Tàm càr Gia Lai, ală ƀòn lơgar gam lơh mhar broă kờp sền wơl, lơh loh làng jơnau tơnggĭt mờ pơlam làng bol lơh sir ală jơnau sồr nàng lơh, pà màh sồ tiah tam sầu riêng. Mờ uă cau lơh broă sa, broă geh màh sồ tiah tam dong pờ tai tŭ niam nàng phan bơna tăc tàm ală drà kă bro jơnau sồr uă bè bơta niam mờ jòi gĭt anih tờm lơh gơlik. Ồng Hồ Nhất Cẩn, là cau tờm dùl anih lơh sa sươn dờng tam sầu riêng tàm sơnah ƀòn Hoài Nhơn Nam, pà gĭt, bơdìh mờ broă sền gròi lơh gơlik jăt gùng hữu kơ, tơngguh uă bơta niam plai, ồng kung gam sền gròi tus broă bơ̆t bơtàu wơl tiah tam geh tơl jơnau sồr.

"Pa do geh Jơnau lơh nền tàm pơrjum 36 den añ lùp sơl mờ sơnah ƀòn. Sơnah ƀòn kung dong kờl ai he in geh măt kă bro. Kung kờñ lơh nàng măt kă bro he brồ guh. Gơn kơnờm là 3 nam tai gời là gơtùi lơh anih tơrgùm blơi, anih tăc bro”.

Ồng Võ Tấn Lực, Lam bồ Cơldŭ Lơh sa, Phan bơna bơ̆t bơtau mờ Tiah drà sơnah ƀòn Hoài Nhơn Nam, càr Gia Lai pà gĭt, ƀòn lơgar gam bơto pơlam ală hìu tam sầu riêng kờp sền wơl, lơh sir sră nggal mờ lơh loh làng jơnau yal tiah tam. Do geh sền là broă bơh sơnrờp nàng gơgơs ală tiah lơh gơlik phan lơh geh jơnau sồr bơh drà kă bro dê.

"Ƀòn lơgar lơh jăt Jơnau lơh nền tàm pơrjum 36 bơh Chính phủ dê mờ rơ̆p bơto pơlam ai ală hìu làng bol lơh broă sa geh chi tam in nàng lơh jăt broă cih măt nàng geh bơto pơlam bơsram tàp, nàng lơh jăt bè ală broă pơlam lơh gơlik mờ cih tàm sră pơ àr pah ngai nàng tơl cơng tàng lơh màh sồ tiah tam tàm ù tiah sơnah ƀòn dê”.

Tàm uă tiah tam sầu riêng ndai càr Gia Lai dê, làng bol kung gam sền gròi tus broă lơh màh sồ tiah tam nàng kơ̆ kơl jăp drà tăc. Hìu bơnhă ồng Nguyễn Văn Hải tàm sàh Ia Ly neh đềt mềr mờ tờm sầu riêng uă nam. Kơnờm lơh jăt ală broă pơlam lơh gơlik, 2 lồ sầu riêng bơh hìu bơnhă dê uă nam do sùm geh cau kă phan đơs niam ngan mờ gơ ai tơnhàu uă. Mơya, phan bơna kung gam mìng tăc uă jăt broă lơh ờs mờng bơh lài lơm, tài bơh sươn ờ hềt geh màh sồ tiah tam. Jăt ồng Hải, tŭ drà tăc blơi ngai sơlơ geh uă jơnau sồr, broă lơh màh sồ tiah tam rơ̆p dong cau lơh broă sa geh tai tŭ niam lòt jòi drà tăc kơ̆ kơl jăp tàm tơngai tus.

"Hìu bơnhă làng bol lơh broă sa bè añ kung bè uă cau lơh sầu riêng den ndrờm bè cau lơi kung kơ̆p kờñ ngan là geh đau màh sồ tiah tam. Nàng tơnơ̆ do drà tăc gơ in geh sùm đau mờ kơ̆ kơl jăp đau. Tài bơh sầu riêng tŭ do, drà tăc blơi sầu riêng ngai sơlơ uă. Tàm hơ̆, geh drà ờ ngan rơ̆p ờ kơ̆ kơl jăp pơndrờm mờ ală sươn geh màh sồ tiah tam”.

Tus tŭ do, càr Gia Lai neh geh pà 440 màh sồ tiah tam ală bơta chi phan lơh geh bơh sươn sre, kờp jơh bă ù ơnàng rlau 13 rbô lồ, mờ 61 màh sồ anih dăp ơn klơm. Is gơ wèt mờ tờm sầu riêng, jơh gùt càr geh mờr 3 rbô lồ neh geh pà màh sồ tiah tam. Jăt ồng Huỳnh Việt Hùng, Kwang Lam bồ Anih tờm Dong kờl bơto pơlam broă lơh sa sươn sre càr Gia Lai, Jơnau lơh nền tàm pơrjum 36 geh ală bơta pa nàng kờñ lơh ƀươn sră nggal mờ ai tơl bơta lơh mhar broă pà màh sồ tiah tam ai làng bol lơh broă sa in.

