Jăt ồng Bùi Quang Sáu, drơng broă bơta chài tàm tiah lơh sa bơh Kông ty Sweet Potatoes, krơi is bơh sơnrờp pơndrờm mờ broă tam bùm lô ờs mờng bơh yau là kông ty neh lơh tam gơl wơl ù mờ hữu kơ phan kis dềt; pơn jăt tai là ngui tờm sơntìl geh bơh bơkiar tờm ờ bơtờp, bơsong phan bơkah pràn jăt tơl tŭ tơngai kis dờng bơh sươn bùm lồ dê. Bal mờ ală àr bùm lô ờ hềt rồ, nha tơlir kră kơldang ờ geh dồ êt tềl tu sa aniai, ồng Bùi Quang Sáu pà git, mờ ală broă pơlam lơh sa bơh he dê, di 2 nam kông ty tam geh 3 kàl bùm, kàl tơnơ̆ cồng nha lơh geh jơnhoa rlau mờ kàl lài. Ồng Bùi Quang Sáu, đơs: Bol hi kơlôi sơnơng bơta bơkah pràn ù tam in, bal mờ gơsơ̆t chơ̆t jơh ală bơta bơsềt kòp aniai tàm ù nàng lam tam. Tơnơ̆ ală broă lơh bơsong ù mờ broă lơh 2 nhai. Đơs ngan ù hơ̆ pràn bơkah tơl, bơsềt kòp ờ gam den bol hi hơ̆ sồng lam tam. Bơdìh mờ sơntìl tơl niam, bơta bơsong ù, pràn bơkau ù là kwơmàng ngan rlau jơh hơ̆ sồng geh khà phan mờ cồng nha lơh geh bè tŭ do.

Ồng Mai Duy Khương, Kwang ătbồ Bơtàu tơngguh drà bơh Kông ty Bơcri priă bal Sweet Potatoes đơs nền: Tŭ do, phan bơna bùm lô tàm ală càr tiah Tây Nguyên dê mìng gàr geh bùm ris tàm tiah bè ờs lơm tơnơ̆ tŭ rồ bùm bơh 15 tus 20 ngai. Mơya bùm lô bơh kông ty dê gơtùi gàr bè ờs phan bơna geh tàm bùm tàm 03 nhai. Bơta do ƀươn ngan ai broă tăc mờ lơgar ndai jun bơh gùng dà lềng tus ală lơgar tiah câu Âu, Arab in. Ồng Mai Duy Khương, đơs: Bol hi kĭ sră hơ mờ Kông ty Toyota lơgar Nhờk dê. Bol hi kĭ sră tăc jăt dồ tŭ tơngai khà phan lơh geh mờ bal dồ khà giă geh lài. Jơh ală sră hơ tăc: khà phan lơh geh, giă geh lơh nền lài 12 nhai lài tŭ pa tam sơntìl. Tŭ do, bùm bol hi dê gam tam do là bùm lô Nhờk, sơntìl là Beniazuma. Geh tơl jơnau sồr tăc mờ lơgar ndai bơh gùng dà lềng lòt tus câu Âu. Drà tăc bơh hi dê gơ geh sùm ngan.

Ồng Đào Y Dương, Kwang ătbồ Bơtàu tơngguh rơndăp broă lơh bơh Kông ty Bơcri priă bal Sweet Potatoes dê đơs là: Ờ jai tŭ do bơh uă cau tam bùm lô dê tàm Tây Nguyên kung bè uă tiah ndai tàm jơh gùt lơgar là tài bơh kơn jơ̆ bè bơta mờng lơh sa ờ kơnhăp dồ anih ờ hềt lơh jăt broă lơh lơh niam wơl di ală broă bơto pơlam, mơkung sơmờm uă ir sơnơm sền gàr phan tam lơh ală bơta phan geh kwơ ai bùm lô in gơtìp gơsơ̆t chơ̆t jơh. Bơta do gơlam tus cồng nha lơh geh mờ bơta niam bơkah ndrờm ờ geh uă, ờ gơtùi lơh geh jơnau sồr ngai sơlơ kal ke ngan bơh drà tăc mờ lơgar ndai dê, mờ năc tàm lơgar kung ờ bài kờñ sơl tài bơh gơ gam wơl bơnah sơnơm sền gàr phan tam. Bơh cồng nha lơh geh bơh he dê bè cồng nha lơh geh mờ bơta niam bơkah phan bơna, Kông ty Bơcri priă bal Sweet Potatoes gam jòi cau lơh broă bal nàng rề ơnàng bă ù gơguh tus 500 lồ tàm nam 2024 do mờ rơ̆p gơguh tai tus gĭt nđờ rbô lồ hơ̆ sồng lơh geh tơl jơnau kờñ bơh năc blơi phan dê tàm ală nam pơn jăt tai.

