Bulah neh geh mờng chài rlau jơ̆t nam tam bơkào mai rơmĭt, mơya bi Lê Niê Minh Quân, ơm tàm sàh Cư Êbua, ƀòn dờng Buôn Ma Thuột, càr Dăk Lăk kung gam kơlôi rcang ai kàl tam bơkào nam do sơl tài bơh trồ tiah mrềt mờ càl uă. Nàng tơrmù ƀà ală bơta hoàc huơr tài bơh trồ tiah lơh gơlik ai tờm bơkào mai in, bi Quân lời uă tŭ tơngai jat sền, tam gơl broă sơng ka sền gàr nàng kờñ lơh geh ală bơkào mai niam ngan rlau jơh. Bi Quân pà gĭt: “Tŭ do gam tàm tơngai jat sền mờ sơng ka sền gàr bơkào pa dòm nàng geh ală dơ̆ bơkào lì ring ngan rlau jơh nàng uă cau in kờñ mờ blơi uă rlau tai”.

Bal mờ bơkào mai, bơkào đào, kúk đại đoá kung geh uă hìu bơnhă tàm càr Dăk Lăk rơwah bơka tàm tơngai sa tềp. Ală khàp bơkào kúk đại đoá geh bơta jơnhoa 1 thơk 2 neh lơh geh rùp să tơnơ̆ rlau 5 nhai tam. Tơngai do geh sền là kwơ màng ngan rlau jơh nàng lơh nền bơta niam kung bè giă tăc bơh bơkào dê. Den tàng, ală hìu bơnhă tam bơkào kúk đại đóa drơng tơngai Sa tềp bè bi Nguyễn Thanh Hùng, ơm sàh Cư Êbua, ƀòn dờng Buôn Ma Thuột, càr Dăk Lăk pal sền gròi niam rlau tai. Tơl nha ñòp, tơl dòm bơkào ờ niam rơ̆p geh bi kleh jơh nàng ai tiah, ai bơta pràn ai ală bơkào ndai dờng niam ngan rlau. Bi Nguyễn Thanh Hùng đơs: “Tơngai do là tơngai dŭt ndơl den tàng cau tam bơkào pal lơh nền nòn ngan. He sơng ka sền gàr tờm bơkào lơh bè lơi ai nha hơđơm niam ngan, bơkào pal ờ geh tu kòp lơh aniai, ờ geh ñui nàng bơkào in niam ngan rlau jơh tus mờ tê cau ngui in. Cau ngui geh dùl tơngai sa tềp bềng bơta niam  ngan”.

Tàm ƀòn bơkào Khánh Xuân, sơnah ƀòn Khánh Xuân, ƀòn dờng Buôn Ma Thuột, càr Dăk Lăk, bơh bồ nhai 9, nhai 10 he dê, ală cau tam bơkào neh sih tam ală bơta bơkào lơyah ngai bềng ală dà lĭp rơlir, bè: Kúk mâm xôi, Kúk vạn thọ, phong lữ thảo, ….nàng di tŭ tăc tàm drà tơngai sa tềp bơhiàn Dà lơgar dê. Mò Phạm Thị Kiều Diễm, suơn tam bơkào Hà Mi, ơm tàm sơnah ƀòn Khánh Xuân pà gĭt, nam do, mò sih tam 2 rơbô khàp kŭk mâm xôi. Bulah trồ tiah geh dồ ết bơta ờ niam mơya mờ mờng chài bơh suơn tam bơkào dê, tus tŭ do, ală khàp bơkào kung gam dờng gơs niam ngan, crăp rcang lơh geh jơnau kờñ bơkào Sa tềp dê. Mò Diễm kơ̆p kờñ tàm tơngai rềp mờ tơngai Sa tềp bơhiàn Dà lơgar drà rơ̆p pơn jat tai hô hơng mờ cèng geh priă cồng lơh sa kơ̆ kơl jăp ai cau tam bơkào in:“Tam kung bè tơl nam lơm ờ tơnguh kung ờ tơrmù. Tăc tàm drà kă bro giă kung bè ờs bè pah nam. Đơs bal mpồl năc tus kung uă sơl. Khi kung lòt sền den sền bơkào mờ blơi tơn. Cau tam bơkào kung kơ̆p kờñ năc tus mờ suơn tam bơkào den suơn tam bơkào kung tăc geh uă bơkào rlau”.

Bulah gơtìp uă kal ke tài bơh trồ tiah ờ niam, mơya ală suơn tam bơkào tàm càr Dăk Lăk kung jơh nùs jơh tồr mờ pin dờn chờ hờp. Ngan là bơh mpàng tê chài ngan bơh cau tam bơkào dê rơ̆p pơpgồp bơnah lơh geh ală phan bơna niam ngan rlau jơh ai bơta niam bơnĕ tơl hìu bơnhă in tàm tơngai Sa tềp tus sơnam pa rê.