Pah drim, làng bol ală ƀòn Vơng Chép, Keo, Tung Ke gơ wèt sàh Ayun, kơnhoàl Chư Sê bal mờ gơ̆p lam tai kơnrồ lòt tus ƀlàng ê. Mho mang, khi tơrgùm mpồl kơnrồ rê hờ wàng bal nàng ătbồ. Jăt bi Đinh Suyn, Lam bồ mpồl ròng kơnrồ dra ƀòn Keo, sàh Ayun dê yal, làng bol ƀòn lơgar lài do kung neh geh tŭ geh dong kờl kơnrồ dra sơl mơya hơ̆ là dong tơl hìu ròng rah rài is. 02 nam do làng bol hơ̆ sồng geh dong kờl nàng ròng tơrgùm. Đinh Suyn pà gĭt, broă dong kờl mờ lam ròng pa neh ai tơl bơta nàng làng bol tam pà bal bè bơta mờng chài, bơta chờ hờp mờ ală broă rơndăp lơh lơh sa.

“Bơh tŭ Dà lơgar dong kờl kơnrồ să tờm oh kung chờ hờp chờ hờn ngan lơh pas, rê hìu toès ñhơ̆t ai kơnrồ in sa. Tài bơh kơnrồ me gam geh bun mờ bè lơi gơ kung deh kòn den tàng he gŏ gơlơh brơn brài ngan. Kơnrồ deh he ròng, tơnơ̆ do dilah deh uă den tăc nàng bơtàu tơngguh lơh sa bè blơi phơng sih, sơnơm, chi tam”.

Gơ wèt mờ bi Kpui Đe- Lam bồ mpồl ròng kơnrồ dra, ƀòn H’Vawk, sàh Ayun kung bè hơ̆ sơl. Bi pà gĭt, bơh kơlôi sơnơng tŭ pa lam lơh, tŭ do làng bol neh niam nùs ngan.

“ Tàm nùs nhơm să tờm Đe dê chờ ngan, lài do mè bèp ờ geh phan lơi, tus tŭ do Dà lơgar dong kờl ai he in kơnrồ den tus tŭ do hìu añ kơnrồ neh deh kòn rao den tàng añ lơh ngan ròng mờ sền gàr bè lơi gơ in niam rlau. Jơh toès kòi den ai rơhe rê nàng geh phan sa ai kơnrồ in kàl prang, kung tam pà bal mờ làng bol rơhe cèng rê jơh, bañ chu bè lài do tai”.

Sàh Ayun geh rlau 95% khà kờp làng bol jơi bơtiàn dồ êt nă cau, rài kis lơh sa tìp uă kal ke tài bơh ù klàr ờ gam nđiơm gơs tai mờ nhơm trồ ờ niam ngan tai, broă lơh tơrlòng lài ròng kơnrồ dra neh cèng wơl bơta gơn kơnờm pa. Tàm 02 nam do, broă lơh neh dong kờl 65 hìu rƀah mờ pa jơh rƀah tàm kờp jơh 327 hìu kal ke tàm sàh Ayun. Tus tŭ do, ală kòn kơnrồ geh dong kờl bơh nam 2023 neh sơnđờm deh kòn, cèng wơl priă lơh geh pa, lơh gơguh tai bơta pin dờn mờ gơn kơnờm ai làng bol in.

Ồng Phạm Ngọc Tuấn- Phó Củ tịc Anih duh broă Làng bol sàh Ayun, kơnhoàl Chư Sê, càr Gia Lai đơs: Rơndăp broă lơh ờ mìng ơm wơl tàm broă dong kờl broă lơh broă sa lơm mờ gam lơh gơlik geh wơl jơnau kơ̆p kờñ ngan klàs rƀah, tơngguh uă gĭt wă mờ nùs nhơm geh kơnòl bơh làng bol dê. Ală mpồl kơnrồ pràn, cham, ală bơta chờ hờp bơh ală dơ̆ kòn kơnrồ bơh sơnrờp geh deh neh tơnggŏ loh gùng dà dipal ngan.

 “Bơh 02 nam lơh jăt rơndăp broă lơh 3 dong kờl ròng phan lơh sa dong kờl kơnrồ dra neh rơhời geh cồng nha. Neh ròng siam jăt mpồl hìu den gĭt wă, wă wờng bơh làng bol dê geh tơngguh tai, tàm pơrlòng gơ̆p ròng siam mờ jăt sền ndram gơ̆p bal, bơh hơ̆ lơh geh ală cồng nha jơnhoa rlau pơndrờm mờ ală nam lài do ròng phan jăt broă ròng hìu bơnhă dê, broă lơh ròng phan ờ geh lơh niam gơlam tus cồng nha lơh geh ờ uă. Bơh 2 nam lơh jăt broă lơh neh dong làng bol lài ngan là tơnguh uă gĭt wă, gơnoar broă làng bol dê tàm ròng siam kơnrồ dra nàng tơrmù rƀah kơ̆ kơl jăp”.

Dong kờl kơnrồ deh kòn nàng làng bol jơi bơtiàn dồ êt nă cau in bơtàu tơngguh ròng phan, tơnguh priă lơh geh, là broă lơh tơrlòng lài neh geh lơh jăt uă nam tàm càr Gia Lai mờ neh đơs nền geh cồng nha. Bơdìh mờ kơnrồ sơntìl geh blơi bơh priă broă lơh jơnau kờñ dà lơgar dê, uă anih lơh broă, mpồl lơh broă tàm càr kung pà kơnrồ deh kòn, bơtơl tai bơta pràn ai broă lơh tơrmù rƀah in. Ală tam gơl pe bè broă lơh mờ cồng nha lơh geh bơh sàh Ayun, kơnhoàl Chư Sê pà gŏ, broă lơh tơrlòng lài do bơh Gia Lai dê gam pơn jăt tai geh lơh sir gơs. Ală mpồl kơnrồ pràn cham, ală dơ̆ kơnrồ kòn pa geh deh, ờ mìng cèng wơl priă lơh geh uă ngan mờ gam lơh kah wơl jơnau kơ̆p kờñ ngan brồ guh tàm tơl hìu bơnhă. Do là bơnàng jă bơh sơnrờp kwơmàng nàng ală kâp gơnoar ătbồ càr Gia Lai pơn jăt tai rề ơnàng lơh uă broă lơh tơrlòng lài, pơgồp bơnah tơnguh mhar tơrmù rƀah tàm ală ƀòn lơgar.