Ồng Đào Y Dương pà gĭt, ù tam mờ nhơm trồ tiah tàm càr Dăk Lăk gơdờp ngan mờ sơntìl bùm lô Beniazuma Nhờk dê, gơtùi lơh geh cồng nha 90 tấn bùm tàm dồ lồ. Bơta gơkòl bơh kông ty dê tŭ do là jòi bă ù ơm rềp tàm nđir bal nàng lơh geh jơnau kờñ bè broă ngui măy mŏk rơndeh rơndồ. Ồng Đào Y Dương, đơs: Tàm broă lơh gơlik mờ jòi drà tăc den bol he geh sùm ngan. Lơh sa kung neh geh cồng nha ngan. Kơ̆p kờñ gơnoar ătbồ tiah do ai tơl bơta ai bol hi in geh dồ bă ù kơ̆ kơl jăp bơh 400 tus 500 lồ nàng kơ̆ kơl jăp lơh sa.

Tơnơ̆ do ồng Cao Hữu Kiệt, Kwang atbồ bơta chài mờ bơta niam Kông ty Bơcri priă bal Sweet Potatoes yal bè ală broă tam bùm lô lơgar Nhờk tàm ù Bazan geh tơnhào uă mờ cồng nha lơh sa uă.

Ơi, lài jơh dan lùp ồng, tàm kông ty Sweet Potatoes den broă rơwah sơntìl geh ală bơta krơi is mùl màl lơi, ơ ồng?

Ồng Cao Hữu Kiệt: “Ơ làng bol mờ gơ̆p bơyô, broă tam bùm lô ờ geh bơta lơi krơi is gơwèt mờ làng bol he dê tàm càr Dăk Lăk. Bè kông ty bol añ den geh 5 broă lơh tờm nàng lơh geh cồng nha suơn tam bùm lô. Lài ngan bè sơntìl bùm lô pal geh bùm ngan. Sơntìl bol añ tam tam là sơntìl blơi bơh lơgar Nhờk 100%. Lài mờ tŭ lơh sơntìl mờ khà uă tàm lơgar Việt Nam dê, den pal sền mờ sơbì jơh ală phan geh tơngŏ kòp neh geh lài, hơ̆ sồng sơrbì jơh hơ̆ sồng lơh sơntìl. Broă ai jrang bùm bơkiar geh pơgăp bơh 6 tus 8 nhai nàng geh ală jrang bùm lô pràn sơnrờp ngan. Tơnơ̆ mờ hơ̆ he ntrờn bơh anih bơkiar tàm Sài Gòn rê tus Tân Hoà, ƀòn dờng Buôn Ma Thuột, càr Dăk Lăk mờ cèng tus tàm suơn ờng mờ tam cah is tàm cơl dŭ mrềt bơh 5 tus 6 ngai sền bè bơta gơlik geh bơh jrang bùm dê. Pơn jăt tai, gàr jrang bùm lô kơl jăp niam hơ̆ sồng ai cèng tam nàng geh kơnuh. Jrang sơntìl nàng geh cồng nha tai den uă ngan mìng koh ntê jrang bơh C0 tus C3 ha là C4 jrang ờ gơtìp rơgai mờ niam”.

Broă lơh ù nàng tam sơntìl bùm lô lơgar Nhờk là broă lơh kwơ màng ngan, dan ồng pà git bè ală bơta chài tàm broă lơh do?

