Trồ tiah kàl prang tơngai duh tơr ồ ngan, mơya sươn tiêu 1 lồ bơh ùr bơklau bi Wưm dê tàm xã Hà Bầu, kơnhoàl Đak Đoa, càr Gia Lai kung gam ờ jơh klo săp ñŏ sơl. Jăt bi Wưm yal, nam do, digơlan sươn tiêu rơ̆p gơ ai 3 tấn gar tiêu. Mờ giă gar tiêu rlau 90 tơlak đong dồ tấn, hìu bơnhă bi rơ̆p lơh geh jơnau kơ̆p kờñ lơh hìu pa. Bi Wưm chờ hờp yal: Làng bol Hà Bầu bol hi pik tiêu bơh nhai 1 tus nhai 4, tŭ do pik mờr jơh rao. Giă tiêu nam lài den lơyah ngan, nam do den jơnhoa ngan, làng bol brơn brài ngan.  

Tàm Hợp tak xã Lơh broă sa sươn sre mờ Drơng broă Nam Yang, tàm xã Nam Yang, kơnhoàl Đak Đoa, càr Gia Lai là tiah geh 110 nă cau tàm hợp tak xã, mờ 80 lồ tiêu geh tam jăt gùng dà kơ̆ kơl jăp jŏ jòng den bơta chờ hờp gam dờng rlau uă ngan. Mò Nguyễn Thị Nga, Phó Kwang ătbồ Hợp tak xã pà gĭt, tiêu bơh hợp tak xã dê geh blơi mờ giă jơnhoa rlau tàm drà pơgăp 3 rbô đong dồ kĭ, mìng is 15 lồ tiêu geh sră cơng tàng hữu kơ sùm geh blơi jơnhoa rlau pơndrờm mờ giă drà kă bro 25%. Mò Nguyễn Thị Nga, yal: Tŭ do, giă tiêu gam gơguh làng bol brơn brài ngan, chờ hờp ngan. Nam lài, giă bơh 68 tus 70 rbô đong dồ kĭ, den nam do gơguh bơh 92 tus 95 rbô đong dồ kĭ rao. Tŭ do, làng bol gam sền gàr wơl sươn, pik tơnhàu, ơn phơng mờ tam wơl ală sươn tiêu gam gơnơng. Gơn kơnờm là giă tiêu mờ phan lơh geh bơh sươn sre ală bơta gơguh nàng làng bol geh tai priă tă, priă lơh geh, tam gơl rài kis mờ iang nùs lơh sa.

Càr Gia Lai geh 8 rbô 800 lồ tiêu gam tàm tơngai gơ ai sa, tiêu nam do kờp dŭ lơh geh pơgăp 30 rbô tấn. Tơnơ̆ uă nam mờ giă “gơguh gơmù sùm”, lơh làng bol lơh broă sa gơ dan ñŏ gơ dan ñìm jăt bal tờm tiêu, nam do giă gar tiêu geh tăc jơnhoa rlau 90 rbô đong dồ kĭ là phan ƀàn dờng ai ală cau kơ̆ nùs đềt mềr mờ tờm chi tam do. Mò Nguyễn Vũ Hoàng Yên, Củ tịc Ủy ƀan Ñân zân xã Nam Yang, kơnhoàl Đak Đoa, càr Gia Lai pà gĭt, tềng đăp broă giă tiêu gơguh jơnhoa, gơnoar ătbồ kơnhoàl bơto sồr làng bol ờ gŏ di ur ar rề ơnàng bă ù, mờ kơ̆ nùs jăt gùng dà tam phan kơ̆ kơl jăp nàng ơm kơ̆ tềng đăp bơta gơ tam gơl bơh giă tăc blơi mờ geh bal kòp bơtờp dê. Mò Nguyễn Vũ Hoàng Yên, Củ tịc Ủy ƀan Ñân zân xã Nam Yang, kơnhoàl Đak Đoa, càr Gia Lai, đơs: Kờp jơh bă tiêu bơh xã dê là 220 lồ, tiêu lơh geh bơh 2 tấn mờ nggùl tus 3 tấn tàm dồ lồ. Gơ wèt mờ ală hìu lơh sa jăt gùng dà hữu kơ kơ̆ kơl jăp den digơlan gơguh tus 4 lồ. Do là dồ gùng dà, xã gam hòi jà làng bol tam phan jăt gùng dà do nàng tơnguh uă cồng nha, phan lơh geh, priă jền bơh tờm tiêu dê.

