Tàm bă sươn ơnàng rlau 1 lồ bơh ồng Lê Văn Việt dê, ơm tàm sàh Ea Yông, kơnhoàl Krông Pắc, càr Dăk Lăk, ală tờm sầu riêng rlau 6 nam gam tàm tơngai gơrung bơkàu mòn plai. Ồng Việt pà gĭt, trồ tiah ờ bè ờs bal mờ ală ngai mrềt jŏ jòng, tàm bơrlŭ bal mờ ală dơ̆ mìu ờ di kàl lơh bơkàu ờ pràn, khà mòn plai dồ êt rlau pơndrờm bal dùl tŭ mờ nam lài. Bulah bè hơ̆ ồng Việt kung gam dòn sơl tàm bơta niam bơh sươn chi dê tài bơh hìu bơnhă tam phan jăt gùng dà phan kis (siñ họk) dong plai chi kis dờng niam: “Mờ dùl broă rơndăp lơh tam phan kơ̆ kơl jăp bè añ gam lơh, ờ ngui sơnơm lơh mhar dờng, ờ ngui phơng hoá họk den trồ tiah do, plai ờ uă mơya tam gơl wơl ală plai sầu riêng geh niam rlau uă ngan pơndrờm mờ ală broă rơndăp lơh tam ndai mờ gơ ờ gơtìp ală jơnau ờ niam plai sầu riêng. Hơ̆ là tam phan kơ̆ kơl jăp rơ̆p ờ huan gơtìp gơrềng bơh trồ tiah rlau”.

Tam phan kơ̆ kơl jăp ờ ngui dà sơnơm là gùng lơh sa geh uă hìu tam sầu riêng tàm ală kơnhoàl: Krông Pắc, Cư M’gar, Krông Năng…bơh càr Dăk Lăk dê lơh jăt tàm ală nam rềp ndo. Làng bol lơh bal mờ gơ̆p tàm ală jơnum lơh broă bal, mpồl lơh broă bal halà lơh bal lơh gơlik mờ mpồl lơh sa kă bro tăc mờ lơgar ndai den tàng geh tŭ tìp măt lơh kwèng, tàp lơh, ală broă lơh gơlik sầu riêng kơ̆ kơl jăp ngai sơlơ lơh sir. Ồng Lê Văn Thông, cau tàm jơnau lơh broă bal broă lơh sa sươn sre sàng goh Hoà Thắng, càr Dăk Lăk yal: “Lùp bơsram geh jak chài bơh ală kỹ sư dê, khi rê bơto yal wơl jak chài măy mŏk, mờng chài bơh cau lơh broă sa dê bơh tiah do tus tiah ndai nàng he in lùp bơsram. Dơ̆ bàr, cau lơh broă sa gĭt wă cih wơl tàm sră pơ àr nàng he jăt sền broă ơn phơng, tam phan pah ngai”.

Tềng đăp jơnau sồr kràñ ngan bơh Kụk dờng Sok sền mờ tă dia phan tăc blơi mờ lơgar ndai lơgar Lo dê bè ală jơnau sồr niam sàng goh, càr Dăk Lăk neh jơh nùs kờp sền nền wơl, dong kờl pà màh sồ tiah tam mờ màh sồ anih ơn klơm ai ală mpồl lơh broă lơh geh tơl jơnau sồr in. Tus tŭ do, jơh gùt càr geh 68 màh sồ tiah tam mờ 23 anih ơn klơm sầu riêng geh sền swì ring bal tăc tus lơgar Lo. Tàm ală tiah tam sầu riêng tờm ngan, broă ătbồ màh sồ tiah tam mờ jòi gĭt anih tờm lơh geh ală ƀòn lơgar lơh jăt niam ngan. Ồng Trần Quốc Vĩnh, Củ tịc Anih duh broă Làng bol kơnhoàl Krông Pắc, càr Dăk Lăk, do là kơnhoàl “tam uă ngan sầu riêng” càr Dăk Lăk dê neh geh pà 37 màh sồ tiah tam mờ 13 anih ơn klơm mờ gam tơngguh tai broă lơh jăt sền: “Bol hi sơlơ ătbồ jăt sền màh tiah tam bal mờ màh anih ơn klơm nàng lơh bè lơi lơh geh ală jơnau sồr. Lài jơh là ală mpồl lơh sa kă bro ù tiah kơnhoàl dê pal lơh sir ală sră nggal, ngan là ală phan là tŭ do lơgar Lo gam kơryan bè phan Cadimi halà phan Vàng O”.

Jăt ồng Nguyễn Văn Hà, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk, nam do càr geh jơnau kờñ lơh geh priă bơh tăc mờ lơgar ndai 1 tơmàn 800 tơlak dolar Mỹ, tàm hơ̆ sầu riêng ris mờ ơn mrềt là phan bơna kwơmàng. Bulah bè hơ̆, ală broă tàm drà kă bro bồ nam neh ơn tơlik bơta lòng lơh gah broă lơh sa sươn sre pal pơn jăt tai tam gơl pa, tơngguh uă bơta niam phan bơna nàng gàr kơ̆ drà tăc mờ lơgar ndai.

“Lài ngan là bè broă lơh gơlik, gĭt nền geh tiah tam mờ tiah tam geh săc rwah mờ bàr là bè broă lơh gơlik den pal lơh geh ai broă jòi gĭt anih tờm lơh in, bơcri priă ală gơguh jak jak chài măy mŏk kung bè là ătbồ bè ală jơnau drà tăc. Is ồn tơrgùm blơi, ơn prăp, lơh gơs phan pal lơh geh jơnau niam sàng goh phan sa, pal lơh gơs ală tiah neh geh rơndăp ù tiah nàng ală mpồl lơh sa kă bro geh tơl bơta bơ̆t bơtàu ală anih ơn prăp phan, ală tiah lơh mrềt lơh geh jăt ală jơnau sồr bơh ală lơgar blơi phan dê”.

Bulah gah phan sầu riêng Dăk Lăk neh geh đơs nền jơh bal bè khà lơh geh mờ bơta niam, mơya nàng lơh geh ală jơnau sồr ală lơgar kal ke ngan, kung gam kờñ sơl tai uă lơh ngan lơh sir. Broă rơcăng lài tam phan niam sàng goh là lơh ngan bơh sơnrờp càr dê, là bơnàng jă nàng sầu riêng Dăk Lăk pơn jăt brồ guh uă rlau tai tus uă drà kă bro bơta pràn ndai.