Đềt mềr mờ broă tam bơkàu sa tềp mờr 10 năm do, ồng Ôn Văn Khi ơm tàm thôn 7A, xã Ea Bar, kơnhoàl Buôn Đôn pà gĭt, kàl sa tềp nam do, ồng tam 100 khàp bơkàu kúk pha lê di mơ mờ 70 khàp bơkàu kuk dờng. Tam bơkàu kàl sa tềp dong hìu bơnhă geh tai priă jền, mơkung là jơnau kờñ nhơl chờ hờp bơh cau lơh broă sa dê. Bă ù do bè ờs ồng tam biăp rơbài, tus nhai 8 tam gơl wơl nàng tam bơkàu kúk tăc tàm dơ̆ sa tềp. Nam do, kòp Kovid-19 neh lòt gan, jơnau kờñ nhơl bơkàu tàm dơ̆ sa tềp yal lài rơ̆p gơguh, ồng Ôn Văn Khi kung tam uă bơkàu rlau, bal mờ bơta gơn kơnờm geh tai uă bơta chờ hờp. Ồng Ôn Văn Khi, đơs: Rơcăng uă ngan broă bơh broă tàm bơrlŭ ù pal tàm bơrlŭ wil tơl ală bơta phơng vi siñ ală bơta pal tàm bơrlŭ ring bal, dơ̆ bàr là pal rwah geh sơntìl niam nàng he tam gơ in ƀươn sền gàr rlau, niam bơnĕ rlau. Sền gàr den sùm sùm pal tuh dà gơ in wil tơl bè hơ̆ lơm. Cau tăc kung chờ hờp mờ cau ơn sền tàm hìu kung chờ hờp sơl, sơnam pa lơh geh cồng nha pa.

            Kàl bơkàu sa tềp nam do, hìu bơnhă mò Nguyễn Thị Hiệu ơm tàm thôn 3, xã Hoà Xuân, ƀòn dờng Buôn Ma Thuột, tam 1 sàu mờ nggùl  bơkàu kúk đại đoá koh ntê. Mờr 4 nhai sền gàr ngan, ală ngai do, mò mờ cau hìu bơnhă lơh broă sùm tàm sươn, klah bơkàu dòm, sền gàr nàng ai bơkàu in lơh geh bơta niam mờ lì di tàm dơ̆ sa tềp. Mò Nguyễn Thị Hiệu, đơs: Tŭ do gam koh klah bơkàu dòm, bơkàu dòm lơi gŏ dềt ờ di bè he kờñ den koh klah sang tĕ, bơkàu dòm lơi niam den he lời wơl, mờ tŭ sền gàr nàng tus tàm ngai 22 nhai do geh bàr pe bơkàu là neh gơtùi koh rao mờ khà gam wơl den tus ngai 28 là koh jơh dùl ròt bal.

            Ai gơwèt mờ ồng Nguyễn Ngọc Sung ơm tàm sơnah ƀòn Tân Lợi, ƀòn dờng Buôn Ma Thuột, pah dơ̆ tus sơnam pa sa tềp kung là tŭ ồng dờp lèng cồng nha lơh geh bơh bơta kờñ ngan tam bơkàu mai. Nam do, ồng rơcăng mờr 400 tờm bơkàu mai bơh 5 tus 70 sơnam nàng tăc tàm drà. Ồng Nguyễn Ngọc Sung pà gĭt, nàng geh dùl tờm bơkàu mai niam tàm dơ̆ sa tềp, bơdìh mờ ală bơta chài klah ntê lơh geh nsrum nha, sền gàr, rơcăng sơndră tu kòp lơh aniai den pal sền ngăc tus trồ tiah nàng geh bơta tam gơl ai gơ in dipal. Ồng Nguyễn Ngọc Sung, đơs tai: Tàm nam añ ơn phơng gơ in niam ngan, tuh dà, lơh mòn wơl rùp să gơ nàng gơ in niam, lồi nam gàr wơl ală nsrum nha tơlir, niam mờ pràn nàng gơ ròng bơkàu gơ in niam. Lồi nam bơh nhai 10 tus nhai 12 nam lơgar he dê là kwơmàng ngan, kờp tŭ tơngai pik nha nàng tờm mai in lì bơkàu.

