Tus lồi nam 2023, càr Dăk Lăk geh mờr 32 rbô 800 lồ sầu riêng, tàm hơ̆ geh 15 rbô 852 lồ gam tàm tơngai gơ ai sa, plai lơh geh rlau 281 rbô tấn, gơguh rlau 90 rbô tấn pơndrờm mờ nam 2022, ndrờm mờ khà gơguh mờr 50%. Kờp tàm jơh gùt lơgar, càr Dăk Lăk gam ơm dơ̆ dùl bè bă ù mờ khà gơguh, ơm dơ̆ bàr bè khà sầu riêng lơh geh. Bal mờ bơta kwơ lơh sa, gah phan sầu riêng gam cèng tus ai càr Dăk Lăk in ală bơta kwơ niam chài nùs nhơm, tŭ neh bơyai lơh geh cồng nha Lơh chờ sầu riêng dơ̆ sơnrờp tàm kơnhoàl Krông Păch mờ gam rơcăng bơyai lơh Lơh chờ sầu riêng dơ̆ 2.

Ala măt Sở Nông nghiệp mờ Phát triển Nông thôn càr Dăk Lăk yal bè gah phan sầu riêng càr dê, ồng Nguyễn Hắc Hiển, Phó Ci Kụk Tam phan mờ Sền gàr phan tam càr Dăk Lăk pà gĭt, bal mờ bơta lơh bal, lơh broă bal ngai sơlơ geh kwơ ngan đah cau lơh broă sa, mpồl lơh sa kă bro, ală mpồl kơlôi sơnơng mờ anih lơh broă ătbồ Dà lơgar dê, nàng bơtàu tơnguh kơ̆ kơl jăp gah phan sầu riêng, càr Dăk Lăk neh lam ală mpồl bơsram bơta mờng chài bơh lơgar ndai, tàm hơ̆, geh lơgar Thái Lan, dà lơgar tăc sầu riêng mờ lơgar ndai uă ngan rlau jơh dunia. Jăt ồng Nguyễn Hắc Hiển đơs, tàm khà uă mờng chài gơtùi ngui tàm càr, Dăk Lăk rơ̆p sền gròi uă ală mờng chài bè ătbồ bơta niam gah phan. Ồng Nguyễn Hắc Hiển, đơs: Tŭ do, Thái Lan neh tơnguh is jơnau sồr bơnah phan ro bơh sầu riêng dê bơh 32% gơguh tus 35%. Mŭt tàm kàl tơnhàu den mờr bè tàm jơh ală tiah tam, ală cau tờm sươn pal sền swì bơta niam bơh phan bơna dê. Bal mờ hơ̆, ală anih lơh broă ătbồ dà lơgar kung tus ai khăt dồ êt phan sầu riêng tàm ală tiah tam mờ anih ơn prăp tàm kơldung nàng sền swì bơta niam sầu riêng neh geh tơl halà ờ hềt. Do là broă kwơmàng ngan, geh mờ geh drà blơi là lơgar Lo wă rò ngan.

Bulah sầu riêng neh gơgơs là dùl tàm tờm chi tam tờm geh cồng nha ngan, gơhòi gơ jà priă jền bơcri uă bơh cau lơh broă sa dê mờ bơta sền gròi bơh gơnoar ătbồ ală kâp dê, mơya do kung là gah phan gam uă broă ờ pràn, bè bơta chài tam, sơngka sền gàr, pik tơnhàu gam ờ hềt dipal; broă ătbồ màh sồ tiah tam, màh sồ anih ơn prăp tàm kơldung gam uă bơta ờ hềt dipal; bơta tam pìt blơi, tam pìt tăc, lơh aniai sră hơ kă bro kung gam geh uă tàm ală tiah sầu riêng càr dê tàm pah kàl tơnhàu. Nam 2023, sầu riêng càr Dăk Lăk geh giă lơh sa pơgăp 16 rbô tơmàn đong, ndrờm mờ pơgăp 660 tơlak dolar Mỹ, mơya Sở Kông thương càr Dăk Lăk mìng cih dờp priă geh bơh tăc mờ lơgar ndai rlau 100 tơlak dolar Mỹ. Bơta do pà gŏ ală bơta pal geh nàng tăc tơn mờ lơgar ndai sầu riêng bơh càr Dăk Lăk là ờ hềt ƀươn ƀoài.

Tềng đăp ală broă gam gơgơs jơnau kơryan bơh gah phan bềng bơta gơn kơnờm bơtàu tơnguh do dê, ồng Nguyễn Thiên Văn, Phó Củ tịc Ủy ƀan Ñân zân càr Dăk Lăk pà gĭt, càr rơ̆p tă bơsong rơhời, sơnđờm bơh bơta lơh is mờ lơh broă mờng chài bơh cau lơh broă sa sầu riêng dê. Ồng Nguyễn Thiên Văn, đơs: Lài ngan là mblàng yal ai làng bol in, ngan là tàm tiah tam uă sầu riêng, bè jơnau gĭt wă sền gàr phan tam mờ jơnau gĭt wă bè sền gàr niam sàng goh phan sa gơ wèt mờ plai sầu riêng. Dơ̆ bàr là lơh geh màh sồ tiah tam mờ jăt sền gơtùi broă tam sầu riêng tàm tiah tam. Gơ wèt mờ ală anih ơn prăp tàm kơldung, den pal tơrgùm lơh geh bơta tàm lơh bal đah tam, pik tơnhàu, lơh gơlik phan, ơn prăp mờ tăc phan bơna. Mờ bơta jơh nùs lơh ngan bơh càr Dăk Lăk dê mờ bơta dong kờl bơh Ƀộ Nông nghiệp mờ Phát triển Nông thôn dê den ală broă do rơ̆p rơhời geh bơsong tàm tơngai tus.