Bi Phạm Đức Dậu ơm tàm sơnah ƀòn Đoàn Kết là cau lam lài ai bơkào đào Nhật Tân bơh ƀòn dờng Hà Nội tam tàm Buôn Hồ, càr Dăk Lăk tam bơh mờr 10 nam lài. Kàl bơkào nam do, hìu bơnhă bi dê geh 800 tờm bơkào, kờp dŭ tăc bơh 400 – 600 rơbô đông dùl tờm. Jat bi Dậu, tam bơkào đào ờ gŏ kal ke, mơya pal geh bơta tryang ryồng ngan. Nàng bơkào in gơlì bơkào di mờ tơngai sa tềp den pal rcang sền gròi ngan ngồn, gàr tơl bơta sù iò sùm, ơn phơng di khà mờ rcang sơndră tu kòp lơh aniai ai nha tờm bơkào in. Bi Phạm Đức Dậu, đơs:“Ù pơrhê Tây Nguyên den lơbơn, ờ gŏ kră den gơ dờp ngan mờ broă tam bơkào đào tiah đah tô dê, tờm bơkào sùm hòn gơs niam ngan. Mìng kờñ gàr lơh bè lơi nàng ơn phơng, ƀồm sơnơm sền gàr phan tam, rcang sơndră tu kòp lơh aniai di tŭ den tờm rơ̆p gơlik bơkào niam mờ ring. Trồ tiah bè do den bơkào gơlì niam mờ ring ngan, cau tam bơkào gơtùi lơh geh priă jền uă nàng sa tềp ram mhŭ bal mờ hìu bơnhă”.

Là cau kòn ƀòn tờm tàm Hà Tây yau mờ mut ơm tàm kơnhoàl Krông Pắc lơh broă sa mờ ơm kis bơh rlau 10 lài, bi Nguyễn Văn Tâm pà gĭt nam lơi kung blơi bơkào đào sa tềp. Bơkào đào tam tàm do geh bơta niam hèr, bè ală tờm bơkào tàm tiah đah Tô Dà lơgar dê sơl, bơkào gơlik bàr, dà bơkào phồng niam, mpung niam, mơya geh giă tăc di pal ngan. Bi Nguyễn Văn Tâm, pà gĭt:“Giă bơkào đào tàm thị xã Buôn Hồ di pal ngan, giă ờ kas mờ niam ngan. Bơkào sùm gơ lì di tàm tơngai sa tềp nàng làng bol in bơka sa tềp den añ blơi. Pơndrờm mờ bơkào đào tàm ală càr tiah đah tô dê, den bơkào đào tàm do kung niam ngan sơl, niam drờm bè bơkào đào tiah đah tô Dà lơgar dê sơl”.

Tŭ do, tàm thị xã Buôn Hồ geh 36 hìu bơnhă tam bơkào đào mờ neh lơh bal tơlik mat Hợp ták xã, mờ kờp jơh bă ù ơnàng rlau 17 lồ. Ală cau tam bơkào nam do kờp dŭ lài tăc bro tàm drà kă bro pơgap bơh 18 rơbô tus 20 rơbô tờm, bè: bơkào đào Nhật Tân, Đào Bích, Đào Phai mờ Đào Tuyết. Jat ồng Nguyễn Văn Thắng- Kwang atbồ Hợp ták xã kă bro mờ drơng broă bơkào đào Đoàn Kết yal, phan bơna “bơkào đào Buôn Hồ” tŭ do neh geh tàm pà khà OCOP 3 sơmañ mờ gam pơnđơl pràn lơh ngan gơguh tus 4 sơmañ nàng wèt tus broă tăc mờ lơgar ndai. Ồng Nguyễn Văn Thắng, đơs:“Hợp tak xã neh lơh broă kĭ hơ mờ ală cau chài lam lài mut tàm do nàng dong ală hìu bơnhă tàm mpồl in sơng ka sền gàr lơh niam ală tờm bơkào đào yau lơh niam tơl jơnau kờñ nàng tăc mờ lơgar ndai, mờ yal tơngĭt tàm drà kă bro dunia. Hợp ták xã kung rơ̆p tàm jàu kông nghệ, sơntìl ai làng bol tàm ală càr ndai mờ càr Dăk Lăk in, bulah khat dùl nă cau lơi geh jơnau kờñ ndrờm geh dong kờl tơnguh priă lơh geh”.

Tàm dơ̆ lam lơh tam tờm chi “Sùm sùm kah ưn ngài Wa Hồ” nam 2023 thị xã Buôn Hồ, càr Dăk Lăk neh tam 400 tờm bơkào đào nàng lơh niam tiah drà, sơnah ƀòn. Bơh bơta geh ngan tàm tiah do dê pà gŏ, tiah do geh bơta ƀuơn bơta pràn bè trồ tiah, ù tiah mờ gơdờp ngan mờ tờm bơkào đào. Cơng tàng là neh geh uă ngan hìu bơnhă tàm ù tiah thị xã Buôn Hồ dê tam mờ hời rơ hời lơh pas bơh kơnờm tàm broă tăc bơkào đào tàm tơngai sa tềp, wă rò nam pa.

Ồng Đặng Gia Duẩn- Củ tịc Ủy ƀan Ñân zân thị xã Buôn Hồ pà gĭt, bơh bơta geh ngan tàm tiah do dê pà gŏ, tiah do geh uă bơta ƀuơn bè trồ tiah, ù tiah mờ gơ dờp ngan mờ tờm bơkào đào. Cơng tàng là neh geh uă hìu bơnhă tàm ù tiah thị xã Buôn Hồ tam mờ hời rơ hời lơh pas kơnờm tàm broă tăc bơkào đào tàm tơngai sa tềp, wă rò nam. Den tàng, broă lam lơh tam mờr 400 tờm bơkào đào rơ̆p là bơta sơnđờm pa, pờ tơlik dùl gùng lòt pa ai broă lơh sa làng bol in. Ƀuôn Hồ rơ̆p geh dùl “Gùng bơkào đào” dùl tiah check-in nam pa bềng bơta pơrgon ngan. Tŭ hơ̆, làng bol rơ̆p geh bơta gơn kơnờm, tŭ tơngai niam nàng rề ơnàng bă ù tam bơkào. Do là ală bơnàng jă, ală bơta ƀuơn nàng ai broă tam uă bơkào đào Buôn Hồ in gơ gơs phan bơna OCOP mờ geh mat kă bro is, pơgồp bơnah dong thị xã lơh geh ết ngan rlau jơh 10 phan bơna OCOP tàm nam 2025.

Tàm tơngai tus, tŭ tơl ală bơta, thị xã Buôn Hồ rơ̆p bơyai lơh “Ngai chờ bơkào đào” lơh tus “Dơ̆ lơh chờ bơkào đào Buôn hồ” nàng gơ hòi gơ jà ală priă jền bơcri lơh mờ bơtàu tơnguh lòt nhơl ai thị xã in tàm tơngai tus. Kwơ màng rlau tai là broă tam uă tờm bơkào đào rơ̆p lơh geh bơta niam bơnĕ krơi is bơh dùl ù tiah niam ngan, ngăc ngar ngan, geh nùs nhơm niam ngan.