Hìu bơnhă mò Nguyễn Thị Mai ơm tàm thôn Phú Yên 1, sàh Ia Hiao, càr Gia Lai pa tơnhàu jơh 3 lồ tàu, tơrgùm rê khà tàu rlau 240 tấn. Tơnơ̆ tŭ kờp jơh priă tă bơcri bơh chờm, hìu bơnhă mò Mai geh cồng pơgăp 100 tơlak đong. Bơta chờ hờl kàl lơh sa bồ nam gơguh bàr dơ̆ tŭ geh tơnhàu uă, geh giă mờ geh tai hìu măy dong kờl priă tă lơh mờ lam koh tàu gờñ.

“Bơta chờ hờp dờng ngan rlau jơh nam do là hìu măy dong kờl tơnhàu jơh gùt ngai Sa tềp tơn nàng lơh di tơngai pơrgon ai làng bol in. Hìu măy sơndàng dong kờl tơnhàu dong kờl 30 rbô đong dùl tấn nàng làng bol geh bơta gơn kơnờm”.

Bơh tŭ mŭt bal broă lơh tơrlòng lài lơh bal mờ hìu măy sơdàng, hìu bơnhă ồng Đinh Kot, ơm tàm ƀòn Ó, sàh Chư Krey, càr Gia Lai geh dong kờl sơntìl pa, bơto pơlam bơta chài wil tơl mờ ai măy mŏk mŭt lơh ù, sih tam tus dì broă tơnhàu. Mờ broă lơh pa, cồng nha tàu lơh geh neh gơguh bơh 70 tấn dùl lồ gơguh tus 90 tấn dùl lồ. Lơh bal kơ̆ kơl jăp kung dong ồng ờ gơtìp gơlik tai priă tă apah cau lơh broă apah bè lài. Kơnờm bè hơ̆, 5 lồ tàu kàl do neh cèng rê bơnah priă cồng rlau 200 tơlak đong ai hìu bơnhă ồng Đinh Kót in.

“Làng bol bol hi tam tàu den kơ̆ kơl jăp rlau pơndrờm mờ bùm blàng, tơngời, khuah…kơnờm tờm tàu mờ rài kis kơ̆ kơl jăp rlau”.

Broă lơh tơrlòng lài lơh bal tam tàu neh pơgồp bơnah lơh tam gơl niam rài kis uă hìu làng bol ƀòn Ó, sàh Chư Krey đơs is, lơh gơlik bơta tam gơl niam ngan tàm broă sơnơng, broă lơh bơh làng bol tiah jơi bơtiàn dồ êt nă cau càr Gia Lai dê đơs bal. Ồng Đỗ Minh Sơn, Củ tịc Anih duh broă Làng bol sàh Chư Krey, càr Gia Lai pà gĭt: Làng bol tàm sàh gam rơhời tam gơl ală bă chi tam ờ huan lơh geh cồng nha tus tam tờm tàu, dipal mờ bơta is rơmis nhơm trồ tiah, ù tiah tàm ƀòn lơgar.

“Ală nam rềp ndo, làng bol tàm ù tiah sàh neh tam gơl rơndăp tăp sèng chi tam, ai ală chi geh priă jền cồng nha lơh geh uă bè tờm tàu nàng tam. Bơh tŭ tam tờm tàu neh lơh tam gơl lơh sa bơh làng bol dê, geh rài kis kơ̆ kơl jăp rlau, muh măt sàh dê kung geh pas sơm rlau”.

Gia Lai tŭ do là ƀòn lơgar geh tiah tam tàu dờng ngan rlau jơh tiah tàm gùl lơgar mờ Tây Nguyên, bal mờ bă tàu pơgăp 40 rbô lồ. Càr geh 2 hìu măy lơh gơlik sơdàng, kờp jơh pràn lơh gơlik geh rlau 26 rbô tấn tàu dùl ngai. Ală nam rềp ndo, ală hìu măy neh rơcăng lài bơ̆t bơtàu ală anih lơh bal lơh sa mờ làng bol lơh broă sa, gơgơs tiah tam tàu kơ̆ kơl jăp mờ kơnhăp jŏ. Cồng nha lơh geh bơh tàu dê geh sùm tàm khà rlau 80 tấn dùl lồ; uă bă tàu sơngka sền gàr, geh ală ding tuh dà rơcăng lài mờ ngui sơntìl pa lơh geh rlau 90 tấn dùl lồ. Ồng Nguyễn Xuân Phước, Phó Kwang Lam bồ drơng kơnòl Hìu măy Sơdàng An Khê, càr Gia Lai pà gĭt, mpồl lơh sa kă bro gam bơ̆t bơtàu sươn tàu lồ dờng, lơh pràn lơh mờ măy mŏk, ngui măy mŏk tàm ătbồ tơnhaù mờ mŭt lơh păt tàu, lơh gơlik bơta kwơ bàr dơ̆ ai jơh bal cau lơh broă sa mờ hìu măy in.

“Tŭ do, bă ù tam tàu jơnau kờñ uă ngan. Is ồn là broă hìu măy tơngguh cồng nha lơh geh neh ntrờn mhar khà tàu tàm sươn, pơgồp bơnah kơ̆ kơl jăp rài kis làng bol dê tàm ƀòn lơgar”.

Tŭ ală anih lơh bal đah cau lơh broă sa mờ mpồl lơh sa kă bro ngai sơlơ kơ̆ kơl jăp, tờm tàu gam dong kơ̆ kơl jăp rài kis bơh gĭt nđờ jơ̆t rbô hìu làng bol dê tàm Gia Lai. Broă gàr giă blơi kơ̆ kơl jăp, dong kờl măy mŏk, lơh mờ rơndeh rơndồ mờ lam lơh sa niam ngan neh dong cau tam tàu iang nùs đềt mềr mờ sươn sre, tơrmù ƀà rềs àr gơ aniai, tơngguh cồng nha lơh sa, pơgồp bơnah bơtàu tơngguh broă lơh sa sươn sre kơnhăp jŏ bơh ƀòn lơgar dê.