Cau tĕ khà càr Long An sồr Ƀộ Nông nghiệp mờ Phát triển Nông thôn, Ƀộ Tài nguyên mờ Môi trường kung bè ală ƀộ, gah lơh broă dà lơgar geh gơrềng pơn jăt tai sền gròi tus broă kơryan dà hang tàm ală càr tiah đah jum dà lơgar. Bơh hơ̆ geh ală bơta dong kờl geh kwơ ngan ngồn.

Tàm broă lơh broă lơh sa bal, cau tĕ khà càr Long An pà gĭt, càr gam lơh ală hợp tak xã lơh broă sa sươn sre nàng kờñ lơh geh bơta lơh bal mpồl bơh broă lơh sa niam tus tŭ pik tơnhàu, tăc bro, lơh gơlik phan tơnơ̆ tŭ tơnhàu...

Bulah bè hơ̆ bơta pràn dơlam is bơh mpồl kwang bàng hợp tak xã dê ờ tơl pràn tài bơh uă ngan mpồl kwang đơng lam bồ hợp tak xã là cau lơh broă sa den tàng ờ bơtàu tơnguh geh bè bơta kơ̆p kơnờm. Bè hơ̆, ală ƀộ, gah lơh broă dà lơgar, ngan là Ƀộ Nông nghiệp mờ Phát triển Nông thôn pal geh tai broă lơh loh làng dong ai lơh sa bal in ngan ngồn gơ gơs là mpồl lam lài bơh lơh sa sươn sre dê, bè jơnau cih tàm Kơrnoăt 150 bơh Cíñ phủ dê là tam gơl bồ tơngoh kơlôi sơnơng bơh lơh broă sa sươn sre tus bồ tơngoh kơlôi sơnơng lơh sa sươn sre.

Tàm jơnau đơs bơtàu tơnguh lơh broă sa sươn sre, ồng Lê Văn Nam, cau tĕ khà kơnhoàl Bến Lức, càr Long An đơs là, kờñ ngan rlau jơh kung gam sơl là jơnau yal di tŭ bè drà kă bro tàm lơgar mờ dunia. Ai cơng tàng tàm tiah he dê, ồng Nam pà gĭt, kơnhoàl Bến Lức geh 100 rbô lồ ù tam tờm plai kwết sràt ờ geh gar. Broă lơh broă tăc plai kwết sràt mờ lơgar ndai geh lơh gơs mpồl lam lơh lài, tăc tus drà câu Âu mờ Trung Đông. Bulah bè hơ̆, ală hợp tak xã blơi kung mìng là broă lơh mờ tê lơm gời...den tàng cau lơh broă sa kal ke rơcăng lài bè giă. Ồng Lê Văn Nam, đơs: Do kung là jơnau ờ hềt pràn uă ngan. Ngan tài bè hơ̆ cau tĕ khà càr Long An kung kơ̆p kờñ geh yal tơngĭt tai uă jơnau yal nàng gĭt geh ală drà lơgar ndai pa yal. Bơh hơ̆, làng bol gơtùi rơcăng lài lòt tus lơgar ndai tìp tơn nàng gơtùi rơcăng lài bè giă ai phan lơh geh bơh sươn sre in.

Tàm bơtàu tơnguh lơh broă sa sươn sre tiah drà bal mờ ală broă lơh lơh broă sa sươn sre măy mok pa kờñ priă jền uă ngan. Mpồl lơh sa kă bro tàm gah lơh broă sa sươn sre kờñ geh dong kờl priă cồng priă càn jăt rơndăp broă lơh kwơmàng bơh ƀòn dờng dê. Ală hợp tak xã lơh broă sa sươn sre, cau tờm anih lơh sa sươn dờng kung geh dong kờl bè priă cồng priă càn nàng tam gơl rơndăp tăp sèng chi tam, phan ròng geh lơh dềt mờ dimơ.

Ƀòn dờng Hồ Chí Minh geh jơnau kờñ lơh gơlik ală mpồl lơh bal đah cau lơh broă sa, hợp tak xã mờ logistics lơh broă sươn sre. Ală mpồl do nàng kờñ bơtàu tơnguh broă lơh rề ơnàng kă bro, tăc blơi phan drơng lơh broă sa sươn sre in, bè: Sơnơm sền gàr phan tam, phơng sih, sơntìl chi tam, cế phẩm siñ họk đah ƀòn dờng Hồ Chí Minh mờ ală tiah...Gùng lòt do rơ̆p dong rơndăp tăp sèng wơl lơh broă sa sươn sre ƀòn dờng Hồ Chí Minh dê mờ tiah đah jum dà lơgar dê. Bulah bè hơ̆, kờñ bơtàu tơnguh lơh broă sa sươn sre tiah drà kờñ pal bơ̆t bơtàu hìu đam tàm ù lơh broă sa sươn sre, broă do tŭ do gam gơkòl uă jơnau cih bơh adat boh lam dê mờ ƀòn dờng Hồ Chí Minh ờ gơtùi bơsong. Ồng Võ Hoàng Vũ, cau tĕ khà ơm tàm xã Hưng Long, kơnhoàl Bình Chánh, ƀòn dờng Hồ Chí Minh, dan: Làng bol dan geh bơ̆t bơtàu hìu đam ing tàm bă ù lơh broă sa sươn sre, drơng lơh broă sa, ngui măy mok, bè hìu prăp phan ơn sơntìl chi tam, phơng sih sơnơm sền gàr phan tam, hìu krơh hìu jàl...broă lơh do gam geh bàr pe bơta gơkòl bè sră nggal gơrềng tus bơ̆t bơtàu, digơlan gơlik geh jơnau gơ tam gơl ờ niam gơlam tus ală broă bơ̆t bơtàu hìu đam tìs mờ adat boh lam. Ngan den tàng bè hơ̆, broă lơh pràn lơh broă sa sươn sre tiah drà gam tìp kal ke. Kờñ ngan Ƀộ Nông nghiệp mờ Phát triển Nông thôn mờ ală ƀộ gah lơh broă dà lơgar geh gơrềng geh broă lơh tă bơsong nàng cau lơh broă sa khin cha rlau, iang nùs rlau bơcri priă bơtàu tơnguh lơh sa tàm tơngai tus.

Tàm dơ̆ hơ jơnau lùp tàm mho ngai 06/11 pa do, Ƀộ trưởng Ƀộ Nông nghiệp mờ Phát triển Nông thôn ồng Lê Minh Hoan đơs là, bàr pe nă làng bol tam brê tàm tiah 2, tiah 3 (hơ̆ là ală xã kal ke mờ kal ke ir gơ wèt tiah làng bol jơi bơtiàn dồ êt nă cau mờ tiah kơh bơnơm), mùl màl là tàm càr Bắc Kạn mờ bàr pe càr geh brê, dilah di den là pal geh dờp priă tă jàu brê, sền gàr brê nam 2021, mơya tus tŭ do kung ờ hềt geh dờp sơl. Bal mờ hơ̆, Ƀộ kung dan bè broă tam gơl 31 broă jàu ƀòn lơgar pa dipal mờ ală bơta is rơmis bơh ală tiah kal ke ir dê.