Tàm sàh Măng Ri, ngai sơlơ uă bơyô kơnòm să sơnđờm mŭt lơh broă bơh tờm kơnuh sơnơm Ngọc Linh. Bi A Lêm, đoàn viên tàm thôn Long Láy 2, sàh Măng Ri neh tam rlau 400 tờm kơnuh sơnơm Ngọc Linh bơh nam 2020. Kơnờm kong kal ke lùp bơsram, ngui măy mŏk, sươn kơnuh sơnơm bi dê hòn dờng ring ndrờm, bàr pe tờm neh gơ ai sa.

Bi A Lêm pà gĭt, kơnuh sơnơm Ngọc Linh là bơta chi kal ke tam. Tờm mìng hòn dờng niam tềng hơđơm mƀur brê kra, tàm bơta jơnhoa bơh 1 rbô 200 thơk rlau hơđăng. Cau tam pal tơryăng tơryồng, kơrhia ngan tàm tơl broă sơngka sền gàr:

"Gơ wèt mờ tờm kơnuh sơnơm Ngọc Linh, kwơmàng là he pal geh bơta tơryăng tơryồng, kong kal ke lùp bơsram mờng chài bơh ală cau bi, ală cau mi, ală cau lòt lài, ală cau neh lơh gơtùi lài. Lùp bơsram mờng chài, tus bal bơsram uă ơdŭ bơsram tàp nàng khi bơto pơlam, ngui jơh bơnah priă lơh sa he geh mờ càn tai nàng tam bơta chi do”.

Tŭ do, uă đoàn viên ơruh pơnu tàm ală sàh Măng Ri, Tu Mơ Rông, càr Quảng Ngãi (lài do gơ wèt mờ kơnhoàl Tu Mơ Rông, càr Kon Tum) tơrgùm bơtàu tơngguh lơh sa bơh tờm chi lơh sơnơm. Làng bol ƀòn lơgar gam bơtàu tơngguh tai ală bơta chi tam ndai bè kơphê, kơnuh sơnơm đẳng gam geh hòi là kơnuh sơnơm jriang, poh ziệp dùl ntê bơkàu. Uă bơyô kơnòm să ngui priă càn bơh Anih priă jền Dong kờl cau rƀah nàng bơcri tam kơnuh sơnơm. Bàr pe broă lơh tơrlòng lài bơh chờm cèng wơl cồng nha, dong cau kơnòm să geh tai priă lơh geh, kơ̆ kơl jăp rài kis.

Tus tŭ do, ală mpồl lơh sa kă bro tam kơnuh sơnơm pơgồp bal mờ ală cau jak chài bơto pơlam bơta chài tam, sơngka sền gàr mờ sền gàr tờm kơphê, pơgồp bơnah tơngguh uă cồng nha tam phan. Ồng Nguyễn An, Kwang Lam bồ Kă bro phan Kông ty Bơcri priă bal VinGin pà gĭt, mpồl lơh sa kă bro ồng dê neh ai tơl bơta dong kờl ơruh pơnu rơcăng lài ngui jak chài – măy mŏk, ngui gơguh jak măy mŏk tàm lơh sa:

“Bol hi ờ mìng ơm wơl tàm broă ai pà chi sơntìl mờ rơ̆p lòt bal mờ ală bơyô tàm ală tŭ sơngka, sền gàr. Bol hi rơ̆p dong kờl ală bơyô, is ồn là ală bơyô geh bơta chài, geh bơsram ală jơnau gĭt wă pa ngan rlau jơh, ală jơnau kơlôi lơh, broă lơh bơsong nàng kờñ bơtàu tơngguh, kơlôi sơnơng; bal mờ hơ̆ là bàr pe phan ngui ndai nàng dong ală bơyô gĭt loh rlau”. 

