Deh mờ dờng tàm ƀòn bềng mhual dà sơtŭ lơm, trồ tiah niam gùt nam sùm mrềt niam ngan, Nguyễn Đăng Thiên Phi Long deh nam 1992 ơm tàm ƀòn dờng Dà Làc, càr Lâm Đồng sùm lời dùl nùs nhơm krơi is ngan ai ală sươn biăp, bùm, kơnuh, plai đo kis dờng tơlir niam ngan bơh hìu bơnhă mờ làng bol tiah do dê. Jơh bơsram gah Priă jền- Ngân hàng, lơh broă tàm dùl kông ty gơrềng tus tăc blơi mờ lơgar ndai phơng sih sơnơm tu, sơntìl chi tam ngui tàm broă lơh sa sươn sre, phan lơh gơs bơh sươn sre, do là tŭ tơngai bi geh uă tŭ niam lòt sền nàng gĭt ală broă lơh tàm drà kă bro tŭ tus bal ală dơ̆ lơh drà lơh broă sa sươn sre tàm lơgar ndai.

Nam 2017, tơnơ̆ tŭ tus bal dùl dơ̆ lơh drà tàm Bangkok, lơgar Thái Lan, Phi Long lòt tus Malaysia lòt sền tiah lơh sa sươn sre kông nghệ kau geh lơh is mờ măy mok lơm. Măt tờm tơn sền gŏ ală broă lơh pa rài do, Long kơlôi tus ală cau cau lơh broă sa sươn sre tàm ƀòn he dê gùt nam sùm bòl glar kal ke mờ kờñ cèng broă lơh măy mok ngui tàm lơh broă sa sươn sre. Kơlôi là lơh, nam 2018, Phi Long lơh Kông ty Trăc ñiệm Hữu hạn Finom mờ gơnoar broă tờm là lơh ală broă lơh bè lơh broă sa sươn sre kông nghệ kao ai ală cau lơh sa in mờ ală broă lơh gơrềng tus prăp gàr, sac rwah phan lơh geh bơh sươn sre. Tơngai sơnrờp, Finom mìng tơrgùm crăp, lơh ală ding dà tuh, hìu jàl, hìu krơh, ală broă lơh măy mok lơh is. Lơh ndang lòt sền ndang, mờ lòt sền nàng gĭt tàm drà kă bro, Long sền gŏ bă ù tờm ƀòn lơgar Lâm Đồng dê geh uă tŭ niam mờ bơta pràn ai mpồl lơh sa kă bro in bơtàu tơnguh. Bi lơh nền lơh broă lơh sa jŏ jòng tàm ƀòn lơgar tờm.

Nam 2021, kông ty Phi Long dê lơh broă lơh phan ngui nàng tam phan ai rlau 150 hìu bơnhă làng bol in bal mờ bă ù rlau 5 lồ tàm càr Lâm Đồng mờ rlau 40 hìu lơh sa tàm ală càr, ƀòn dờng ndai. Tŭ do, Kông ty Finom ờ mìng lơh ală broă lơh lơh broă sa sươn sre kông nghệ kau tàm lơgar mờ gam tăc tus drà lơgar Malaysia. Broă lơh neh cèng wơl priă jền geh 11 tơmàn 600 tơlak đong dùl nam, priă cồng lơh geh 1 tơmàn đong dùl nam mờ ai geh broă lơh ai 18 nă ơruh pơnu in. Bi là 1 tàm 32 nă cau pơnrơ jak dờp khà jờng Lương Định Của nam do dê. Phi Long yal: Jơnau kwơmàng ngan rlau jơh tàm ală tŭ sơnđờm mŭt lơh broă là pal geh tơl bơta kờñ gơboh nàng tă pơgồp să jan, geh bơta kơ̆p kờñ sơrlèt gan kal ke, bơceh lơh nàng lơh tam gơl pa, lơh geh jơnau kah krơi is. Tŭ lơh nền rê hờ ƀòn tờm nàng lơh broă lơh sa, añ kơ̆p kờñ geh lơh geh ală bơta nàng ală cau ơruh pơnu bè añ geh anih bơtàu tơnguh tơn tàm ƀòn lơgar tờm he dê.

            Rơ̆p pa 35 sơnam, mơya klau pơnu kòn cau Tàu, Lục Vân Anh ơm tàm thị trấn Yên Thế, kơnhoàl Lục Yên, càr Yên Bái neh geh broă lơh lơh broă sa sươn sre sàng goh kờp piă tus gĭt nđờ tơmàn đong. Vân Anh là dùl tàm ală cau pơnrơ lơh sa- kă bro jak bơh jơh gùt lơgar dê geh Đoàn Dà lơgar jàu pà khà jờng Lương Định Của.

