Broă do cèng wơl cồng nha loh làng tàm broă tam kòi, bùm lô, cèng wơl cồng nha uă; mơkung tềm pềr dà tuh, phơng sih, cế phẩm siñ họk; ngan là tơrmù ƀà cau lơh broă, tŭ jiơ mờ sền gàr pràn kơldang să jan kòn bơnus in.

Ngai gùl poh nhai 6 pa do, tàm mìr bùm lô ơnàng 10 lồ tàm xã Buôn Triá, kơnhoàl Lắk, càr Dăk Lăk dê, ồng Phạm Đăng Xuân gam măy bơh ngài măy par ờ geh cau măy (Drone) ƀồm tuh dà ai sươn bùm gam tàm tơngai geh kơnuh. Ồng yal, pah ngai, phan par do gơtùi lơh broă bơh 8 tus 10 jiơ, tuh dà ai bơh 25 tus 30 lồ chi tam in. Broă ngui ƀươn soh ngan, mìng pal ƀồm dà bềng tàm ding ơn dà, klài phơng, cế phẩm siñ họk, ngui che kơ̆t tềng bŭt nàng gĭt nền anih tàm să măy dê, pờ mờ lơh par ƀồm. Ồng Phạm Đăng Xuân, yal: Rơndeh par ờ geh cau măy bol añ ngui nàng ƀồm ƀươn ngan, kwơ ngan, tơrmù cau lơh broă, tŭ jiơ mờ sơrbac mhar ngan. Tàm dùl lồ bol añ ai par ƀồm roh 10 phuk là sir jơh tơn, lài den bàr nă cau ƀồm dùl dà pal roh nggùl ngai hơ̆ sồng ƀồm jơh. Măy mok pa tŭ do gơ niam ngan. Bol añ mờng ngui cế phẩm siñ họk ngui rơndeh par mờng ƀồm tuh dà ai bùm lô in niam ngan.

Jơnau nisơna ai broă blơi ngui phan par ờ geh cau măy ngui tàm broă lơh sa sươn sre bơh làng bol tàm kơnhoàl Lăk dê là nisơna ngan. Ồng Cao Xuân Phương, Kwang ătbồ Hợp tak xã Lơh broă sa sươn sre Thành Tín, xã Dăk Nuê, kơnhoàl Lăk, pà gĭt: bàr pe nam lài, tơnơ̆ tŭ lòt còp sền broă lơh ƀồm sơnơm sền gàr phan tam mờ bơta măy do tàm kơnhoàl Đức Trọng, càr Lâm Đồng ồng neh dan blơi 2 nơm bơh Cần Thơ nàng rê ngui. Bơh sơnrờp, Hợp tak xã rwah 2 nă cau sơrbac mhar ngăc ngar ngan rlau jơh, tàm hơ̆ geh ồng Xuân sồr lòt tus hờ anih tăc phan do nàng bơsram bơta chài par. Ală tŭ ngui măy par ờ geh cau măy sơngka sền gàr chi tam neh tơngŏ loh làng ală bơta kwơ ngan ngồn. Ồng Cao Xuân Phương, đơs: Bơh ngui 2 nam pa do, bol añ gŏ gơmù priă tă lơh geh 30% gơwèt mờ sơnơm sền gàr phan tam, phơng sih; ai ngai lơh broă den pal gơmù bơh 40 tus 50% ai làng bol lơh broă sa in. Tài bơh rơndeh par ƀồm sơnơm là măy mok li tâm jak chài ngan rlau jơh, ai gar sơnơm klài mờ dà dềt bè dà mhual ai chi in gơ jồp gơmŭt tơn tàm nha, tài bè hơ̆ ờ jơh uă sơnơm, ờ jơh uă dà mờ ờ gŏ lơh aniai tus pràn kơldang să jañ kòn bơnus dê.        

Hợp tak xã Lơh broă sa sươn sre Thành Tín, xã Dăk Nuê, kơnhoàl Lăk geh mờr 100 hìu bơnhă, tam rlau 130 lồ bùm lô, mờr 700 lồ kòi sre. Ngui ală măy mok pa jak chài tàm hơ̆ geh măy par ờ geh cau măy ngui tàm broă lơh broă sa sươn sre neh lơh gơguh cồng nha chi tam, bơta niam phan bơna uă. Bùm lô bơh Hợp tak xã dê neh geh pà sồ tiah tam, tăc uă di gùng tàm drà lơgar Lo. Bơh cồng nha gŏ loh làng ngan, pa do, Hợp tak xã neh dan blơi tai 2 nơm măy par ờ geh cau măy jak chài pa ngan rlau jơh nàng rê ngui sơngka sền gàr chi tam, tơl nơm măy par geh blơi mờ priă tus 250 tơlak đong.