Bơtàu tơngguh chi lơh sơnơm, tàm hơ̆ rề ơnàng bă ù tam kơnuh sơnơm Ngọc Linh là gùng lòt pa geh cih loh tàm Jơnau lơh nền tàm pơrjum bơh Pơrjum dờng Đảng ƀộ sàh Măng Ri tơngai lơh broă tơngai bơh nam 2025 – 2030. Sàh gơ wèt tiah tờm kwơmàng bơtàu tơngguh kơnuh sơnơm tàm Quảng Ngãi. Tŭ do, gơnoar ătbồ ƀòn lơgar gam dong kờl làng bol rề ơnàng bă ù tam kơnuh sơnơm, gơhòi gơ jà mpồl lơh sa kă bro bơcri priă lơh gơlik phan, pơgồp bơnah tơngguh uă bơta kwơ phan bơna. Ồng Phạm Xuân Quang, Củ tịc Anih duh broă Làng bol sàh Măng Ri đơs nền, bơtàu tơngguh tờm kơnuh sơnơm pal gơ jăt bal mờ sền gàr brê:

“Broă rề ơnàng bă ù rơ̆p lơh gơlik khà phan nàng hòi jà, gơhòi gơ jà mpồl lơh sa kă bro, cau bơcri priă tus lơh gơlik, lơh gơlik phan, lơh geh phan bơna, tơngguh uă bơta kwơ măt kă bro bơh kơnuh sơnơm Ngọc Linh dê. Nàng rề ơnàng mờ bơtàu tơngguh, lơh geh tiah dipal ai kơnuh sơnơm Ngọc Linh in hòn dờng, pal tam brê, bơtàu tơngguh bă brê mờ prăp gàr brê. Mơkung mblàng yal làng bol in tàm broă ătbồ, sền gàr, sơngka sền gàr brê gơ jăt bal mờ bơtàu tơngguh kơnuh sơnơm Ngọc Linh mờ ală bơta chi lơh sơnơm ndai”.

Tàm sàh Tu Mơ Rông, gơnoar ătbồ ƀòn lơgar pơgồp bal mờ mpồl lơh sa kă bro pà chi sơntìl ai đoàn viên, ơruh pơnu in, lơh geh broă lơh broă sa mờ chồl pràn bơtàu tơngguh lơh sa. Tus tŭ do, sàh do hòi jà geh rlau 100 rbô tờm kơphê sơntìl mờ rlau 800 kĭ gar sơntìl nàng pà dong làng bol in. Ồng Võ Trung Mạnh, Ƀí thư Đảng ủy sàh Tu Mơ Rông pà gĭt, nàng jơnau lơh nền tàm pơrjum lòt mŭt tàm rài kis pal bơ̆t bơtàu broă lơh tơrlòng lài mùl màl nàng bơto pơlam làng bol lơh jăt:

"Mpồl mờng lơh broă măy mŏk sùm lòt sền swì, bơto pơlam làng bol tam, sơngka sền gàr mờ sền gàr tờm kơnuh sơnơm Ngọc Linh nàng kờñ sền gàr ală kơnuh sơnơm tờm, bơtàu tơngguh tàm ƀòn lơgar do. Đảng ủy sàh Tu Mơ Rông kung lơh tơnggơs ală mpồl sùm lòt tus tơl sươn kơnuh sơnơm nàng sền swì, bơto pơlam mờ chồl bơtrồl làng bol sơngka sền gàr, bơtàu tơngguh kơnuh sơnơm”.

Bơh ală broă lơh tơrlòng lài mùl màl, di mờ bơta geh ngan, Jơnau lơh nền tàm pơrjum Đảng dê tàm tiah bơnơm càr Quảng Ngãi ờ ơm wơl tàm sră pơ àr mờ neh gơ lòt mŭt tàm rài kis. Tŭ làng bol wờng, làng bol dòn mờ lơh jăt, jơnau kờñ bơh Jơnau lơh nền tàm pơrjum dê gơgơs gơn kơnờm kwơmàng, ai tơl bơta tiah jơnhoa bơtàu tơngguh kơnhăp jŏ.