Ồng Cao Hữu Kiệt: “Broă lơh mờ pŏ ù tŭ tam geh kwơ màng ngan. Tàm do kông ty bol añ ngui vi siñ lơh niam ù blơi tơn 100% bơh lơgar Nhờk. Kwơ màng lơh ù mờ jrang bùm lô là bơta niam ù, bơta jrô uă, jrang bùm lô rơ̆p hòn geh bơta jrô niam. Bơdìh kông ty bol añ mờng lơ-òr jrô 50 phơng ha là 60 phơng sơlơ niam. Pơn jăt tai, jơh lơ-òr bol añ rơcoh ù nàng lề 90% rơlao hờ đang, jrô àr bơh 30 tus 35 phơng. Hơ̆ là rơcoh ù bơh 2 tus 3 dơ̆, tŭ hơ̆ vi siñ lơh niam ù blơi bơh lơgar Nhờk cèng bơrlŭ bal jrô tàm tiah ù nàng lơh lề ù mờ tam gơl gơs phơng mờ jrang bùm lô ờ gơtùi sa tơn bơh ion nàng tơnơ̆ do jrang bùm ƀuơn sa mờ hòn gơs niam”.

Geh bơta krơi is lơi đah jrang tam tơl lồ ù mờ đah mpồl lơh sa kă bro ồng dê bal mờ làng bol tam bè ờs tàm càr Dăk Lăk tŭ do, ơ ồng?

Ồng Cao Hữu Kiệt: “Mùl màl bơta chài tam kwơ màng ngan. Tŭ do bơta jir tam bơh làng bol tàm càr Dăk Lăk dê tàm 1 lồ ù tam mờr 80 rơbô jrang, mơya đah kông ty bol añ mìng tam geh bơh 30 rơbô jrang bùm lô, mờ jrang bùm hòn gơs niam mờ nha ờ gơtìp tàm tìm bal, tŭ hơ̆ jrang bùm mìng tơrgùm ròng kơnuh mơ. Tàm broă sơnka sền gàr, bơta bơkah den geh phơng, mờ ờ uă bơta vi siñ bơtàu tơnguh niam jrang bùm lô in. He pal lơh bơh phan tuh dà ntờc. Đah kông ty bol añ ngui dà den ngui dà tơrlung mờ dà tơnao geh is. Mơya pal geh tơl bàr bơta. Dùl là sơtèk lơh kloh dà, jồr dà kloh hơ̆ sồng ƀồm tus tàm sơtèk ndai hơ̆ sồng ƀồm tàm ding tuh ntờc tus tàm àr bùm”.

Ơi, ồng gơtùi pà git broă ngui mờ ală bơta phơng bè lơi tàm broă tam bùm lô, ơ ồng?

Ồng Cao Hữu Kiệt: “Phơng tŭ do bol añ mìng ngui là phơng blơi bơh lơgar bơdìh, bè kông ty bol añ mìng blơi là phơng Yara mờ ờ uă bơta phơng blơi bơh lơgar Đức ha là lơgar ndai. Bơta tờm bơh broă krơi is tàm do mờ bol añ pa đơs là pal sền kwơ sơntìl mờ lơh niam ù hơ̆ sồng ngui vi siñ nàng tam gơl lơh ală bơta bơkah mờ jrang bùm ờ hềt sa jơh. Kung bè làng bol he ngui phơng vô kơ sơl, den jrang bùm sa mhar mờ geh cồng nha tơn, mơya ngui phơng hữu kơ den lơyài rơlao. Hơ̆ là vi siñ gam lơh tam gơl hữu kơ tus ion nàg jrang bùm sa tơn nàng hòn gơs niam. Bè hơ̆, hữu kơ rơ̆p geh jơh 50% khà bơkah nàng jrang bùm sa mờ hòn gơs niam”.

Ơi, dan lùp ồng jơnau dŭt ndơl, broă tơnhào bùm lô geh lơh bè lơi ơ ồng?

Ồng Cao Hữu Kiệt: “Tŭ do kông ty Sweet Potatoes bol añ dê phan mìng lơh geh là tăc tus lơgar Nhờk, den tàng broă tơnhào bơh kông ty dê ndrờm ngui măi mok lơm 100%. Bơta krơi is bơh broă tơnhào bùm mờ măk là geh phan gàr niam kơnuh bùm ờ gơtìp gơklò, gam bè ờs. Broă lơh geh uă den tàng kơnuh dờng ngan, jrô tàm tiah ù, uă kơnuh jrô tus 40 phơng, den tàng pal geh măi tơnhào nàng tă jơh kơnuh jrô tus tàm dra, den kơnuh geh gàr gam bè ờs, ờ gơtìp pă. Gam di lah tơnhào mờ broă lơh ờs mờng den kơnuh mờng gơtìp pă, ờ gơtùi gàr geh bơta niam ndrờm mờ măi tơnhào”.

Ơi, dan ưn ngài ồng uă ngan!