Tàm sàh Hoà Thịnh, càr Dăk Lăk – tiah kong gơrềng kơn jơ̆ bơh mìu dà tih dà lìu dê, tơnơ̆ tŭ ală bơtơ̆t tơnau dơng dà rbòng dà Chính Nam geh lơh niam wơl tơn sền bal lơh gơs, dà neh rê tus tàm sre, làng bol lơh broă sa tàm gơ jàr lơh ù, sơrbăc mhar sih tam. Tàm bă ù rlau 2 rbô 200 lồ kòi Mrềt Prăng, tus tŭ do ƀòn lơgar neh sih tam mờr sir jơh. Bơdìh mờ 110 tấn kòi sơntìl geh càr dong kờl tơn, jơnau kờñ gam wơl pơgăp 180 tấn, càr Dăk Lăk neh geh jơnau lơh nền dong kờl priă tă nàng làng bol rơcăng lài blơi sơntìl dipal mờ bơta ƀlàng sre, gàr niam di tŭ kàl lơh sa. Bơta chờ hờp tơnggŏ loh tàm muh măt cau lơh broă sa tŭ geh bơtơl pràn di tŭ. Ồng Mai Tấn Huy, cau lơh broă sa sàh Hoà Thịnh, yal: “Làng bol kàl Mrềt Prăng neh geh Dà lơgar dong kờl sơntìl nàng ai làng bol in sih tam sơntìl gơ in thàn nhai kàl. Trồ tiah niam ngan ai làng bol in sih tam sơntìl. Kơ̆p gơn là geh cồng nha uă”.

Ờ mìng tàm Hoà Thịnh lơm, tơnơ̆ dà tih dà lìu, uă ƀòn lơgar tiah đah măt tơngai Lik càr Dăk Lăk mờr bè roh jơh ală kòi sơntìl ơn prăp. Jăt kờp dŭ bơh gah broă lơh sa sươn sre dê, kờp jơh jơnau kờñ kòi sơntìl drơng sih tam kàl Mrềt Prăng jơh gùt càr pơgăp 26 rbô tấn. Tus tŭ do, bơh bơta pràn càr dê mờ bơta tơrgùm tê bal dong kờl bơh ală mpồl lơh sa kă bro, mpồl cau, cau nă să is dê, neh geh pơgăp 15 rbô tấn kòi sơntìl geh di tŭ jun tus tê làng bol lơh broă sa dê. Bulah bè hơ̆, pơndrờm mờ jơnau kờñ ngan ngồn, jơh gùt càr Dăk Lăk kung gam ờ tơl pơgăp 11 rbô tấn sơntìl, càr pơn jăt tai dong kờl priă jền nàng làng bol in rơcăng lài blơi sơntìl tàm ală ngai tus.

Bơdìh mờ bơta dong kờl bơh ƀòn lơgar dê, ală mpồl lơh broă jak chài kung jơh nùs lòt bal mờ cau lơh broă sa tiah trồ tiah lơh aniai. Tàm kàl Mrềt Prăng do, Anih kơlôi sơnơng Jak chài Măy mŏk Kềng gah dà lềng đah Jum tàm gùl lơgar neh sùm lam lơh ală broă lơh dong kờl kòi sơntìl ai làng bol lơh broă sa ală ƀòn lơgar đah măt tơngai Lik càr Dăk Lăk in. Ồng Nguyễn Đức Thọ, Kwang Lam bồ Anih tờm tàm jàu măy mŏk mờ dong kờl bơto pơlam broă lơh sa sươn sre, gơ wèt Anih kơlôi sơnơng Jak chài Măy mŏk Kềng gah dà lềng đah Jum tàm gùl lơgar pà gĭt, tàm uă anih tam pà, gĭt nđờ tấn kòi sơntìl neh geh jàu tàm tê làng bol dê.

“Bol hi ai ală sơntìl gơguh jak măy mŏk pa mŭt tàm broă tam, ală sơntìl do là geh tơl pràn là gơ ai cồng nha uă mờ neh gơtìp lơyài tơngai kàl pơndrờm mờ tam bal rơ̆ dồ dơ̆. Ngan tài bè hơ̆, bol hi ai ală sơntìl di mơ mờ lơyah ngai nàng gàr geh cồng nha lơh geh ai kàl Mrềt Prăng in mờr tus bơh làng bol lơh broă sa dê”.

Jăt tơrgùm kờp, tus tơngai tŭ do, gùt càr Dăk Lăk neh sih tam pơgăp 70% bă sre tàm kờp jơh 26 rbô lồ kòi kàl Mrềt Prăng. Khà bă sre gam wơl gam geh làng bol pơn jăt tai sih tam tŭ ală kòi sơntìl geh bơtơl mờ bơta trồ tiah ƀươn. Bulah tam lơyài rlau pơndrờm mờ tơngai kàl lơh sa dê, mơya mờ broă ngui ală sơntìl kòi di mơ mờ lơyah tơngai, gah broă lơh sa sươn sre kơ̆p gơn cồng nha mờ khà kòi kàl Mrềt Prăng nam do dê lơh geh kung gam geh gàr sơl.

Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, gah cih dờp mờ đơs niam bơta lòt bal di tŭ, geh kơnòl bơh ală mpồl lơh sa kă bro, ală cau geh nùs nhơm niam dê mờ ală mpồl lơh broă jak chài dê tàm broă dong kờl làng bol tiah dà tih dà lìu. Do là jơnau kwơmàng dong cau lơh broă sa gờñ lơh wơl lơh sa, kơ̆ kơl jăp broă lơh broă sa. Mò Đặng Thị Thủy yal: Tŭ do, Sờh Broă lơh sa sươn sre mờ Tiah ơm kis càr Dăk Lăk neh sồr ală mpồl lơh broă broă mờng lơh sơlơ ơm rềp mờ ƀòn lơgar, pơlam làng bol lơh jăt ală broă pơlam tam phan, ròng phan nàng kờñ tơngguh uă cồng nha lơh sa mờ nàng kờñ bơtàu tơngguh kơnhăp jŏ tàm tơngai tus.

 “Gah neh sồr ai ală anih lơh broă broă mờng lơh in lòt sền bơto pơlam ai làng bol ală sàh in nàng di tŭ sih tam sơntìl kung bè là tơl bơta pal geh nàng gàr niam ròng phan tàm tơngai tŭ do kung bè mờr tus. Mơkung pơlam di tŭ tàm broă lơh broă mờng lơh tàm tơl ƀòn lơgar nàng làng bol iang nùs mờ lam lơh sa”.

Bơh ală ƀlàng sre pa kis wơl tơnơ̆ dà tih dà lìu, bơta pin dờn gam rê wơl mờ cau lơh broă sa đah măt tơngai Lik càr Dăk Lăk. Mờ bơta dong kờl ndrờm bal bơh sơntìl, bơta chài tus sồr lơh sa, làng bol gam kơ̆p gơn kàl Mrềt Prăng nam 2026- 2027 rơ̆p là dùl kàl lơh sa geh tơnhàu uă, pơgồp bơnah gờñ kơ̆ kơl jăp rài kis mờ bơtàu tơngguh lơh sa kơnhăp jŏ tơnơ̆ trồ tiah lơh aniai.