Ồng Phạm Anh Tuấn, Củ tịc Mpồl duh broă Kă bro Hợp tak xã Tờm chi sa plai Krông Păch pà gĭt, tŭ do hợp tak xã geh 2 rbô 600 nă cau, mờ bă ù tam sầu riêng kờp jơh geh 1 rbô 236 lồ, tam uă tàm xã Ea Yông, kơnhoàl Krông Păch. Jơh ală bă sầu riêng neh geh cih mat 26 màh sồ tiah tam, lơh gơlik plai sầu riêng jăt gùng dà VietGap sàng goh, geh wil tơl yal anih lơh gơlik, ală broă lơh ơn prăp tàm kơldung, lơh gơlik lơh geh bơta niam bơkah tăc mờ lơgar ndai uă mờ di gùng tàm drà kă bro lơgar Lo. Kàl sầu riêng nam 2023 do, kờp jơh plai sầu riêng bơh hợp tak xã dê là rlau 30 rbô tấn, jơh ală geh ală mpồl lơh sa kă bro blơi tăc uă mờ di gùng mờ lơgar Lo. Mờ giă sùm jơnhoa rlau mờ giă tàm drà pơgăp bơh 7 tus 10%, cau tam lơh geh priă cồng uă. Ồng Phạm Anh Tuấn, đơs: Kàl nam 2023 do, tàm tiah tam bơh Hợp tak xã dê kơnờm bơh neh lơh màh sồ tiah tam den tàng broă tăc phan bơna sầu riêng bơh cau lơh broă sa dê ƀươn ngan, giă tăc kung sùm jơnhoa rlau mờ sùm lơh geh bơh 80 rbô tus 90 rbô đong, jơnhoa rlau tus bàr dơ̆ pơndrờm mờ ală nam lài. Ală mpồl lơh sa kă bro tăc mờ lơgar ndai khi sùm sền gròi dan blơi phan jơh nàng tăc mờ lơgar ndai, hìu bơnhă tàm hợp tak xã ờ duh pal kơlôi rơcăng drà tăc, khi blơi jơh khà sầu riêng mờ he lơh geh hơ̆.

Ai Hợp tak xã Lơh broă sa sươn sre Ea Pil, kơnhoàl M’Drăk geh 34 hìu tàm hợp tak xã, bă ù tam tờm plai jràng lồng là 250 lồ. Plai tơl kàl kờp dŭ lơh geh rlau 6 rbô 500 tấn. Ồng Lê Xuân Hợp, Kwang ătbồ Hợp tak xã yal, jơh ală bă ù tam tờm plai jràng lồng bơh ală hìu dê neh geh lơh màh sồ tiah tam, kàl plai jràng nam do gơtùi tăc uă di gùng tus tàm drà lơgar Lo dê. Mờ bơta ƀươn do, cau tam rơ̆p ờ duh pal kơlôi rơcăng jơnau drà tăc ai phan bơna plai jràng in mờ gơtùi tăc geh mờ giă jơnhoa rlau mờ ală nam lài. Ồng Lê Xuân Hợp, đơs: Cồng nha lơh geh bơh kàl plai jràng nam do dê digơlan pơgăp 30 tấn tơl lồ. Giă nam lài den 18 rbô tus 25 rbô đong dùl kĭ tăc tàm sươn, mơya nam do tăc geh uă mờ di gùng mờ lơgar ndai den là geh rlau 30 rbô đong dùl kĭ. Geh uă mpồl lơh sa kă bro khi tus dan blơi nàng ơn prăp tàm kơldung tăc tus lơgar Lo, mơya bol hi ờ gơ jal, lài ơm kơ̆p tus kàl. Plai jràng geh sră cơng tàng VietGap, geh lơh màh sồ tiah tam rao mờ kwơmàng dum gờñ rlau pơndrờm mờ plai jràng tiah đah tô dà lơgar mờ tăc uă di gùng mờ lơgar ndai den tàng ờ gŏ kơlôi drà tăc.

Làng bol lơh broă sa tàm ală tiah tam geh ai màh  sồ càr Dăk Lăk tŭ do neh ờ ngòt bè broă tăc phan, tŭ geh drà tăc phan uă mờ bơta niam tăc phan mờ lơgar bơdìh jăt gùng tờm. Làng bol lơh broă sa tàm tiah tam ndai bơh càr dê kung ờ ngòt sơl tài bơh nggùl nam 2023 do, UɃÑZ càr Dăk lăk neh hòi jà jơh ală cơl dŭ lơh broă gah lơh sa suơn sre kấp kơnhoàl tus bal tàm broă ai màh sồ, nàng mhar ai phan geh lơh bơh suơn sre càr dê tus rềp rơlao mờ ală drà kă bro lơgar bơdìh. Cau ai tơngit jơnau đơs do geh dơ̆ lùp ồng Phạm Ngọc Hùng, Kwang atbồ Phòng Nông nghiệp mờ Phát triển Nông thôn kơnhoàl Krông Ana, bè broă dong kờl làng bol, mpồl lơh sa bal, hợp ták xã… lơh jăt broă cih măt nàng ai mã sồ tiah tam jăt broă tam pà kấp pa.