"Jăt jơnau pal jăt lài do den pal là 10 lồ rlau hơđăng den hơ̆ sồng geh pà dùl màh sồ tiah tam. Bulah bè hơ̆, jăt Jơnau lơh nền tàm pơrjum 36 den ờ gŏ rồn bơklơn bă ù. Jơnau lơh nền lài do chính phủ dê là dùl bă ù den bi mìng pà dùl màh sồ tiah tam lơm. Mơya ală tŭ lơh ngan ngồn den cau lơh broă sa he dê dùl bă ù ờ gŏ di mìng tam dùl bơta chi tam lơm, mờ là tam bơrlŭ bal kơphe, den Jơnau lơh nền tàm pơrjum 36 do pờ gơlik, gơtha là dùl bă ù bi gơtùi pà 2 halà 3 màh sồ ai tơl bơta chi tam tềng hơ̆ in”.

Càr Gia Lai gam lơh pràn broă lơh jăt Jơnau lơh nền tàm pơrjum sồ 36 nàng ai jơnau tơnggit mùl màl, ƀuơn wă tus mờ làng bol lơh broă sa suơn sre, mpồl lơh broă bal mờ mpồl lơh sa kă bro tàm càr do bè ală jơnau geh ai pa tàm broă ai mờ atbồ màh sồ tiah tam. Tàm hơ̆, ƀuơn lơh ƀuơn jơh sră nggal ai, atbồ màh sồ tiah tam, màh sồ hìu dăp klơm mờ tơnguh kơrnoăt sền gròi tơnơ̆. Cau ai tơnggit jơnau đơs do neh geh dơ̆ lùp ồng Kiều Văn Cang, Lam bồ Phó Chi Kụk tam phan mờ sền gàr phan tam, Sờh Broă lơh sa suơn sre mờ Tiah ơm kis càr Gia Lai bè broă do.

Ơ ồng, Jơnau lơh nền tàm pơrjum sồ 36 nam 2026 bơh Chính phủ dê geh ală bơta pa lơi bè broă kờñ geh màh sồ tiah tam?

Ồng Kiều Văn Cang: “Jăt Jơnau lơh nền tàm pơrjum sồ 36 nam 2026 bơh Chính phủ dê den geh ală bơta pa: Lài ngan: Gơnăp gơnoar dờp mờ ai màh sồ tiah tam geh jào tus Anih duh broă Làng bol kấp sàh tiah geh anih tiah tam dê. Dơ̆ bàr: Tơngai bơsong sră nggal bè broă ai màh sồ tiah tam geh tơrmù gam 3 ngai gơwèt mờ màh sồ tiah tam tàm lơgar, mờ 10 ngai gơwèt mờ ală drà kă bro tăc phan mờ lơgar bơdìh, bơh tŭ dờp geh sră nggal. Dơ̆ pe: Màh sồ tiah tam den geh ai dùl bơta phan tam geh đal git tiah bơh dùl ha là uă bă ù, jăt mờ jơnau kờñ bơh ală mpồl lơh broă, cau dùl nă să, hìu nhă ha là mpồl hìu nhă dê. Tiah geh bă ù den geh đal git jăt màh neh geh ai”.

Jăt jơnau geh ai pa, làng bol ha là mpồl lơh broă bal kờñ dan geh màh sồ tiah tam den pal rơcang ală bơta lơi mờ lơh bè lơi, ơ ồng?

Ồng Kiều Văn Cang: “Jăt jơnau geh ai pa, broă ai mờ atbồ màh sồ tiah tam, geh bal màh sồ hìu dăp klơm phan geh lơh den geh lơh jơh tàm internet jăt kơrnoăt pal jăt bơh mpồl lơh broă, cau dùl nă să yal is mờ dờp kơnòl is. Broă do dong kờl tơrmù tơngai, tơrmù priă tă, ƀuơn lơh ală sră nggal mờ ờ gơlik tai sră nggal pa; ai tơl bơta niam nàng ală mpồl lơh broă, cau dùl nă să gàr tơl bơta loh làng, ndrờm bal, geh cồng nha mờ gơdờp mờ bơta geh tàm mùl màl bơh broă lơh sa dê. Bè rơndăp tăp sèng ai màh sồ tiah tam den mpồl lơh broă, cau dùl nă să jào sră nàng dan ai màh sồ tiah tam tus Anih duh broă Làng bol kấp sàh tiah geh bă ù tam (mờ geh bal hìu dăp klơm) bơh Anih yal tơnggit sră nggal Dà lơgar dê.

