Broă lơh tơrlòng lài geh lam lơh tàm sàh Krông Buk. Tàm kờp jơh bă ù ơnàng pơgăp 150 lồ sầu riêng, Kông ty Kong kơnòl nă să is Broă lơh sa sươn sre Măy mŏk pa Hồng Thuận neh lơh tơrlòng lài bơsong plai ờ di kàl rlau 15 lồ mờ neh geh kàl plai bơh sơnrờp, digơlan tơnhàu tàm nhai 03 do. Jăt cih dờp tàm anih lơh sa sươn dờng, tờm sầu riêng nam dơ̆ 7 gơ ai bơh 25 tus 35 nơm plai, cồng nha lơh geh pơgăp 90 tus 110 kĭ dùl tờm, ndrờm mờ pơgăp 12 tấn plai dùl lồ.

Tus bal mpồl lơh broă, Phó Pơgru dờng, Tiến sìh ồng Nguyễn Văn Minh, Lam bồ Gah Broă lơh sa sươn sre, Hìu bơsram Đại họk Tây Nguyên pà gĭt, giă sầu riêng plai ờ di kàl tăc mờ lơgar ndai tŭ do pơgăp 160 rbô đong dùl kĭ, jơnhoa mờr bàr dơ̆ kàl tờm. Bulah cồng nha lơh geh plai ờ di kàl dồ êt rlau mờ kàl tờm, mơya kơnờm bơta bơkah mờ giă tăc jơnhoa, cồng nha lơh sa bơh broă lơh tơrlòng lài dê kung gam uă ngan sơl.

Bè đah mpồl lơh sa kă bro cau tờm bơcri priă broă lơh tơrlòng lài, ồng Vũ Văn Cần, Kwang Lam bồ Kông ty Kong kơnòl nă să is Broă lơh sa sươn sre măy mŏk pa Hồng Thuận pà gĭt, wèt tus tam gơl pa gah phan, mpồl lơh sa kă bro crăp rơcăng bơcri priă uă. Bulah bè hơ̆, kung ndrờm bè uă ngan sầu riêng tàm Dăk Lăk sơl, tài bơh geh tam bơrlŭ bal mờ kơphê, kau su den tàng ờ geh pà màh sồ tiah tam, lơh gơbàn kal ke uă ai gơn kơnờm bơtàu tơngguh tăc mờ lơgar ndai in. Broă do kờñ pal geh ală kâp geh gơnăp gơnoar sền swì. Jăt ồng Nguyễn Hắc Hiển, Lam bồ Ci Kụk Tam phan mờ Sền gàr phan tam càr Dăk Lăk, do là gơkòl dờng ngan gơ wèt mờ gah sầu riêng càr dê: “Jăt Jơnau lơh nền sồ 38 nam 2026 Cíñ phủ dê neh ai lơh jăt mơya ờ hềt geh ai ngui bè ătbồ màh sồ tiah tam den ală bă bè do là ờ geh pà màh sồ tiah tam, tài tam bơrlŭ bal là ờ gơtùi. Mờ tŭ do, mpồl lơh broă sền swì jăt sền là kwang àng, cau mŭt cau lơh den là kal ke ngan. He tìs là ờ gơtùi”.

Tơnơ̆ tŭ iăt jơnau đơs tă pơgồp bơh mpồl lơh sa kă bro mờ anih lơh broă mờng lơh, ồng Đỗ Hữu Huy đơs broă lơh tơrlòng lài sầu riêng plai ờ di kàl là gùng lòt pal pơn jờng ngan. Khà sầu riêng lơh geh bơh Dăk Lăk dê gam gơguh mhar mờ digơlan lơh geh tus 1 tơlak tấn, tơrgùm tàm pơgăp 03 nhai kàl tờm digơlan lơh gơbàn kơn jơ̆ uă ai broă tăc blơi mờ logistics in. Tài bè hơ̆, broă bơtàu tơngguh sầu riêng plai ờ di kàl ờ mìng dong tơngguh uă cồng nha lơh sa mờ gam pơgồp bơnah tam pà wơl tơngai tơnhàu, tơrmù kơn jơ̆ jun pơndiang phan kă bro. Ồng sồr ală cau jak chài pơn jăt tai lòt bal mờ mpồl lơh sa kă bro nàng sền swì cồng nha lơh geh, bơta niam, lơh sir ală broă pơlam lơh bơta chài mờ kơlôi sơnơng jơnau tơl pràn rề ơnàng lơh uă tàm tŭ tơngai tus. Đơng lam càr kung tơngkah broă lơh dipal ală jơnau yal tơnggĭt gah phan tàm bơta tam gơl sồ gam geh lơh pràn.

Dăk Lăk tŭ do geh rlau 30% khà kơphê mờ sầu riêng lơh geh bơh jơh gùt lơgar dê, bulah bè hơ̆ priă geh bơh tăc mờ lơgar ndai 2 gah do dê cih gŏ tàm ƀòn lơgar mìng geh wơl pơgăp 23% gời lơm. Den tàng bè hơ̆, Tơrgùm ală mpồl sầu riêng, Tơrgùm ală mpồl Kơphê bal mờ ală mpồl lơh sa kă bro mờ anih lơh broă ătbồ pal pơgồp bal kờp sền nền wơl, yal tơnggĭt jơnau wil tơl mờ dipal rlau bè ală broă lơh gơlik gah phan, lơh bơnàng jă ai broă lơh ătbồ mờ rơndăp nền gùng dà broă lơh.

Gơ wèt mờ ală gơkòl gơrềng tus màh sồ tiah tam, ồng Huy sồr ală anih lơh broă mờng lơh pơn jăt tai tơrgùm wơl, lơh sir sră nggal mờ dan mờ ală ƀộ, gah Dà lơgar nàng sền swì tă bơsong: “Bè đah gơnoar ătbồ den pal pơn jăt tai geh jơnau dan; pơn jăt tai jà Ƀộ Phan kwơ geh is mờ Tiah ơm kis mŭt sền. Mờ dơ̆ bàr là rơcăng ală jơnau yal wil tơl, ală broă rơndăp lơh, ngan là dơ̆ do tĕ khà Quôk hội tai, pal đơs mờ ală cau tơlik măt tĕ khà tàm Dà lơgar mŭt, nàng gĭt lài broă gơlik geh. Hơ̆ sồng mờr tus pơrjum Quôk hội, digơlan geh ală jơnau lơh nền cíñ phủ dê geh ai tơlik nàng tă pơgồp jơnau đơs”.