geh phan lơi kung gơjrañ lơm, den he pà khai in bơta lơi do taih?

Cau dơ̆ dùl đơs: Añ pà khai in bơta do: Sơlơ ngai sơlơ iơh tai.

Cau dơ̆ bàr đơs: Añ pà khai in bơta do: Đơs dùl dờ là dùl nơm kĭt trồ gơ dô lik bơh mbùng.

Cau dơ̆ pe đơs: Añ kờñ khai chơ̆t nisơna tài bơh rềs àr.

Ùr ơruh do lik bơdìh hìu lòt jòi plai zơu, mơya ờ gŏ geh dùl nai plai lơi den tàng wàm pơrhiăt ngan mờ dô rê tĕ. Khai pa pờ mbùng kờñ đơs nàng yal wơl mè in jơnau gơlik geh tàm brê den đơs dùl dờ là geh dùl nơm kĭt trồ gơdô lik bơh mbùng khai dê, lơh jơh tơl nă cau rơngòt ngan mờ ờ gŏ bài kờñ ơm rềp mờ khai.

Mơi cồng sơlơ gơjrañ nùs ngan rlau tai mìng kờñ jòi broă lơh ai kòn ùr bơh bơklau dê gam sơlơ ngai sơlơ hàng bơnĕ rlau tai, pal jê sồt muăt jrùm.

Mò ai dùl nơm glah mờ ơn tềng bơnhă ồs nàng gơm dang che. Tŭ neh gơm dang che, mò do kơ̆t che tềng pơnì ùr ơruh nđàc sơngĭt dê, dờp khai in dùl nơm sùng, sồr khai lòt tus hờ dà dờng neh gơ gơs piar tài bơh mrềt ntoăt ir nàng tờ dùl nơm trồm nàng lơh mñà dang che brài. Ùr ơruh do dòn bơr ngan mờ lòt tờ dùl nơm trồm tàm lŭ piar. Khai gam pŏ ngan lŭ piar den geh dùl nơm rơndeh gơklŏ gơcrà ngan lòt tus, tàm hơ̆ geh bơtau nggui. Rơndeh ơm wơl, bơtau lùp: Ơ oh, oh là cau lơi, lơh chi lơi tàm do taih?

Ơ cau bơtau, oh là dùl nă ùr ơruh rƀah lơ ời ngan gam dŏ che brài nàng gơ in mñà.

Cau bơtau kơno khai đơs bè hơ̆ den gơlơh ngoh rơngăc ngan, gŏ khai hàng bơnĕ tai den tàng đơs: Oh kờñ sơl đì rơndeh lòt bal mờ añ lah ờ?

Ùr ơruh do đơs là khai chờ hờp ngan, tài bơh khai chờ hờp là geh lòt ndơ̆p măt mơi cồng mờ kòn mò dê. Den tàng khai sơrbac mhar tơn đì rơndeh lòt bal mờ cau bơtau.

Tus hờ gơlăng bơtau, dơ̆ bơyai lơh ñô bau geh lơh dờng ngan, jăt di bè jơnau ai lơngai bơh ală cau lơyah dê. Rlau dùl nam tơnơ̆, pơ ùr cau bơtau gam kơnòm să ngan deh dùl nă kòn klau. Mơi cồng kơno yal jơnau hơ̆ den tàng bal mờ kòn ùr mò dê lòt tus hờ gơlăng bơtau, lơh pơrlồm bè còp rwàng. Mơya bơtau pa lòt tiah ndai dùl êt, ờ geh cau lơi ơm tàm hơ̆, mò iơh bơsak cê̆ sŏ pơ ùr bơtau dê, ai kòn mò dê den kŭp jơng pơ ùr bơtau dê, mờ bàr nă khi tơn dùh pơ ùr bơtau dê bơh mpồng pơnet tus tàm hiòng dà gam gơhòr rềp tềng hơ̆. Kòn ùr muh mat iơh ngan bơh mò dê bĭc tềng anih pơ ùr cau bơtau dê tềng jơnờng, ai mò den ai chèu ndơl ndơ̆p bồ kòn mò dê. Tŭ bơtau rê mong đơs mờ pơ ùr den mò đơs: Ơ cau bơtau, dàr dàr ih, tŭ do ờ hềt gơtùi đơs ih. Pơ ùr bơtau dê gam gơlik dà pơhàl uă ngan sùh bè pa um, bơtau lời ƀà pơ ùr bơtau dê in ơm rlô bĭc jơh dùl ngai do yơ.