            Tơnơ̆ tŭ kơlôi sơnơng nền bè trồ tiah, ù tiah bơh ƀòn lơgar dê, klau pơnu kòn cau Tày sơnđan mat là Lục Vân Anh neh geh kơlôi lơh, lam lơh crơng gơs Hợp tak xã Sáu Không Farm, sùm tam mờ tăc ală phan bơna biăp, kơnuh, bùm, plai đo lơh geh tơl jơnau sồr bơta niam. Nhai 8 nam 2018, bi sơnđờm tam tơrlòng lài tàm bă ù ơnàng 10 rbô thơk vuông; tus nam tơnơ̆, bi pơn jăt tai lơh ală hìu glòm, hìu krơh mờ bă ù ơnàng rlau 5 rbô thơk vuông mờ lơh bal mờ ală hìu bơnhă làng bol tàm thị trấn Yên Thế tam mờ sơngka sền gàr, blơi jơh phan lơh geh bơh làng bol dê. Bi Lục Vân Anh yal: Geh bơh bơta kờñ ngan lơh broă sa sươn sre, bơh dềt añ neh lơh ngan bơsram gơ in jak chài ngan nàng pơrlòng gơkờn tàm Hìu bơsram Nông nghiệp I Hà Nội. Tàm ală tŭ bơsram den kung kơ̆p kờñ sơl là tơnơ̆ do rê hờ ƀòn lơgar bal mờ làng bol lơh uă ală broă lơh cèng wơl cồng nha lơh sa uă. Bơh hơ̆, añ neh lơh ngan pơđơl pràn nàng bơsram, lơh bal mờ ală hìu bơnhă làng bol geh bal bơta kờñ ngan lơh sa sươn sre nàng lơh gơlik geh ală phan bơna tăc geh uă priă jền.

            Bồ nam 2022, Lục Vân Anh pơn jăt tai rề ơnàng bă ù tam ală bơta chi sa plai, mơkung lơh bal mờ ală hìu ràng tăc phan sa sàng goh mờ ală siêu thị geh bơngă pin dờn nàng tăc bro phan bơna. Bơdìh hơ̆ tai, bi kung jơh nùs mblàng yal, tàm yal tơngĭt bal bơta mờng chài bè cồng nha bơh broă lơh dê ai ală đoàn viên, ơruh pơnu ndai tàm dơlam mờ bơdìh kơnhoàl in.

            Tŭ do, bi Vân Anh neh lơh bal mờ 3 nă đoàn viên rề ơnàng tai bă ù lơh hìu glòm, hìu krơh ơnàng tus 1 lồ 3 sàu tàm xã Tân Lập, mờ thị trấn Yên Thế. Bi Nguyễn Ngọc Khuyến là đoàn viên ơm tàm thôn São, xã Tân Lập, kơnhoàl Lục Yên pà gĭt: Bơh lòt sền mờ geh bơta bơto pơlam bơh bi Lục Vân Anh dê ià tê sơñio broă bơh phan ngui nàng lơh, gar sơntìl tus bơta chài, broă chài ngui phơng sih, broă chài sền gàr...tus tŭ do hìu bơnhă gŏ gơlơh niam nùs ngan bè broă lơh do.

            Đòm jăt ngui bơta jak chài măy mok tàm broă tam, sền gàr chi tam, ngui bơta pràn bơh măy mok yal tơngĭt jơnau nàng tăc phan bơna nàng kờñ tơnguh priă lơh geh, kờp bal pah nam, Hợp tak xã Sáu Không Farm bơh bi Lục Vân Anh dê neh lơh geh bơh 60 tus 80 tấn biăp, bùm, kơnuh, plai đo; gơ ai priă jền kờp jơh geh 1 tơmàn 500 tơlak đong tàm dul nam; ờ kờp ală priă tă, priă cồng kung lơh geh pơgăp 500 tơlak đong sơl. Jăt Ƀí thư Huyện đoàn Lục Yên là bi Nông Thanh Sơn đơs, Hợp tak xã bơh bi Lục Vân Anh dê neh lơh geh broă lơh jăt tơngai kàl ai pơgăp bơh bơh 10 tus 15 nă cau in mờ dong kờl 15 hìu bơnhă làng bol lơh bal lơh sa geh broă lơh mờ lơh geh sùm priă jền. Bi Nông Thanh Sơn, đơs: Lục Vân Anh là ơruh pơnu tơryăng tơryồng, kong bòl glar mờ jơh nùs jơh tồr ngan. Bơh ală mờng chài tàm broă geh ngan bơh he dê, bi neh hòi jà bơta lơh bal bơh ală đoàn viên, ơruh pơnu geh bal dùl bơta kơlôi sơnơng dùl bơta kơ̆p kờñ nàng lơh hợp tak xã. Broă lơh bơh bi dê ờ mìng cèng tus ai cau ngui sa in ală phan bơna phan lơh geh bơh sươn sre mờ gam lơh hô hơng srơh ơruh pơnu bơtàu tơnguh lơh sa tàm ù tiah kơnhoàl Lục Yên.

            Bơh ală broă lơh ngan bơh să tờm dê, ngai 04 nhai 11, bi Lục Vân Anh chờ hờp là 1 tàm 32 krơh ơruh pơnu pơnrơ jak geh dờp sră jờng rơ khà jờng Lương Định Của bơh Đoàn Dà lơgar dê jàu pà.