Bulah giă tiêu gam gơguh jơnhoa mờ giă tăc geh tus 95 rbô đong dồ kĭ mơya cau lơh broă sa càr Dăk Nông kung gam ờ hềt gơ jal sơl tăc tàm drà. Ồng Hoàng Văn Sỹ ơm tàm xã Dăk Săk, kơnhoàl Dăk Mil geh 1 lồ tiêu gam mŭt tàm kàl tơnhàu, mờ cồng nha lơh geh digơlan geh pơgăp 2 tấn. Bulah tiêu gam gơguh giă, mơya ồng Sỹ kung gam ờ hềt gơ jal sơl tăc. Ồng Sỹ đơs là, mìng tăc dồ bơnah tiêu di tơl tŭ gơ jal priă nàng bơcri wơl ai tờm chi tam in mờ geh priă jền dơ̆ ngui ai rài kis in. Khà gam wơl hìu bơnhă rơ̆p ìs rañ mờ prăp tàm đam. Jăt kờp dŭ bơh cau lơh broă sa dê, tam tiêu mờ priă tă blơi phơng sih, cau tuh, cau pik tơnhàu…jơnhoa bè tŭ do den giă tăc pal ơm tàm khà bơh 120 rbô tus 150 rbô đong dồ kĭ rlau hơđang den rài kis làng bol lơh broă sa dê hơ̆ sồng tơl ngui tơl sa đau. Ndrờm bè hơ̆ sơl, bi Trương Thị Hạnh ơm tàm sơnah ƀòn Nghĩa Trung, ƀòn dờng Gia Nghĩa kung gam tam uă ngan tiêu mờ gơ ai cồng nha uă ngan sơl. Jăt bi Hạnh yal, giă tiêu gơguh jơnhoa pơndrờm mờ nam 2023, sơrlèt khà 95 rbô đong dồ kĭ. Bè hơ̆ mơya, bi ờ hềt gơ jă gơ jal tăc tài bơh kờp wơl den là ờ hềt geh cồng uă sơl.

Jăt Ci Kụk Bơtàu tơnguh Lơh broă sa sươn sre càr Dăk Nông dê yal, tŭ do jơh gùt càr geh 34 rbô lồ tiêu, khà tiêu lơh geh mờr 70 rbô tấn. Ală nam do, broă tam tiêu neh geh uă tam gơl niam, tam gơgơl rơhời jăt gùng dà hữu kơ mờ li la phan kis sươn chi. Kwơmàng, tŭ do, tiêu càr Dăk Nông neh geh sơnio yal anih tam den do là tŭ niam uă ngan nàng làng bol, mpồl lơh sa kă bro tam tiêu in gĭt, tơnguh priă jền tàm tơngai tus. Tàm broă pik tơnhàu, làng bol lơh broă sa pal sền ngăc rlau tus ală broă pik tơnhàu tŭ tiêu tơl khà dum, ìs pơr phan bơna di jơnau bơto pơlam nàng tơnguh uă cồng nha.

Broă lơh bal lơh gơlik tiêu geh sră cơng tàng bơta niam mờ sră pơrgon blơi phan bơna, kung ngai sơlơ geh lơh uă rlau tai. Nam 2023, jơh gùt càr Dăk Nông geh 23 anih, broă lơh đòm jăt ală jơnau sồr tàm broă tam, bal mờ bă ù ơnàng pơgăp rlau 3 rbô lồ.