Ơ ồng, pa do, UɃÑZ càr Dăk Lăk neh geh sră nggal ai ală kơnhoàl, thị xã, ƀòn dờng tàm càr in lơh jăt broă ai màh sồ tiah tam nàng ai geh bơta ƀuơn tàm broă tăc phan geh lơh bơh suơn sre dê, dan ồng yal bè tơngu me do tàm kơnhoàl Krông Ana?

Ồng Phạm Ngọc Hùng: “Broă lơh tam cah kấp, atbồ màh sồ tiah tam tàm kơnhoàl Krông Ana tơngai do den sùm geh UɃÑZ kơnhoàl sền gròi đơng lam lơh jăt. Cơl dŭ lơh broă sa suơn sre mờ bơtàu tơnguh ƀòn lơgar là anih lơh broă tờm geh jào là anih lơh broă tờm lơh jăt broă ai màh sồ tiah tam ală bơta phan tam tờm kơnhoàl dê bè: Tờm sầu riêng, bùm lô, kòi sre… Tàm tơngai do, mờ gơnoar broă bal mờ kơnòl geh jào, Cơl dŭ lơh broă sa suơn sre mờ Bơtàu tơnguh ƀòn lơgar neh lơh ngan pơgồp bal mờ Anih tam phan mờ Sền gàr phan tam kơnhoàl dê mờ ală anih lơh broă gơrềng bal, pơlam nàng UɃÑZ kơnhoàl đơng lam ală xã, thị trấn, bơto sồr làng bol mờ ală hợp ták xã, mpồl lơh sa bal… lơh sră nàng ai màh sồ tiah tam ală bơta phan tam tàm kơnhoàl in”.

Ơi, dan ồng yal ală sră nggal mùl màl nàng làng bol, ala măt ală mpồl lơh broă bal, hợp ták xã, mpồl lơh sa kă bro, lơh jăt broă ai màh sồ tiah tam ală bơta phan tam tàm kơnhoàl Krông Ana”

Ồng Phạm Ngọc Hùng: “Bè broă lơh jăt broă ai màh sồ tiah tam ală bơta phan tam tàm kơnhoàl dê, den tŭ do, bol añ gam lơh jăt ală sră nggal bơto sồr bơh Ƀộ Nông nghiệp mờ Phát triển Nông thôn dê, bơto sồr mờ bơsram tàp ai ală hìu, ală mpồl lơh sa bal ha là hợp ták xã lơh jăt ală broă lơh gơs sră nggal. Tàm broă lơh sră nggal den geh ală broă lơh tờm bè tơnơ̆ do, lài ngan là sră yal bơta chài jăt jơnau neh cih lài, dơ̆ bàr là cih tàm pang sră broă tam sền gàr bơh hìu nhă dê ha là hợp ták xã, ală cau pal cih jơnau tàm broă tam phan neh dan tàm jơnau neh geh cih lài bơh phan tam dê, dơ̆ pe sră nggal pal tơlik gŏ geh jơnau ring bal tus bal màh tiah tam mờ jơnau ring bal bơh ală hìu lơh broă sa nàng ală mpồl lơh broă, mpồl lơh sa kă bro ngui mã tiah tam di jăt mờ kơrnoăt geh ai tơnơ̆ mờ tŭ geh kĭ. Bơta do geh kwơ màng ngan tài tơnơ̆ mờ tŭ geh ai sră bloh den pal ngui geh cồng nha mờ di tàm kơrnoăt adăt boh lam dê”.

Ơi, di bè hơ̆, tơnơ̆ mờ broă lơh sră, làng bol, ala măt mpồl lơh sa kă bro, mpồl lơh sa, hợp ták xã pal lơh jăt ală broă lơh jăt tai là bè lơi nàng geh ai màh sồ tiah tam, ơ ồng?

