Sền gròi broă tam phan tàm broă tơrlòng lơh, uă làng bol, kwang bàng lơh broă tàm anih dong kờl bơto pơlam broă lơh sa suơn sre ală càr Tây Nguyên gơlơh nùs nhơm niam mờ broă atbồ suơn jăt broă lơh tơrgùm bal. Bơh broă atbồ phơng, dà tuh tus mờ broă rơcang kơrian mờ phan lơh aniai phan tam ndrờm geh lơh ndrờm bal, geh broă dong kờl bơh măi mok pa, măi mok sồ mờ jơnau yal tơngit yal lài bè trồ tiah.

Ồng Nguyễn Văn Một, làng bol lơh broă sa tam sầu riêng tàm sàh Quảng Phú, càr Dăk Lăk pà git, bơta lơh ồng di nùs nhơm là broă tơrlòng lơh do ờ yal dùl bơta jăk chài krơi is mờ lơh geh bal dùl mpồl broă lơh. Làng bol lơh broă sa gơtùi sền gŏ tơn cồng nha tàm suơn nàng bơsram mờ ngui tàm mùl màl. Ồng Nguyễn Văn Một, pà git tai: “Bàr pe nam bloh añ lơh geh plai niam ngan, cau blơi ờ đơs jơnau lơi, sơnơm là he atbồ di tŭ. He lòt bơsram tai nàng gơtùi lơh niam rơlao. Gŏ bè do là chờ hờp ngan, añ geh tai uă broă lơh mờng chài nàng lơh”.

Tàm bơta gah sầu riêng mờ kơphe Tây Nguyên gam kong gơtìp mờ uă bơta lòng bè trồ tiah ờ niam, tu kòp gơguh mờ ală bơta niam kờñ lơh geh bơh drà kă bro blơi phan kung kal ke, broă lơh ală broă tơrlòng lơh lài pơgồp bal mờ tam jào broă lơh geh sền là gùng dà broă lơh geh kwơ.

Tiến sìh Phan Việt Hà, Phó Anih lơh broă Kơlôi sơnơng drơng broă lơh tàm Anih Lơh broă sa suơn sre brê bơnơm Tây Nguyên pà git, broă tơrlòng lơh do geh lơh jăt gùng dà broă lơh ngui jơh ală broă lơh nàng ala mờ broă mìng tơrgùm tàm tơl broă lơh krơi is. Bơta tờm là atbồ bơta pràn phan tam tơrgùm bal, ngui dà geh cồng nha, sền gàr bơta niam ù, sền gròi khà jơnkah tàm phan geh lơh bơh broă lơh sa suơn sre mờ ngui măi mok sồ tàm broă atbồ lơh sa.

Jơnau kờñ dŭt ndơl ờ mìng là tơnguh uă cồng nha mờ gam dong kờl làng bol lơh broă sa tơrmù priă tă, tơnguh bơta pràn gơdờp mờ tam gơl trồ tiah mờ di pal mờ ală jơnau kờñ tăc mờ lơgar bơdìh ngai sơlơ kal ke. Jăt Tiến sìh Phan Việt Hà đơs, do là ală bơta tờm lơh geh nàng gah phan sầu riêng mờ kơphe bơtàu tơnguh kơl jăp tàm tơngai jŏ jòng. “Ală suơn tam phan mờ bol añ neh ngui uă ngan bơta gơguh jăk bơta chài. Bol añ kung neh geh broă bơto sồr lơh sầu riêng kơl jăp. Do là broă tơrlòng lơh mờ bol añ kơ̆p kờñ pơgồp bal 4 hìu. Tàm broă tơrlòng lơh do, bol añ kờñ lơh geh jơnau tơrbŏ bal jơh ală gùng dà broă lơh jăk chài bơh ală gah lơh broă bal krơi is”.

Dùl bơta pal kah ngan bơh broă lơh là broă tus bal bơh uă gah broă, bơh anih lơh broă atbồ dà lơgar, mpồl lơh broă kơlôi sơnơng bơta jăk chài tus mờ mpồl dong kờl bơto pơlam mờ ală mpồl lơh broă dong kờl lơh sa. Broă pơgồp bal do geh kơ̆p gơn rơ̆p tơrmù bơta ờ ndrờm bal đah kơlôi sơnơng mờ mùl màl.

Ồng Lê Quốc Thanh, Kwang lam bồ Anih tờm Dong kờl Bơto pơlam broă lơh sa suơn sre Dà lơgar đơs là, geh ờ uă broă lơh bŭ lah niam kàr lơi kung mìng mùl màl tơnguh bơta kwơ tŭ geh tam pjào uă mờ geh làng bol lơh broă sa dờp, ngui tàm broă lơh.

Jăt ồng Thanh đơs, mpồl dong kờl pơlam broă lơh sa suơn sre rơ̆p lơh gơnoar tơrbŏ bal đah cau jăk chài mờ làng bol dê, dong kờl ală bơta gơguh jăk chài geh lơh uă mhar rơlao bơh ală broă bơsram tàp, lơh mờ bơto sồr tơn tàm suơn. Tŭ ală gah geh tus bal tàm dùl mpồl lơh broă pơgồp bal nền nòn, ală broă lơh tơrlòng tam phan kơl jăp rơ̆p geh dơ̆ niam nàng lơh uă mờ cèng geh cồng nha mùl màl ai cau lơh sa in. “Nàng gàr geh jơh ală jơnau kờñ kal ke ngan bơh drà kă bro den tus tàm do làng bol lơh broă sa suơn sre ndrờm gơtùi jòi geh gùng dà broă lơh. Bol añ kung kơ̆p kờñ làng bol bal mờ ală mpồl lơh broă dong kờl bơto pơlam lơh bè lơi nàng tam pà bal geh uă rơlao tai ală broă lơh mờng chài bơh ală broă tơrlòng lơh mờ bol añ neh ai geh”.