Gam nggui lơh niam wơl tơngu me jơnau cih nàng cih tàm pang Chonongsandaklak.vn, bi Y Pốt Niê, Kwang atbồ Kông ty TNHH Êđê kơphe pà git, pang kă bro điện tử do geh lơh niam ngan, ƀuơn ngui, ƀuơn ai cau tă mờ cau blơi in tài geh ală jơnau tơngit loh làng bơh tơl bơta phan dê. Ồng Y Pốt Niê, đơs: Sơnrờp ngan cèng geh bơta ƀuơn ai cau blơi mờ dơ̆ bàr là mpồl lơh sa kă bro bè bol añ den geh tơmŭt phan tàm do là ƀuơn ngan, broă jòi mờ lơh nàng he ơn phan tàm hơ̆ kung ƀuơn ngan sơl, geh bal cau ờ git bè kông nghệ thông tin den kung gơtùi ngui smarphone ha là laptop kung gơtùi lơh, den tàng să tờm añ kờñ ngan mờ kơ̆p kờñ là Chonongsandaklak.vn  ngai sơlơ geh bơtàu tơnguh rơlao mờ geh uă cau git tus rơlao, ờ mìng tàm càr Dăk Lăk mờ tus gùt lơgar Việt Nam, jơh gùt dunia ndrờm git tus bè drà kă bro phan geh lơh bơh suơn sre do.

Jăt lŏ Lê Thị Nga, atbồ Kông ty kơphe Vương Thành Công yal, bơdìh mờ bơta geh kwơ ai geh tiah nàng cau blơi mờ cau tăc geh cri bơyai bal, ờ geh bơh broă lơh kòn gùng lơi, Drà phan geh lơh bơh suơn sre Dăk Lăk online gam là anih nàng ală mpồl lơh sa kă bro jòi anih tờm lơh gơs, khà măt kă bro bơh phan geh lơh mhar mờ di pal ngan. Lŏ Lê Thị Nga, đơs: Bol añ ai geh nùs nhơm pin dờn uă ngan gơwèt mờ drà do mờ bol añ kơ̆p kờñ là drà do pờ geh mờ geh cèng bơta gơguh jăk pa ai phan geh lơh bơh suơn sre Việt Nam đơs bal mờ càr Dăk Lăk đơs is.

Jăt mò Lại Thị Loan, Củ tịc Mpồl làng bol lơh broă sa càr Dăk Lăk đơs, broă tus bal Drà phan geh lơh bơh suơn sre Dăk Lăk online geh lơh pràn ală hợp tăk xã, mpồl lơh broă bal, mpồl lơh broă sa, làng bol lơh broă rơcang tơnguh uă bơta kwơ phan geh lơh, lơh gơs phan bơh suơn sre kloh niam, jăt khà geh ai mờ dan cih măt khà măt kă bro. Mờ dong kờl làng bol in git jơnau kờñ bơh drà kă bro, bơh tŭ hơ̆ geh tam pà phan geh lơh mờ geh broă lơh niam wơl phan di pal mờ drà kă bro; pơgồp bal tàm broă yal bơta geh, bơta kwơ, broă lơh bơh lơh sa suơn sre càr dê, bơh tŭ hơ̆ hòi jà bơcri priă, lơh jăt bơta geh kwơ phan geh lơh bơh suơn sre…Mò Lại Thị Loan, đơs: Bol añ lơh geh Mpồl atbồ Drà geh sền gròi sùm nàng ală phan geh di pal mờ jơnau neh geh dan, kung bè dong kờl ai cau tă in tàm broă kă bro nàng gàr niam di jăt broă lơh mờ gàr niam gơnoar kwơ ai cau tăc mờ cau blơi in. Jơnau kờñ dŭt ndơl hơ̆ là tơnguh uă priă geh, tơnguh uă rài kis bơh làng bol lơh broă sa dê, pơgồp bal tàm broă bơtàu tơnguh lơh sa suơn sre càr dê là lơh sa suơn sre tơlir, lơh sa suơn sre hữu kơ mờ bơtàu tơnguh kơl jăp kung bè là ngui kông nghệ sồ tàm lơh sa, tàm broă tăc phan nàng tơl nă làng bol lơh broă sageh là cau lơh sa mờ kung là dùl cau kă bro tàm bă suơn bơh să tờm dê.