Ồng Phạm Ngọc Hùng: “Tơnơ̆ mờ tŭ sră nggal geh tơl bloh, den ala măt hìu nhă, mpồl lơh sa bal, hợp ták xã geh jào sră do tus Cơl dŭ lơh broă sa suơn sre mờ Bơtàu tơnguh Ƀòn lơgar kơnhoàl. Cơl dŭ là anih lơh broă tờm ngan geh dờp sră, tơnơ̆ mờ hơ̆ geh bơyai lơh sền tơl, di pal bơh sră nggal dê bè bă ù, cồng nha, khà geh, nùs nhơm ring bal bơh ală hìu làng bol tus bal tàm tiah tam kung bè kơrnoăt bơh ală lơgar dê tơnơ̆ do geh tăc phan. Tŭ sră mờ ală sră nggal gơrềng bal neh geh lơh tơl, tàm tơngu me do, Cơl dŭ lơh broă đah lơh sa suơn sre mờ Bơtàu tơnguh Ƀòn lơgar geh pơyoa sră tus Sở Nông nghiệp mờ Phát triển Nông thôn bal mờ Ci kụk tam phan mờ sền gàr phan tam càr nàng sền wơl broă ai mã sồ tiah tam ai ală bơta phan tam bơh làng bol dê. Tàm tơngu me dăp tơl den bol añ kung tơrgùm hơ̆ sồng yal mờ Kụk Tam phan mờ Sền gàr phan tam nàng Kụk lơh broă mờ ala măt ală lơgar blơi phan lơh ală broă lơh pơn jăt tai. Bè: Gơwèt mờ Kụk Hải quan lơgar Lo, mpồl lơh broă do geh pơn jăt tai ală broă lơh bè cri bơyai, sền tàm internet ală bơta di jăt mờ jơnau kờñ bơh lơgar blơi phan dê mờ tŭ neh di jăt mờ jơnau kờñ blơi den mpồl lơh broă hơ̆ geh dờp mã sồ tiah tam phan tăc mờ lơgar bơdìh. Tơnơ̆ mờ tŭ neh geh dờp, mpồl do geh sră nggal pơyoa tus Ƀộ Nông nghiệp mờ Phát triển Nông thôn mờ Ƀộ geh kơnòl pơyoa tus ală càr in nàng làng bol, mpồl lơh sa bal, hợp ták xã geh ai màh sồ tiah tam drơng tàm broă tăc phan geh lơh bơh suơn sre di jăt mờ kơrnoăt tàm adăt boh lam tŭ do dê”.

Ơi, dan ồng yal cồng nha bơh broă ai màh sồ tiah tam tàm kơnhoàl Krông Ana tàm tơngai do, mờ broă do den gơtìp ală bơta kal ke, bơta lòng lơi mờ broă bơsong bè lơi ơ ồng?

Ồng Phạm Ngọc Hùng: “Tus tŭ do, cồng nha neh lơh geh bơh broă ai màh sồ tiah tam ai phan tam tàm kơnhoàl Krông Ana in là ờ uă ngan. Gơwèt mờ tờm sầu riêng, bùm lô là ală bơta phan tam tờm ngan, mơya ờ hềt geh ai màh sồ tiah tam; mìng is kòi sre den rơ̆p geh dùl Hợp ták xã Broă lơh drơng ala Thanh Bình I geh ai màh tiah tam tàm xã Quảng Điền. Geh ờ uă bơta kal ke jăt cơl dŭ lơh broă bol añ gŏ tŭ do bè tơnơ̆ do, tờm sầu riêng lơh jăt broă tam mìng dùl bơta phan tam geh ờ uă, tài jăt jơnau kờñ dunia dê pal geh tam mìng dùl bơta phan tam bơh 10 lồ rơlao hờ đang hơ̆ sồng geh ai 1 màh sồ tiah tam; mờ tŭ do ờ hềt geh mpồl lơh sa kă bro tăc phan mờ lơgar bơdìh lơi mùl màl tus pơgồp bal lơh sa, tăc plai sầu riêng mờ ală mpồl lơh broă, hợp ták xã ha là làng bol nàng bơto sồr, dong kờl lơh màh sồ tiah tam”.

Tềng đăp mờ ală bơta kal ke tàm broă dong kờl làng bol, mpồl lơh sa kă bro dan cih măt lơh màh sồ tiah tam bè hơ̆, tàm tơngai tus kơnhoàl Krông Ana geh lơh ală kơnòl lơi tàm broă do, ơ ồng?

Ồng Phạm Ngọc Hùng: “Tàm tơngai tus, Cơl dŭ lơh broă đah lơh sa suơn sre mờ Bơtàu tơnguh Ƀòn lơgar geh pơn jăt tai pơlam UɃÑZ kơnhoàl đơng lam ală xã, mpồl lơh broă gơrềng bal pơn jăt tai lơh jăt jơnau bơto sồr bơh Ƀộ Nông nghiệp mờ Phát triển Nông thôn, Kụk Tam phan mờ Sền gàr Phan tam bè sră nggal dan lơh sră, ai màh sồ tiah tam, màh sồ hìu dăp phan ai ờ uă bơta phan tam tàm kơnhoàl dê. Dan mờ Ci Kụk tam phan mờ Sền gàr phan tam sền gròi, đơng lam bơto sồr lơh mhar ală sră nggal, mờ tơrbŏ bal mờ ală mpồl lơh sa kă bro geh tơl bơta pràn nàng pơgồp bal dong kờl ai kơnhoàl, làng bol, mpồl lơh sa, hợp ták xã tàm broă ai màh sồ tiah tam ai phan tam tàm kơnhoàl in”.

Ơi, dan ưn ngài ồng uă ngan!