Ală ngai do, tàm bă mìr ơnàng 3 lồ tàm thôn 10, sàh Hoà Phú, ƀòn dờng Buôn Ma Thuột dê, ùr bơklau bi Hoàng Văn Hồng bal mờ bàr pe nă cau lơh broă apah gam lơh niam wơl ală ding dà tuh mờ lơh kơ̆ kơnhăp wơl jrong kờl ai ală sơnđùng prìt niam ngan in. Bi pà gĭt, hìu bơnhă sơnđờm tam gơl bă ù tam biăp mờ tơngời sơntìl pa tus tam prìt bơh bồ nam 2021. Tờm prìt ờ mìng cèng wơl priă lơh geh uă mờ tơngai sơngka sền gàr kung gơmù tĕ uă ngan sơl: “Nam do, năc blơi phan gam tus tàm sươn sền mờ dan blơi jơh prìt rao, tơl lồ lơh geh cồng pơgăp 200 tơlak đong. Tam prìt gam dong tềm pềr bal cau jì ñhơ̆t pơndrờm mờ tơngời mờ biăp. Rlau mờ hơ̆ tai, prìt mìng kờñ dồ nam nàng koh prìt, den ờ gơtìp gơdram priă lơh sa bè ală tờm chi jŏ nam tiêu halà ƀơ jŏ rlau”.

Bi Đậu Văn Tuấn ơm tàm thôn 5, sàh Hoà Phú, ƀòn dờng Buôn Ma Thuột, sơnđờm tam prìt bơh nam 2020. Mờ 5 lồ neh gơ ai sa sùm, bi rơcăng rề ơnàng tai bă ù gơguh tus 2 dơ̆ tŭ kĭ sră pơrgon apah tai ù tam bơh làng bol dê tàm tiah do. Bi Tuấn, pà gĭt: “Tàm tiah Hòa Phú do, bol hi mìng ngui sơntìl prìt tây Thái Lan ờ bơtờp sơntìl, gơ geh cèng bơh tiah Ba Vì, càr Hà Tây lài do. Nàng prìt hòn dờng niam mờ lơh geh cồng nha uă, bol hi sùm rwah ală tờm prìt pràn, niam nàng tam. Tờm prìt tây Thái Lan gơdờp ngan mờ ù tiah, trồ tiah bơh Dăk Lăk dê, ngan tài bè hơ̆ prìt tàm do hòn dờng niam ngan”.

Ồng Nguyễn Văn Kha, cau tờm mpồl lơh sa kă bro blơi prìt tàm càr Dăk Lăk tus bơh càr Hưng Yên pà gĭt, pah nam, ồng blơi gĭt nđờ rbô tấn prìt nàng lòt tăc tus ală càr tiah đah Tô dà lơgar mờ drơng tăc mờ lơgar ndai. Nam do, mpồl lơh sa kă bro neh dan blơi lài pơgăp 700 lồ prìt nàng tăc ai drà Sa tềp Ất Tỵ nam 2025 in: “Dồ nam añ tăc gĭt nđờ jơ̆t tấn prìt tus drà lơgar Lo, ờ hềt kờp khà tăc tàm lơgar kung uă ngan sơl. Bơta niam prìt tàm Dăk Lăk bơkah ngan. Nam do, bol hi neh kĭ sră pơrgon blơi nđờ rhiang lồ prìt mờ giă pơgăp bơh 200 tus 350 rbô đong dồ sơnđùng”.

Jơh gùt càr Dăk Lăk tŭ do geh rlau 2 rbô 400 lồ prìt, prìt lơh geh mờr 66 rbô tấn. Ală sơntìl prìt mìng geh tam là prìt ƀon ja đah jum câu Mỹ mờ prìt Tây Kuh (sơntìl Thái Lan dê), tơrgùm uă tàm ală kơnhoàl: Buôn Đôn, Ea Kar, Krông Pắk, M’Drăk mờ ƀòn dờng Buôn Ma Thuột. Bal mờ ală phan lơh geh bơh sươn sre ndai, tờm prìt gam tơnggŏ loh bơta ƀươn tŭ tam tàm ală bă ù bơrlŭ mờ bràs mờ kơnhoàl ù tiah tam tìp bal đah ù pơrhê ƀazan mờ ù kơnềt gam hòi là ù kơnàng tàm Dăk Lăk, dong rơ̆ ru chi tam mờ gơguh tai priă lơh geh ai cau lơh broă sa in.