Gơwèt mờ làng bol mờ ală mpồl lơh broă bal kờñ dan geh màh sồ tiah tam den pal rơcang: lài ngan: rơcang sră dan ai màh sồ tiah tam, yal jăt jơnau neh geh ai lài tàm Bơnah yal tơnggit bơtơl 1 tàm Jơnau lơh nền tàm pơrjum sồ 36 dê. Tàm pang sră do pal geh kơlôi sơnơng mờ cih tơl ală jơnau tơnggit jăt jơnau sồr bơh pang sră neh geh ai. Dơ̆ bàr: Lùp tus Anih duh broă Làng bol kấp sàh, sơnah ƀòn tiah geh bă ù tam hơ̆”.

Broă tam pà kấp, jào gơnăp gơnoar ai Anih duh broă Làng bol kấp sàh in tàm broă lơh sră nggal nàng ai, ai wơl màh sồ tiah tam rơ̆p ai geh bơta ƀuơn bè lơi nàng làng bol lơh broă sa suơn sre càr Gia Lai in?

Ồng Kiều Văn Cang: “Broă jào gơnăp gơnoar ai màh sồ tiah tam Anih duh broă Làng bol kấp sàh in geh cèng wơl uă ngan bơta ƀuơn: Lơh ƀuơn sră nggal, tơrmù tơngai mờ priă tă, ƀuơn lơh sră nggal mờ ai tơl bơta ƀuơn nàng ală mpồl lơh broă, cau dùl nă să, gàr niam broă lơh loh làng, ndrờm bal, geh cồng nha mờ gơdờp mờ broă lơh sa mùl màl tàm sàh dê. Dong kờl phan geh lơh bơh broă lơh sa suơn sre tàm ală tiah ngài mhar geh màh sồ tiah tam tăc mờ lơgar bơdìh jăt gùng tờm nàng tơnguh uă priă geh tơn ai làng bol in. Pơlam ală mpồl lơh broă, cau dùl nă să mờ ală mpồl lơh broă bal, mpồl lơh broă pơgồp bal lơh, lơh gơs ală tiah tam phan tơrgùm bal dờng nàng ai màh sồ tiah tam”.

Ơ ồng. Nàng màh sồ tiah tam geh sùm mờ ờ gơtìp toh wơl, làng bol, mpồl lơh broă bal pal lơh ală jơnau sồr lơi tàm broă lơh, atbồ tiah tam mờ jòi tiah tam?

Ồng Kiều Văn Cang: “Làng bol pal kah cih tiah tam, cih tơl, loh làng ngai tam, sơnka sền gàr mờ tơnhào. Atbồ dà sơnơm: Kwơ màng ngan là phơng sih mờ sơnơm sền gàr phan tam, mìng geh ngui ală bơta phơng bal mờ sơnơm sền gàr phan tam geh tàm khà măt geh ai ngui; lơh jăt nền nòn khà geh ai kung bè tơngai nàng gàr niam ờ uă ir khà jơnkah geh ai. Lơh jăt nền nòn broă sền gròi kòp tàm phan tam: Pal jăt sền mờ rơcang kơrian lài kòp lơh aniai tàm ală tiah tam di gơlan gơlik geh kòp lơh aniai gơwèt mờ phan tam geh sền gròi kòp lơgar Việt Nam bal mờ ală lơgar blơi phan sồr. Lơh jăt jơnau geh ai bè kloh niam phan sa jăt jơnau geh ai bơh lơgar Việt Nam bal mờ jơnau sồr bơh lơgar blơi phan gơwèt mờ ală phan tăc mờ lơgar bơdìh. Lơh jăt nền nòn broă sền gròi, sền tơnơ̆: Lơh broă bal mờ Anih duh broă Làng bol kấp sàh lòt sền jăt tơngai, bơsong nền nòn ală tìs geh ai gŏ tàm broă lòt sền, tơnơ̆ tŭ sền gơwèt mờ màh sồ tiah tam. Bañ ai yòng is, blơi is màh sồ tiah tam; yal di khà tơnhào tàm bă ù dan cih măt nàng drơng tàm broă jòi tiah tam”.

Ơi, dan ưn ngài ồng!

Màh sồ tiah tam ờ mìng do sầu riêng gĭt nền loh anih tờm lơh gơlik mờ gam là dùl tàm ală jơnau sồr nàng tơngguh uă bơta kwơ mờ rề ơnàng drà tăc blơi. Nàng màh sồ tiah tam mùl màl lơh geh cồng nha, kờñ ngan bơta rơcăng lài bơh làng bol dê bal mờ bơta lòt bal, bơto pơlam bơh gah broă mờng lơh mờ gơnoar ătbồ ƀòn lơgar dê.