Ơ ồng, càr Dăk Lăk gam là càr geh bơta tìm bơh brê ờ uă ngan tiah Tây Nguyên mờ ờ uă rơlao mờ bè ờs bal gùt lơgar dê. Do là tài broă tam brê gam ờ hềt geh sền gròi di pal ngan bè hơ̆ lah ờ ơ ồng?

Ồng Nguyễn Quốc Hưng: “Càr Dăk Lăk geh bơta tìm bơh brê ờ uă tài ală bă ù ring, niam càr Dăk Lăk dê ơnàng ngan tiah Tây Nguyên dê. Geh bal ù tàm kơnhoàl Ea Súp ờ di là ù pơrhê bazan, mơya ring niam mờ tam phan geh ƀuơn ngan. Bơdìh hơ̆ tai, làng bol kis ntrờn khăt gơboh mìng tus tàm càr Dăk Lăk, tŭ do gam kal ke ngan. Nàng ơm kis mờ lơh broă den ù kung geh bơh brê. Dơ̆ bàr là broă tam brê tŭ do bơcri priă bơh dà lơgar dê ờ geh. Mìng geh priă tam bơtơl brê jăt bă brê tam gơl kờñ ngui ù brê, bă brê do dùl bơnah ờ uă ngan. Bơcri priă dà lơgar ờ geh, ală rơndăp broă lơh ODA kung ờ geh, bơcri priă tam brê priă FDI kung ờ geh. Kờñ bơtàu tơnguh brê kal ke ngan”.

Càr Dăk Lăk geh git nđờ jơ̆t kông ty lơh sa suơn sre brê bơnơm, atbồ khà ù uă ngan (mờr 220 rơbô lồ). Broă kông ty tam brê bè lơi ơ ồng?

Ồng Nguyễn Quốc Hưng: “Tam brê tŭ do mìng kơ̆p tàm ală kông ty lơh sa suơn sre brê bơnơm bal mờ làng bol, mơya ală gùng dà broă lơh jăt bal mờ ndrờm. Ală anih lơh sa brê bơnơm tŭ do priă ờ geh, ờ gơtùi tam brê”.

Tàm bơta gơtìp uă kal ke bè hơ̆, càr Dăk Lăk bơsong bè lơi mờ cồng nha neh geh bè lơi tàm git nđờ nam pa do ơ ồng?

Ồng Nguyễn Quốc Hưng: “Anih duh broă Làng bol càr Dăk Lăk neh geh Jơnau lơh nền sồ 1237 ngai 24 nhai 05 nam 2021 bè broă rơndăp tam brê mờ tam chi tơngai bơh nam 2021 tus 2025 là 7 rơbô 268 lồ ù. Tus tŭ do mìng rơ̆p là nhai 09 nam 2024 den neh tam geh 12 rơbô 582 lồ ù. Nam 2024 do, kung rơ̆p tam sơrlèt mờ broă rơndăp geh ai, di gơlan broă tam brê geh di pơgăp bơh 2 rơbô 500 tus 3 rơbô lồ ù pơn drờm mờ broă rơndăl lơh neh geh ai là 1 rơbô 817 lồ. Do hơ̆ sồng là tam brê, gam tam chi tam cah is là pah nam tam geh 200 rơbô tờm. Ală nam pơn jăt tai bol añ ndrờm tam geh mờ sơrlèt mờ broă rơndăp lơh neh geh ai”.

Bă brê gơtìp mus kơl, sơgràm lài do uă ngan (bè càr Dăk Lăk kờp geh di pơgăp 128 rơbô lồ), càr geh broă lơh lơi nàng bơsong, tam wơl uă brê ơ ồng?

Ồng Nguyễn Quốc Hưng: “128 rơbô lồ do neh jŏ bloh, di pơgăp 20 nam bloh, ờ gŏ di pa, bol añ ờ gơtùi tam wơl jơh. Di lah bol he đơs sùm là gàr ù nàng lơh sa brê bơnơm in, mơya tàm tŭ làng bol jơgloh den ờ geh cồng nha. Bol añ rơ̆p sền wơl, rơndăp wơl bơneh brê tàm ù tiah mùl màl. Ai bơh tàm rơndăp broă càr neh geh Cíñ phủ kĭ mờ rơndăp ai ngui ù bơh tơl kơnhoàl, bơh tŭ hơ̆ rơndăp ù tiah nàng ai ù lơh sa, ù lơh hìu ơm làng bol in. Ală bă brê lơi neh geh rơndăp lơh ù lơh sa brê bơnơm, geh brê den bol añ lơh ngan sền gàr brê. Bă ù roh brê den bơyai lơh tam brê, tam brê chi dềt, tam brê chi dờng, lơh sa suơn sre brê bơnơm pơgồp bal”.

Jơnau lơh nền tàm pơrjum sồ 23 nam 2022 bơh Ƀộ Cíñ trị bè gùng dà tam brê tiah Tây Nguyên sồr pal tơnguh bơta tìm bơh brê dê tàm tiah do, sền kwơ broă bơsong mờ tam brê. Càr Dăk Lăk neh geh broă lơh lơi ai broă do lah ờ ơ ồng?

Ồng Nguyễn Quốc Hưng: “Tàm tơngai do kal ke ngan kờñ hòi jà tă geh priă nàng tam brê, mơya, bol añ pal ngui mờ geh gùng dà ai ală kông ty lơh sa brê bơnơm kung bè ală mpồl lơh broă bal mờ làng bol tơnguh broă tam brê. Bol añ gam lơh pràn broă hòi jà ală mpồl lơh sa kă bro tă priă nàng dong kờl làng bol lơh Sră dờp brê tam FSC (Sră dờp brê kơl jăp-PV). Mờ tŭ brê geh sră dờp bè hơ̆ den làng bol geh dờp bơta kwơ, ha là mpồl lơh sa kă bro tam brê dờp bơta kwơ rơlao, priă tăc rơ̆p uă rơlao là 10%. Bơdìh hơ̆ tai, bè đah sră nggal bol añ kung dong kờl jơh nùs nàng ai tơl bơta niam ală mpồl lơh sa kă bro, làng bol in tam brê.

Jơnau lơh nền sồ 58 bơh Cíñ phủ dê pa ai lơh jăt tàm nhai 05 nam 2024 kung neh geh ờ uă gùng dà broă lơh nàng dong kờl sơl. Bol añ gam lơh broă rơndăp lơh mờ bơto sồr ală mpồl lơh sa kă bro, làng bol lơh bè lơi nàng lơh geh ală rơndăp broă, ală gùng dà broă lơh nàng geh Dà lơgar dong kờl di jăt mờ broă lơh pa”.

Ơi, dan ưn ngài ồng Nguyễn Quốc Hưng, Kwang atbồ Ci Kụk Ătbồ mờ sền gàr brê càr Dăk Lăk!