Tàm ală sươn tam bơkàu drơng dơ̆ sa tềp in tàm càr Quảng Nam, ală ngai do neh ur ar ngan cau kă phan mờ cau blơi phan tus lùp blơi bơkàu. Nam do, trồ tiah niam den bơkàu drơng tàm dơ̆ sa tềp tàm càr do geh tơnhàu mờ tăc geh giă. Hìu bơnhă mò Trần Thị Thu ơm tàm xã Duy Trung, kơnhoàl Duy Xuyên tam mờr 200 rbô khàp bơkàu tơl ală bơta, bè: Dạ yến thảo, Mai địa thảo, kúk Mâm xôi, Sao ƀăng...geh cau kă phan dan blơi rlau 70%. Mò Trần Thị Thu pà gĭt, bơkàu nam do tăc geh giă, cau kă phan tus blơi pơndiang lòt bơh gờñ den tàng làng bol geh priă jền sùm nàng blơi phan sa tềp. Mò Trần Thị Thu, đơs: Nam do, bơkàu niam rlau mờ nam lài, cau kă phan tus dan blơi lài bơkàu nàng tăc tàm dơ̆ sa tềp, khi tơm lài dùl êt priă. Pơndrờm mờ nam lài, nam do, priă cồng uă rlau, giă bơkàu jơnhoa rlau mờ nam lài, he lơh priă jền geh uă rlau. Kờp jơh priă lơh geh bơh tăc bơkàu pơgăp 1 tơmàn 400 tơlak đong, geh priă cồng mờr nggùl tơn. Añ ai broă lơh ai 12 nă cau in, ai tơl ală bơta nàng khi in geh broă lơh sùm.

            Kơnhoàl Duy Xuyên, càr Quảng Nam geh pơgăp 7 lồ ù tam bơkàu tăc tàm dơ̆ sa tềp bal mờ gĭt nđờ rhiang hìu tam bơkàu, mìng là bơkàu vạn thọ, kúk, ală bơkàu yồng, tam uă ngan rlau jơh tàm ală xã: Duy Thành, Duy Trung, Duy Nghĩa, Duy Hải, thị trấn Nam Phước. Kờp bal dùl lồ ù tam bơkàu gơcèng wơl ai cau lơh broă sa in priă cồng rlau 200 tơlak đong, jơnhoa rlau tus uă dơ̆ pơndrờm mờ mìng tam ală tờm chi tam lơyah ngan ndai mờ biăp bùm plai đo ală bơta. Ồng Phan Xuân Cảnh, Củ tịc Ủy ƀan Ñân zân kơnhoàl Duy Xuyên, càr Quảng Nam pà gĭt, pơndrờm mờ ală nam lài, nam do bă ù tam bơkàu gơguh rlau, drà tăc kung ƀươn sơl. Ồng Phan Xuân Cảnh, đơs: Kơnhoàl dong kờl bè ù nàng rề ơnàng lơh sa. Gơtùi đơs là, tàm bơta gam ƀươn ƀoài mờ jơnau kờñ bơkàu den nam do geh uă bơta gơ tam gơl niam, nàng kờñ ai geh broă lơh cau lơh broă in, tơnguh uă priă lơh geh bơh làng bol dê tàm bơta kal ke bè kòp bơtờp.

            Càr Quảng Nam geh mờr 2 rbô hìu làng bol tam bơkàu sa tềp. Gah lơh broă sa sươn sre càr Quảng Nam, Mpồl Cau lơh broă sa càr neh dong kờl cau tam bơkàu in càn priă dong kờl priă cồng, pà sơntìl chi tam, dong khi in iang nùs lơh sa. Nam do, trồ tiah ƀươn, giă tăc geh sùm, jơnau kờñ blơi gơguh uă den tàng cau tam bơkàu drơng tàm dơ̆ sa tềp tàm càr Quảng Nam chờ hờp ngan gĭt lơh.