Cau ròng phan mìng ngui ală cế phẩm siñ họk geh ai gơnoar ngui tàm lơgar Việt Nam nàng bơsong phan ƀơ̆ sang bơh ròng phan.

1. Bơsong dà ƀơ̆ tuh bơh ròng phan

Dà ƀơ̆ tuh bơh ròng phan (phan puan jơng, phan bàr nơm jơng) geh ală phan lơh bơtờp kòp, bè vi khuẩn, vi rus, phan kis kơnờm, bơsềt....mờ geh khà ală phan hữu cơ uă, ƀươn ngan lề, lơh gơlik bơta ƀô ồm ngan mờ khih jơlai ai kòn bơnus mờ phan ròng in.

Broă ngui: Jăt jơnau bơto pơlam ngui bơh cau lơh gơlik dê: Rơsìh halà ƀồm cế phẩm siñ họk tàm dà kờñ pal bơsong. Cế phẩm siñ họk gơguh mhar ală tŭ gơkram; tơnguh uă cồng nha bơsong dà ƀơ̆ tuh bơdìh, lơh jơh bơta ƀô ƀơ̆; tam pìt, lơh kơryan ală phan kis dềt lơh aniai; lề mhar ală phan hữu kơ tàm dà tuh bơdìh.

2. Bơsong dà ƀơ̆ tuh bơh ròng phan

Bơta ƀô bơh phan ƀơ̆ tuh bơh broă ròng phan geh uă mìng bơh è, dà đồm mờ phan ròng chơ̆t dê.

Broă bơsong: Jăt bơto pơlam ngui bơh cau lơh gơlik dê: Rơsìh halà ƀồm cế phẩm siñ họk tàm tiah kờñ pal bơsong, gơtùi klài bal cế phẩm siñ họk tàm phan sa, dà hùc ai phan ròng in, cế phẩm siñ họk lơh lề ală phan nhơm geh bơta ƀô ƀơ̆ (H2S, NH3, amine ƀươn gơ dô nhơm...) mờ ală nhơm khih jơlai ndai.

3. Bơsong è mờ dà đồm phan ròng dê

Khà è bơh phan ròng dê è pah ngai uă ngan, kờp bal 10 kĭ dùl nơm kơnrồ; 15 kĭ dùl nơm rơpu; 2 kĭ nggùl dùl nơm sur; 0,2 kĭ dùl nơm iar ada... Tŭ do, ròng phan tơrgùm bal uă neh ngui măy mok bơsong phan ƀơ̆ tuh bơdìh jak chài pa rài do bè tơrdih è gơ gơs pơnai. Gơwèt mờ ală phan ròng ndai, kờñ pal khòm tơrgùm, bơsong è, dà đồm phan ròng, mùl màl, bè do:

Jơm siñ họk

Ngui cế phẩm siñ họk ƀồm halà rơsìh tềng è phan ròng lài mờ tŭ jơm nàng tơn rŭc lơyah tŭ tơngai jơm, tơrmù ală phan khih jơlai, gơdram kòp, ờ lơh gơbàn ƀơ̆ ƀơl tiah ơm kis, tơnguh bơta tơl pràn gơ jồp gơ sa bơh chi tam dê.

Broă jơm: Bơh sơnrờp klài ring bal ală phan nàng jơm bè è phan ròng, chi che, sồ siă hữu kơ...(ờ kờp dà sơnơm EM), tơnơ̆ hơ̆ rơsìh tơl tăp phan nàng jơm pơgăp 15 phơng, tuh dà sơnơm EM. Trơ̆p dùl pang waltăng nilông tềng đah hơđang. Tơnơ̆ bơh 2 tus 3 poh, crài mờ klài ring bal gơnru jơm nàng lơh mhar ală tŭ lơh lề. Ală tŭ jơm lơh sir tơnơ̆ tŭ crài, klài mờ jơm tai pơgăp 2 poh. È tơnơ̆ tŭ jơm ngui ơn ai chi tam in.

Phan dă siñ họk

Phan ngui nàng lơh phan dă: Lơ̆, ƀòk kơ, ƀòk dơm chi lề, ngkàr khoah phòng, nsồp lơ u, ngkòng tơngời, rơhe ro...

Phan ngui nàng lơh phan dă ndai: trŏ dà sơdàng, ƀòk tơngời...(gơ jăt tàm bơta cế phẩm siñ họk).

