Tŭ do, jơh gùt lơgar neh gĭt gŏ 741 tiah geh kòp jê ndul gơjroh sur câu Phi tàm 31 càr, ƀòn dờng. Is tàm càr Dăk Lăk, kòp bơtờp neh geh tàm 14 hìu gơ wèt 9 thôn; sồr tơ̆p pơrgŭc 130 nơm sur. 7 sàh, sơnah ƀòn tàm ù tiah càr kung gam kòp bơtờp sơl, tàm hơ̆ 3 sàh: Dliê Ya, Krông Năng mờ Tam Giang kòp bơtờp ờ hềt rlau 21 ngai. Jơnau pơhìn kòp jê ndul gơjroh sur câu Phi geh tơnggŏ sơlơ bơtờp tai, is ồn là tàm ală ƀòn lơgar kờl kờp jơh mpồl sur uă, gơrềng ờ niam tus gah ròng siam sur, anih lơh gơlik puăc mờ tiah ơm kis. Tềng đăp bơta kòp gơbàn ờ ƀươn soh mờ geh pơhìn lơh bơtờp uă, ngai 25/07, Anih duh broă Làng bol càr Dăk Lăk neh geh Sră đơng lam sồr ală sờh, mpồl, gah mờ gơnoar ătbồ ƀòn lơgar lam lơh kràñ cê jơh nùs, ndrờm bal ală broă lơh rơcăng, kơryan kòp bơtờp tàm jơh gùt càr.

Jơh gùt càr Dăk Lăk tŭ do geh rlau 1 tơlak 200 rbô nơm sur. Bơh bồ nam tus tŭ do, Dăk Lăk neh lam cĭt rơcăng ờs mờng jăt tơngai dơ̆ 1 ai mpồl phan ròng in. Bulah bè hơ̆, bàr pe ƀòn lơgar kung gam sơl khà cĭt rơcăng dồ êt, is ồn tàm mpồl sur mờ iar ada.

Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt: Bal mờ broă lơh pràn cĭt rơcăng, tơn jơh khih lơh kloh kòp, gah lơh broă geh gơnoar càr kung lơh kràñ gròi sền jun pơnding, gơsơ̆t lơh puăc, tăc blơi phan kis; mơkung pơlam ală hìu lơh jăt ròng siam niam sàng goh siñ họk, lơh sàng goh wàng ròng, gŏ gờñ mờ bơsong jơh ală tiah geh kòp.

“Mờ ù tiah càr tŭ do ơnàng ngan, bol hi sơlơ tơngguh tai broă lơh sồr lơh bơh ală anih, is ồn oh mi kwang bàng bơta chài tàm ală anih pal ya di tŭ tus Kụk in, tă pơgồp jơnau đơs ai đơng lam Sờh in nàng sồr lơh di tŭ. Broă lơh do bol hi ai lài khà dùl. Kwang bàng anih pal dong kờl tơn ai sàh in, lòt bal mờ kwang bàng sàh. Tŭ do kwang bàng sàh lơh sir broă den kung ndrờm bal mờ gah lơh sir broă jàu”.

Ai tàm càr Gia Lai, bơh lồi nhai 6 tus tŭ do, jơh gùt càr neh gĭt gŏ 5 tiah geh kòp jê ndul gơjroh sur câu Phi mờ kờpm jơh khà rlau 300 nơm sur gơtìp tơ̆p pơrgŭc. Bơta sơrbì sur chơ̆t tềng dà dờng, dà croh lơh ƀơ̆ ƀơl geh gĭt gŏ tàm uă ƀòn lơgar bè: Bình Hiệp, Bình An, Hoà Hội, Tuy Phước Bắc, Hoài Ân, Ân Tường mờ Bồng Sơn… Bơta geh ngan do gam lơh gơguh tai jơnau pơhìn lơh bơtờp kòp jê ndul gơjroh sur câu Phi tàm uă tiah. Poh lài, ală mpồl lơh broă sơnah ƀòn Hội Phú (Gia Lai) neh pal gùt mang àng tơn kwă ƀồc sur chơ̆t tàm dà croh mờ bồr tơ̆p jăt di ală jơnau pơlam rơcăng kòp bơtờp. Ồng Vũ Mạnh Định- Củ tịc Anih duh broă Làng bol sơnah ƀòn Hội Phú, pà gĭt: “Anih duh broă Làng bol sơnah ƀòn neh sồr mpồl kwang àng lòt sền, gròi sền broă jun pơndiang sur tàm ƀòn lơgar, pờ sền camera jòi ală cau sơrbì sur chơ̆t tàm dà croh Hội Phú. Dilah gŏ pal lơh glài kràñ. Dơ̆ bàr là sồr mpồl đơng lam ling klàng sồr ling klàng làng bol gàr ƀòn kwă ƀồc sur chơ̆t, tơn jơh khih lơh kloh ƀơ̆, tơ̆p pơrgŭc tus 1 jiơ mang hơ̆ sồng jơh; mblàng yal ală hìu làng bol rơcăng kơryan bal kòp bơtờp”.

Tềng đăp bơta ờ ƀươn soh, bơh ngai 16/07, càr Gia Lai neh lơh ală mpồl sok sền kòp bơtờp phan kis ală gah tàm 4 anih bơtờp uă kòp tàm ală gơl gùng dà lơgar tờm, geh: Bình Đê, Song An, Ia Khươl mờ Ia Le. Ală anih sok sền rơ̆p lơh broă sùm nàng kờñ sok sền niam ală broă jun pơndiang, lòt rê phan kis mờ phan bơna bơh phan kis lik mŭt tàm càr.

Bal mờ hơ̆, gah lơh broă geh gơnoar càr dê gam lam lơh ndrờm bal uă broă lơh rơcăng, kơryan kòp bơtờp bè sền swì ròng siam, jăt sền gơsơ̆t lơh puăc, sơlơ tơn jơh khih lơh kloh ƀơ̆, dong kờl bơsong tiah geh kòp dilah geh mờ lơh pràn broă lơh yal tơnggĭt, mblàng yal tơngguh uă gĭt wă mpồl bơtiàn.