Y Tuân Ksor, Ƀí thư Ci ƀộ ƀòn Pa, xã Cư Prao, kơnhoàl M’Drăk, càr Dăk Lăk dê yal: Bơta ù tiah, trồ tiah tàm do ờ gŏ ƀươn bè ală tiah ndai tàm kơnhoàl. Tàu tàm ală xã ndai gơ ai cồng nha 100 tấn tàm dùl lồ là jơnau bè ờs gơ dê, ai tàm do 80 tấn là neh uă ngan gơ ì. Dùl lồ chi keo 7 nam ală tiah ndai geh giă 100 tơlak đong ai tàm do den mìng geh 70 tơlak đong mơ. Ƀòn Pa geh 93 hìu, rlau nggùl khà hìu tàm ƀòn là hìu rƀah. Pơnrơ tàm srơh brồ guh klàs bơh rƀah là ùr bơklau Y Tài Niê. Tŭ do, hìu bơnhă geh 20 lồ chi keo bơh 2 tus 4 nam, mờ 8 lồ tàu. Kàl pa do, 8 lồ tàu lơh geh mờr 600 tấn, tàu geh giă den tàng tơnơ̆ tŭ tơm jơh ală priă tă bơcri neh gơ ai cồng nha rlau 350 tơlak đong. Y Tài Niê pà gĭt, hìu bơnhă bi neh càn priă ngân hàng Nông nghiệp mờ Phát triển Nông thôn dê bơh rlau 10 nam do. Tŭ kờñ blơi phơng sih sền gàr sươn tàu halà blơi sơntìl chi keo, apah cau tam brê den càn priă ngân hàng dê. Tus kàl koh tàu den tơm jơh bal priă tờm mờ priă cồng. Y Tài Niê pà gĭt, geh đau phan bơna rài kis bè tŭ do, dùl bơnah là kơnờm bơh priă ngân hàng dê. Bi Y Tài Niê, đơs: Bơh priă càn ngân hàng dê, làng bol bol hi hơ̆ sồng geh priă nàng bơcri lơh sa. Geh cau càn priă nàng tam tàu, tam chi; geh cau càn priă blơi kơnrồ ròng. Rài kis làng bol tàm ƀòn bol hi dê neh geh uă tam gơl, bơtàu tơnguh rlau uă ngan pơndrờm mờ lài do.

Ồng Y Lhu Byă là kòn cau Rơđê ơm tàm ƀòn Ko Êmông, xã Ea Bhôk, kơnhoàl Cư Kuiñ tŭ do neh geh hìu kwơ̆ niam ngan geh lơh tơn tàm gùl sươn kơphê, sầu riêng tơlir niam ngan. Lài do, bơdìh mờ broă tam kơphê, ồng Y Lhu Byă gam ròng kơnrồ gơguh tus 40 nơm. Lơh sa hìu bơnhă bơtàu tơnguh, oh kòn geh ròng siam lòt bơsram tus gùng tus dà. Ồng Y Lhu Byă, yal: Làng bol bol hi tàm ală ƀòn bơh xã Ea Bhôk, kơnhoàl Cư Kuiñ, càr Dăk Lăk dê. Bơh jŏ bol hi kơnờm tàm priă càn bơh ngân hàng dê mờ bơtàu tơnguh ròng phan bè ròng sur, ròng kơnrồ mờ blơi phơng sih nàng ơn sươn chi tam jŏ nam in. Rài kis làng bol bol hi neh kơ̆ kơl jăp mờ bơtàu tơnguh, dùl bơnah uă ngan là kơnờm tàm priă càn ngân hàng dê.

Dùl nă cau pơnrơ bè lơh pas ai he in mờ jơh nùs ngan dong kờl uă hìu bơnhă ndai tàm ƀòn klàs bơh rƀah, hơ̆ là ồng Y Phơi Buôn Giá, kòn cau M’Nông ơm tàm ƀòn Drên A, xã Dăk Liêng, kơnhoàl Lăk. Ồng Y Phơi geh sươn chi jŏ nam ơnàng tus 15 lồ, tàm hơ̆ geh 10 lồ sầu riêng mờ 4 lồ tiêu neh gơ ai sa. Nam 2020, Y Phơi khin cha càn priă ngân hàng dê 3 tơmàn đong nàng bơcri sền gàr sươn chi jŏ nam mờ tam pa 1 rbô 400 tờm dổi, dùl bơta chi tam pa gơdờp tàm kơnhoàl ù tiah do mờ hơ pơrgon gơ ai priă jền lơh sa uă ngan. Y Phơi pà gĭt, priă càn ngân hàng dê 3 tơmàn đong nam 2020, tŭ do kơnờm tơnhàu sầu riêng den tàng neh tơm geh 2 tơmàn đong rao. Ồng Y Phơi Buôn Giá, đơs: Añ lơh sa bơtàu tơnguh là kơnờm tàm priă càn bơh ngân hàng Nông nghiệp dê. Geh tŭ añ càn ngân hàng gơguh tus 3 tơmàn đong nàng bơcri lơh sa. Priă càn do añ tơrgùm tàm sươn chi jŏ nam in, mìng là tờm sầu riêng lơm. Añ kung dong ală hìu bơnhă tàm ƀòn Drên A, Drên B bè phơng sih nàng ơn chi tam in. Añ ai broă lơh ai 9 nă cau tàm ƀòn in lơh apah sùm gùt nam ai añ in.

Ồng Vương Hồng Lĩnh, Kwang ătbồ Ngân hàng Agribank sơnĕ càr Dăk Lăk, pà gĭt: Tus ngai 31/07/2023, dồs ai càn lơh sa tàm Agribank Dăk Lăk geh 17 rbô 746 tơmàn đong, gơguh 801 tơmàn đong, lơh geh khà gơguh lài 4,7% pơndrờm mờ bồ nam. Ồng Vương Hồng Lĩnh, đơs: Tàm Agribank sơnĕ tàm càr Dăk Lăk neh ai càn rlau 2 rbô tơmàn đong gơ wèt mờ jơi bơtiàn dùl êt nă cau, bal mờ rlau 10 rbô hìu làng bol càn priă. Mờ priă do, làng bol neh geh càn, geh priă tơl nàng drơng lơh sa kă bro kung bè bơcri lơh sa tai. Làng bol neh ngui jak chài măy mok pa nàng tơnguh uă bơta niam phan bơna, tơnguh uă cồng nha lơh geh tàm ală tŭ lơh sa tàm gah lơh broă sa sươn sre brê bơnơm mờ ròng phan. Làng bol neh ngui priă nàng tơnguh uă priă lơh geh. Tàm ală tiah krơi is lòt rê ngài den Agribank neh geh ală anih ai càn ntrờn làm bă tiah mờ rơndeh ô tô mờng ngui. Broă Agribank ai càn priă lơh geh cồng nha mờ bơta niam, dong làng bol tơn jơh jơgloh tơrmù rƀah, mờ klàs bơh rƀah kơ̆ kơl jăp.