Là dùl tàm ală hìu lơh lài tam gơl bă ù ờ huan geh cồng nha tus tam tàu bơh nam 2016, tus tŭ do hìu bơnhă ồng Rmah Bun (kòn cau Jrai, ơm tàm ƀòn Kte, sàh Ia Hrú, càr Gia Lai) neh rề ơnàng gơguh tus 7 lồ. Ồng Rmah Bun pà gĭt, tờm tàu ƀươn tam. Dilah sơngka sền gàr niam, cồng nha lơh geh 100 tấn dùl lồ dùl kàl. Mờ giă tăc pơgăp 1 tơlak đong dùl tấn, tơnơ̆ tŭ kờp jơh priă tă lơh, tơl lồ kung gam geh cồng bơh 50 tus 60 tơlak đong sơl, uă rlau is pơndrờm mờ tam tơngời, bùm blàng halà khuah rbài. Ồng Rmah Bun, yal: “Tam tơngời, bùm blàng cồng ờ gŏ geh kàr lơi, ai tàu den gơhờp ù, gơ ai priă lơh geh uă rlau. Tàm kơnhoàl ù tiah sàh HBông yau, ờ tam tàu ngan digơlan kal ke geh tờm chi lơi gơhờp rlau. Nam do, kờp jơh priă tă lơh, hìu añ geh cồng pơgăp 450 tơlak đong. Tus nam tơnơ̆, hìu bơnhă rơcăng apah tai bơh 3 tus 4 lồ nàng rề ơnàng mơya priă lơh sa gam ờ tơl, kơ̆p kờñ Dà lơgar ai càn dong kờl ờ sa priă cồng uă halà dong kờl bơh broă lơh 1719 priă tơrmù rƀah nàng blơi sơntìl, phơng sih bơtàu tơngguh lơh sa bơh tờm tàu”.

Hìu bơnhă ồng Ksor Bớt (kòn cau Jrai, ơm tàm thôn Ia Sa, sàh Ia Hrú, càr Gia Lai) tam 4 lồ tàu. Ồng đơs: Mờr 10 nam đềt mềr mờ tờm tàu, hìu bơnhă ồng neh geh phan sa phan prăp pềr.

“Bơh tam tàu mờ añ lơh geh hìu, ròng 6 nă kòn bơsram gơtus jak chài, tơm bau oh kòn in. Hìu rlau 1 tơmàn đong do Sa tềp rơ̆p thàn lơh sir nàng wă rò Sơnam pa. Jơh ală ndrờm kơnờm tờm tàu lơm. Kàl tus kung kơlôi apah tai ù tam tàu, mơya priă lơh sa gam ờ tơl, kơ̆p kờñ Dà lơgar geh bơnah càn dong kờl ờ sa priă cồng uă dong kờl bal. Añ kơ̆p kờñ dờp geh dong kờl bơh broă lơh 1719 nàng blơi sơntìl mờ phơng sih. Geh priă lơh sa, làng bol rơ̆p bơtàu tơngguh geh lơh sa, ờ gam rƀah tai”.

Ồng Đỗ Văn Hoà, kwang bàng Kông ty Tă pơgồp bal priă Broă lơh sa sươn sre Agris Gia Lai, yal, bơh nam 2016 mpồl lơh sa kă bro neh lơh bal mờ rlau 1 rbô hìu làng bol tàm sàh Ia Hrú tam mờr 2 rbô 900 lồ tàu nrang. Nàng kờñ dong kờl làng bol iang nùs đềt mềr mờ tờm tàu, kông ty lam lơh uă broă lơh dong kờl bơh sơntìl, phơng sih, cau koh tàu tus broă gàr sùm khà giă blơi gơ ơm sùm: “Bơdìh ală broă lơh dong kờl priă lơh sa, kông ty gam blơi mờ giă êt ngan là bơh 1 tơlak đong dùl tấn tàm 3 kàl tus. Hìu măy kung tam pà cau koh tàu, ai rơndeh mŭt tus tơn tàm mìr blơi, làng bol mìng lòt tus sươn jăt sền gời lơm. Tŭ do, pràn păt tàu 8 rbô tấn dùl ngai, mờr gơguh tus 10 rbô tấn dùl ngai den tàng tiah tam tàu nrang kung gam kờñ rề ơnàng sơl. Bol hi rơ̆p pơgồp bal mờ gơnoar ătbồ hòi jà làng bol, ngan là làng bol jơi bơtiàn dồ êt nă cau, tus bal tam tàu nàng bơtàu tơngguh lơh sa, tơn jơh jơgloh tơrmù rƀah”.

Jăt mò Đinh Thị Hoan, Phó Củ tịc Anih duh broă Làng bol sàh Ia Hrú, pơgăp 1 rbô hìu đềt mềr mờ tờm tàu neh geh rài kis tơl ngui tơl sa, mờr bè ờ gam hìu rƀah tai. Sàh gam pơgồp bal mờ mpồl lơh sa kă bro tàu sơdàng kờp sền nền wơl bă ù dipal nàng tam gơl tai; mơkung hòi tơrgùm ală bơnah priă càn dong kờl ờ sa priă cồng uă halà broă lơh dong kờl tơrmù rƀah dong làng bol bơcri priă lơh sa, ngan là mờ tờm tàu. Mò Đinh Thị Hoan, pà gĭt:

“Gơ wèt mờ bơnah priă bơcri broă lơh 1719 dong kờl hìu làng bol jơi bơtiàn dồ êt nă cau, dilah ală hìu bơnhă lơh tàu geh jơnau kờñ, Anih duh broă Làng bol sàh rơ̆p geh broă rơndăp lơh dong kờl blơi sơntìl tàu mờ phơng sih. Bol hi rơ̆p kờp sền nền wơl tơl hìu, tơl kơnhoàl ù tiah; tŭ gĭt nền jơnau kờñ ngan ngồn, sàh rơ̆p lam tam pà priă lơh sa mờ ală bơnah priă dong kờl nàng gàr niam gơnoar kwơ ai tơl hìu bơnhă in”.

Tờm tàu neh tơnggŏ cồng nha lơh sa loh làng tàm bă ù lŭ rơđeh bơrlŭ bal mờ bràs ro kơnrañ ngan, dong gĭt nđờ rbô hìu jơi bơtiàn dồ êt nă cau tàm Gia Lai brồ guh klàs rƀah. Tŭ làng bol jơh nùs lơh ngan, mpồl lơh sa kă bro lòt bal mờ gơnoar ătbồ dong kờl di gùng, tờm tàu ờ mìng gơhờp ù mờ gam pờ gơlik broă lơh broă sa kơnhăp jŏ. Pơn jăt tai ală cồng nha lơh geh do, ală kàl tàu lơngồt tàm tiah jơi bơtiàn dồ êt nă cau càr Gia Lai rơ̆p gam geh tơrbŏ jòng.