Bơtau ờ gŏ gĭt là geh jơnau iơh lơi den tàng tus drim ngai hìng hơ̆ sồng tus wơl. Bơtau mong tơm bơh bơr mờ pơ ùr. Pơ ùr pơrlồm pa đơs dùl dờ den là dùl nơm kĭt trồ gơ dô lik bơh mbùng khai dê mờ ờ gŏ di là dùl đong priă biàng bơh tàm mbùng gơdùh hờ bơdìh. Bơtau lùp ñchi gơlơh bè den, den mè khai dê đơs hơ̆ là tài bơh dà pơhàl gơlik uă ir, mơya dùl êt tai rơ̆p jơh gơ dê.

Mơya tus mang, klau trŭ gơm biăp piang gŏ dùl nơm ada re lòt gan gùng brong dà mŭt mờ đơs: Bơtau lơh bơta lơi den ih?

Ờ gŏ cau lơi hơ, ada đơs tai: Năc yàng añ dê lơh bơta lơi den taih?

Klau trŭ gơm biăp piang đơs: Khi jơh bĭc lơhă gơ dê.

Ada lùp tai: Kòn dềt añ dê lơh bơta lơi?

Klau trŭ gơm biăp piang đơs: Gam bĭc lơhă tàm kơƀường.

Ada tơnơ̆ hơ̆ tơlik să gơ gơs là pơ ùr bơtau dê ai kòn in pô, rơtuh kơƀường dềt kòn dê mờ tơn tơ̆ ồi ai kòn in, hơ̆ sồng tam gơl wơl să gơ gơs ada re lòt gan gùng brong dà mờ dô tĕ. Mò tus pe mang tai. Mang dơ̆ pe, khai đơs mờ klau trŭ gơm biăp piang: Mê lòt yal mờ bơtau in cèng đàu tus srăp pe dơ̆ tềng bồ añ dê tềng mpồng hìu.

Klau trŭ gơm biăp piang ntoăt yal tơn bơtau in. Bơtau cèng đàu mờ srăp tềng huềng pơ ùr bơtau dê pe dơ̆. Tus dơ̆ pe, pơ ùr bơtau dê tơlik să tềng đăp măt bơtau, muh mat chờ hờp chờ hờñ, pràn kơldang rlau mờ tŭ lơi jơh. Bơtau chờ hờp ngan mơya tơ pồn pơ ùr he dê tàm dùl cơldŭ, tus dì ngai rlô, kòn dềt lơh yàng ràu goh tìs. Dơ̆ lơh yàng ràu goh tìs neh lơh sir jơh, bơtau đơs: Dùl nă cau tùng cau ndai lik bơh jơnờng, tơn dùh tàm dà den pal kong lơh glài lơi hah?

Mò kra đơs: Niam ngan rlau jơh là tơmŭt klau iơh bơsak hơ̆ tàm dùl nơm thùng ai gơ in bơrlă bơh tềng hơđang bơnơm jơnhoa.

Bơtau đơs: Ai neh lơh glài is ai in hơ̆.

Bơtau sồr lòt ai dùl nơm thùng, tơmŭt mè mờ kòn mò iơh bơsak do tàm thùng mờ ndơl ñhăp wơl, tơndùh bơh tềng hơđang bơnơm jơnhoa nàng gơ in bơrlă bơh hơđang. Bè hơ̆ là jơh rài ƀàr nă mè mờ kòn mò iơh bơsak ngan ne.