Ồng Nguyễn Thiên Văn, Phó Củ tịc UɃÑZ càr Dăk Lăk pà git, tàm càr geh 152 bơta phan geh lơh bơh suơn sre geh tăp sèng bơh 3 sơrmañ rơlao hơđang, den tàng broă yal tơrbŏ bal đah cau lơh sa mờ cau ngui sa bơh broă lơh tàm anih kă bro điện tử là geh kwơ ngan. Ồng Nguyễn Thiên Văn đơs nền, tàm tơngai tus, ală broă kă bro tàm pang kă bro điện tử geh rơhời nền nòn rơlao, niam bơnĕ rơlao mờ geh tàm pơrlòng rơlao. Mpồl làng bol lơh broă sa pal dong kờl ală hợp ták xã, hìu kă bro, làng bol lơh broă sa rơcang nền nòn, ndrờm bal bơh broă ròng, tam, lơh, tơnhào, prăp gàr… nàng gàr niam bơta bơkah ndrờm bal, lơh gơs broă jòi anih lơh gơs phan. Ồng Nguyễn Thiên Văn, đơs: Hòi jà mpồl làng bol lơh broă sa càr pơn jăt tai mblàng yal uă bè pang kă bro điện tử kung bè yal uă ală kơrnoăt gơrềng bal tus mờ broă ai phan tơmŭt tàm drà kă bro do. Dơ̆ bàr tàm broă lơh jăt, broă geh bơta niam phan geh lơh, broă khà priă tàm pơrlòng, broă tơnguh uă bơta kwơ gơguh bơh phan geh lơh den kung hòi jà Mpồl làng bol lơh broă sa càr pơn jăt tai đơng lam, lam lơh di pal rơlao nàng ală cau tàm mpồl geh tơnguh sùm bơta niam phan geh lơh, tàm hơ̆ geh bal bè bơta niam măt, jòi gŏ tiah lơh kung bè khà măt phan kă bro.

Cau cih jơnau do neh geh dơ̆ boh bơr mờ mò Lại Thị Loan, Củ tịc Mpồl Cau lơh broă sa càr Dăk Lăk, do là mpồl ătbồ bơh Chonongsandaklak.vn dê bè ală broă jàu tus bal Drà phan lơh geh bơh sươn sre online kung bè gơnoar broă bơh Mpồl dê tàm broă ngui mờ ătbồ pang kă bro điện tử do.

Niam să mò Lại Thị Loan, dan mò pà gĭt tŭ mŭt bal tàm chonongsandaklak.vn den cau tăc pal geh tơl ală jơnau sồr lơi taih?

Mò Lại Thị Loan: Tŭ mờ mŭt bal tàm pang kă bro điện tử drà phan lơh geh bơh sươn sre Dăk Lăk.vn den gơ wèt mờ cau lơh broă tàm hợp tak xã, mpồl lơh sa kă bro mpồl gah broă lơh, đơs bal là ală cau tăc pal lơh geh tơl ală jơnau sồr jăt jơnau sồr bal mơkung rơ̆p pal lơh jăt ală jơnau sồr bơh adat boh lam dê kung bè jơnau pal jăt bơh Drà dê bè broă kă bro kung bè tăc blơi; dơ̆ pe tai là tŭ mŭt bal tàm drà den cau tăc rơ̆p geh ală gùng dà nàng lơh bè lơi hơ̆ bơtàu tơnguh phan bơna bơh he dê niam rlau tai nàng lơh geh jơnau kờñ bơh drà kă bro dê. Ai gơ wèt mờ cau blơi den tŭ mờ tus bal lơh ală broă tăc blơi kung bè pal lơh geh bơta song dơ pă loh làng mờ bơta kơ̆ kơl jăp kung bè lơh geh ală broă lơh bal mờ cau tăc rơ̆p geh lơh jăt.

Bè hơ̆ mŭt bal tàm Drà phan lơh geh bơh sươn sre online do khi rơ̆p geh ală bơta kwơ lơi, ơ mò?