Wàng ròng: Dilah lơh phan nàng dă ndơ̆p tàm măt ù pal ờ gŏ di gơmŭt dà, dilah bơnàng wàng ndrờm halà jơnhoa rlau mờ măt ù, pal geh kơlik căng nàng phan dă ờ gơ pơrdô. Gơwèt mờ sur, niam ngan rlau jơh là lơh bơnàng wàng 2 cờñ, cờñ dơ̆ dùl lơh phan dă, geh tus pơgăp 2 bơnah pe bơta ơnàng bơnàng wàng, lơyah rlau cờñ 2 pơgăp bơh 15 tus 20 phơng (tơnơ̆ tŭ dă phan dă) là tiah sur sa, sur ñô dà.

Bơta lơ ŭt phan dă: gơwèt mờ iar là bơh 7 phơng; mờ sur, kơnrồ là bơh 30 phơng.

Ală broă lơh

Broă lơh gơlik dà kañ: Jăt bơto pơlam ngui bơh cau lơh gơlik dê.

- Broă lơh dơ̆ dùl: Rơsìh nggùl phan ngui nàng lơh phan dă tàm bơnàng wàng.

- Broă lơh dơ̆ bàr: Rơsìh halà tuh ring bal nggùl dà kañ tàm dùl dà kañ.

- Broă lơh dơ̆ pe: Pơn jăt tai rơsìh phan ngui nàng lơh phan dă tus bơta lơ ŭt pal geh (digơlan là bơh 1 tus 2 tăp, dipal mờ tơl nơm phan ròng), rơsìh mờ ƀồm bal dà sàng goh ring bal tềng đah hơđang tus dì tŭ lơh geh bơta sùh iò 30%. Pal sền ngăc tŭ ƀồm dà pal ngui chi kàu crài nàng sùh iò ring bal (tŭ gŏ phan ngui lơh phan dă gơ gơs mờr jù, păt ngan phan ngui lơh phan dă gơlơh bè geh dà gơ mŭt sùh ir tàm tê mơya phan ngui lơh phan dă kung gam rài nsồp là lơh geh di jơnau sồr).

- Broă lơh dơ̆ puan: Tuh ring bal dà kañ gam wơl tềng phan dă.

- Broă lơh dơ̆ pram: Rơpoa ring bal jơh ală măt tăp phan dă.

- Broă lơh dơ̆ prao: Ndơl ndơ̆p jơh măt hơđang mờ waltăng halà pang nilông.

- Broă lơh dơ̆ poh: Lời gơlik kañ bơh 3 tus 5 ngai. Kuài jrô tus (30 phơng gơwèt mờ phan dă ai sur in) gŏ ram duh, ờ gam ƀô tai phan ngui lơh phan dă là lơh di jơnau sồr.

- Broă lơh dơ̆ phàm: Tă sơrbì waltăng jơm, kuài đah hơđang (jrô 20 phơng gơwèt mờ phan dă ai sur in) nàng gơ in rài nsồp, lời càl in hềr tơnơ̆ 1 ngai hơ̆ sồng tơngklàs phan ròng.

    Pal kah ngui mờ sền gàr phan dă

-  Bañ lời sùh phan dă (Lơh bòng dơng dà tềng hơđơm jơnồr dà pờ is nàng pleh dà gơ hòr mŭt tàm phan dă, ờ lời gơprañ dà mìu...).

- Lơh geh bơta kwèng ai phan ròng in ờ đồm è bal tàm dùl anih.

- Gàr sùm bơta sùh iò bơh phan dă dê (pơgăp 30%) nàng kờñ lơh geh uă ngan rlau jơh ai bơta lơh gơlik gơs kañ lơh lề è niam. Tŭ phan dă gơtìp sùh pal bơtơl tai phan dă rañ. Tŭ phan dă gơtìp rañ ir pal ƀồm sùh iò.

- Pal gàr geh bơta rài nsồp bơh phan dă dê.

- Sền gùt dar: È pal geh bồr tơ̆p niam tài bơh broă lòt rê bơh phan ròng dê. Dilah sền gŏ è uă dùl anih pal dong phan ròng bồr tơ̆p.

- Sền gàr phan dă: Sền mờ sền swì bơta ngui bơh phan dă dê niam halà ờ nàng bơtơl phan bơrlŭ mờ cế phẩm kañ.

- Ờ gŏ di ƀồm dà sơnơm lơh kloh khuẩn tềng đah hơđang tăp phan dă dê. Tŭ phan ròng gơtìp kòp, pal sơm kòp jăt jơnau sồr bơh gah lơh sơnơm phan ròng dê.