Tàm ală dơ̆ mìu jĭt mìu jir lồi sơnam mờ nhơm trồ tiah sùh iò, 2 bơnhă pơs pràn lơh broă 40 tấn dùl dơ̆ pơr bơh Anih tơrgùm blơi phan lơh geh bơh sươn sre Hạnh Phúc tàm sàh Ea Knuếch, càr Dăk Lăk dê lơh broă jơh bơta pràn. Nhơm dà jăt ding gơ dô par guh hơđăng tàm tŭ trồ mìu, bơrlŭ bal săp motô gơlòt sùm. Ồng Châu Phúc, cau tờm anih do, pà gĭt, hìu bơnhă ồng bơcri priă 300 tơlak đong crăp ơn bơnhă pơs do bơh nam 2021, mờ neh lơh geh cồng nha tơl làm:

“Măy mŏk pơr tŭ do neh gơmù uă ngan ñhŭ, thul kơmbuh mờ săp ntas srik, ờ gam gơrềng tus làng bol gùt dar tài bơh nhơm dà geh jun guh hơđăng. Măy mŏk pơr ngui broă lơh gàr gùng: dùl gùng bơh hơđơm guh, dùl gùng bơh hơđăng mù, dong kơphê rañ ring, ờ duh pal soài mờ tê bè lài. Ală tŭ pờ ngui đèng nàng chu ngkàr lơ̆ lơh gơlik geh nhơm duh, tơnơ̆ ală mô tơ puh đèng khồm tàm hơ̆ mờ tam pà ring gùng nhơm duh mŭt tàm bơnhă, dong kơphê rañ ring bal tàm ală tŭ pơr".

Ồng Huỳnh Đình Cường, cau lơh broă sa tam kơphê tàm thôn Tân Thành, sàh Ea Knếch pà gĭt, hìu bơnhă geh 1 lồ kơphê, pah nam lơh geh pơgăp 15 tấn kơphê ris. Lài do, kơphê mìng geh ìs tàm ƀlàng hìu lơm. Mơya, 4 nam rê hờ ndo, kơphê pik tơnhàu cèng rê tus kàr lơi ồng ndrờm pơndiang lòt jun song tơn tus bơnhă pơr. Priă tă pơr pơgăp 700 rbô đong dùl tấn kơphê ris mơya kung gam geh cồng sơl uă ngan pơndrờm mờ broă ìs ƀlàng tìp mìu, khà gar jù, bŭt bơsềt uă, gơtìp anih blơi tơrmù priă brih bơm: “Bàr pe nam do ngui drơng broă sa priă pơr, añ gŏ bơta niam kơphê kung niam sơl, kung ndrờm bal sơl mờ ìs tơngai ờs mờng bơh yau. Ìs den pal tìp trồ mìu, ai mìu là pal kong nđan bè lơi. Tàm tŭ hơ̆, pơr ƀươn ƀoài rlau tŭ mìu jŏ jòng, kơphê gar rañ ndrờm, ờ gơtìp bŭt bơsềt, gơmù hoàc”.

Jăt ồng Nguyễn Tiến Dũng, Phó Kwang Lam bồ dờng Kông ty Kong kơnòl nă să is Tăc mờ lơgar ndai 2- 9 Dăk Lăk, mpồl lơh sa kă bro gam lơh bal mờ rlau 80 rbô hìu làng bol tàm tiah tam phan, broă tam gơl bơh ìs ƀlàng tus pơr geh kwơ loh làng, lơh geh bơta niam mờ bơta ring ndrờm bal bơh kơphê gar tăc mờ lơgar ndai dê. Ồng Dũng đơs là, dilah broă bơcri priă blơi bơnhă pơr geh lơh ndrờm bal mờ broă lơh ală tiah tam phan mờ geh broă dong kờl bơcri priă dipal, den rơ̆p lơh geh cồng nha tơl làm rlau: “Bol he pal lơh ală kơnhoàl ù tiah pơr kơphê tơrgùm bal, mờ geh broă lơh dipal nàng dong làng bol là kờñ ngan gĭt lơh. Tàm do, làng bol gơtùi tăc tơn, kĭ pơyoa halà tàm pơgơl phan bơna. Bơh hơ̆ lơh gơlik geh anih lơh kơphê gar ndrờm bal, bơta niam uă rlau, lơh geh jơnau kờñ tăc mờ lơgar ndai ngai sơlơ kal ke ngan”.

Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, bulah kàl lơh sa kơphê nam do gơ ơm di tàm tơngai mìu uă, mìu càl rbŭt dờng dà tih dà lìu…mơya ală tiah kơphê tàm càr kung gam gàr geh pik tơnhàu dum rlau 85%. Ală bơnhă pơr tàm ală ƀòn lơgar neh pơgồp bơnah gàr geh bơta niam, gơmù uă ngan hoàc hươr tơnơ̆ tơnhàu. Gah broă lơh sa sươn sre gam jơh nùs dong kờl cau tam lơh ală tiah pơr tơrgùm bal, pa tàm ală tiah kơphê uă.

“Bol he gam lam lơh ală broă lơh jăt Jơnau lơh nền cíñ phủ dê sồ 98 nàng kờñ dong kờl cau làng bol, mpồl lơh sa kă bro mờ mpồl lơh broă bal bơcri priă phan bơna drơng ală anih lơh bal, bơh hơ̆ tơngguh uă pràn jak lơh gơs kơphê ai cau tam in. Tŭ do, uă măy mŏk pơr pa jak chài ngan neh mờ gam geh ngui, lam lơh làm uă, pơgồp bơnah gàr niam gar kơphê geh pơr ndrờm bal, geh bơta niam mờ lơh geh wil tơl ală jơnau sồr tăc tàm lơgar kung bè tăc mờ lơgar ndai”.

Bulah priă tă bơcri bơh chờm uă ngan, mơya bơnhă pơr kơphê măy mŏk pa gam lơh geh cồng nha loh làng, ngan là tàm bơta mìu uă, trồ tiah nisơna bè tŭ do. Mờ do ngan là bơta gơn kơnờm pràn kơldang ngan rlau jơh, ai tơl bơta ală hìu làng bol lơh broă sa, mpồl lơh sa kă bro pơn jăt tai bơcri priă. Bơh hơ̆, gah kơphê Dăk Lăk rơ̆p gơmù roh rui hoàc hươr, tơngguh uă bơta niam, lơh geh ală jơnau kờñ bè giă tăc blơi, măt kă bro mờ kơnhăp jŏ.