Mò Lại Thị Loan: Bơta geh lài ngan hơ̆ là gơ wèt mờ cau tăc, ờ mìng tăc geh ală sră dan blơi phan loh làng mờ bơta kwơmàng hơ̆ là he yal geh jơnau bè phan bơna he dê tus mờ jơh tơl nă cau; broă tai hơ̆ là tŭ mŭt bal tàm drà kă bro do bơdìh mờ broă yal tơngĭt bè phan bơna den cau tăc gơtùi gĭt geh jơnau yal bè drà kă bro tàm dơlam càr, tàm lơgar kung bè jơnau kờñ bè nhai kàl lơh sa nàng he in gĭt geh jơnau kờñ tàm drà kă bro bè lơi nhai kàl bè lơi nàng bơh hơ̆ he gĭt geh là tŭ do jơnau kờñ tàm drà kă bro bè lơi nhai kàl bè lơi nàng gơtùi tam gơl lơh sa; dơ̆ pe tai là geh tiah nàng lơh bal lơh sa mờ mpồl lơh sa nàng lơh gơs ală anih lơh gơlik phan bơh sươn sre mờ kwơmàng mpồl lơh sa kă bro rơ̆p geh uă ngan bơta ƀươn hơ̆ là bơta yal loh làng ờ ndơ̆p mpồn bơh phan bơna dê mờ tàm do uă ngan ală bơta phan gơtùi tàm pơndrờm bè bơta niam bơkah, giă tăc bro mờ anih tờm lơh gơlik mờ iang nùs bè bơta niam bơkah phan bơna dê.

Mờ gơnoar broă là Anih lơh broă ătbồ bơh pang kă bro điện tử do dê, Mpồl Cau lơh broă sa càr rơ̆p ătbồ mờ dong kờl ală cau tờm anih ràng tăc phan tàm pang do bè lơi nàng kờñ gàr niam bơta niam bơkah phan bơna kă bro kung bè ală jơnau sồr bơh adat boh lam dê, ơ mò?

Mò Lại Thị Loan: Mpồl lơh broă sa càr lơh Mpồl ătbồ drà mờ neh geh jơnau pal jăt loh làng gơ wèt mờ kơnòl bơh Mpồl ătbồ dê mờ Kwang ătbồ Mpồl ătbồ dê kung bè ală cau tàm Mpồl rơ̆p geh kơnòl loh làng tàm broă gròi sền jơnau yal gròi sền ală dơ̆ tăc blơi tàm pang kă bro điện tử nàng kờñ gàr cau tăc mờ cau blơi in rơcăng lài mơya bơh bơta ătbồ jăt sền kràñ ngan ală jơnau yal ală bơta phan mờ dilah geh broă lơh tìs rơ̆p gơtìp lơh glài jăt jơnau pal jăt mờ ờ geh broă là rơ̆p lời ală bơta lơh tìs bè jơnau sồr tàm jơnau pal jăt dê gơlik geh. Nùs nhơm do là drà kă bro mờ Mpồl cau lơh broă sa càr roh uă dà kơlhề nàng lơh tài bơta kwơ ờ di là tài priă cồng mờ kờñ yal tơngĭt mat kă bro phan bơna bơh càr dê lơh măt kă bro phan bơna bơh càr dê bơh hơ̆ đơs nền măt kă bro phan lơh geh bơh sươn sre lơgar Việt Nam dê.

Bè jŏ jòng, Mpồl rơ̆p geh ală gùng dà mờ rề ơnàng pang kă bro điện tử do bè lơi, ơ mò?  

Mò Lại Thị Loan: Gơ wèt mờ khăt dùl broă kă bro điện tử halà dùl phan ngui bè măy mok sồ den ngai sơlơ pal tam gơl pa nàng dipal bal mờ bơta bơtàu tơnguh bơh mpồl bơtiàn dê, den Pang kă bro uă tàm điện tử Chonongsandaklak.vn kung rơ̆p bè hơ̆ sơl, rơ̆p pal geh bơta tam gơl pa, bơta lơh niam rlau tai. Dilah bè 500 cơldŭ ràng tăc phan ờ lơh geh jơnau sồr den rơ̆p rề ơnàng tai mờ bol hi tam pà broă rơndăp lơh jăt tơl tŭ tơngai mờ geh broă rơndăp lơh lơh niam rlau tai kung bè rề ơnàng cơldŭ ràng tăc phan dilah bè jơnau kờñ bơh cau blơi dê tus bal uă rlau mờ sùm lơh tam gơl pa mờ broă lơh ătbồ den kung rơ̆p kơ̆ kơl jăp rlau tai nàng lơh bè lơi hơ̆ drà kă bro điện tử lơh broă geh cồng nha rlau kwơmàng ờ gŏ di là tăc  geh nđờ phan bơna tàm ngai mờ là yal tơngĭt geh phan lơh geh bơh sươn sre bơh càr dê kung bè bơh lơgar Việt Nam dê mờ ală phan bơna OCOP 63 càr, ƀòn dờng dê.

Ơi, dan ưn ngài mò bè ală jơnau yal pa do!