Dăk Lăk lam lài lơh jăt tam kơphê ờ lơh roh brê

VOV4.K’Ho- Tàm tŭ drà kơphê gùt plai ù ngai sơlơ sền gròi uă tus ală jơnau sồr kơ̆ kơl jăp mờ song dơ pă loh làng, kơnhoàl ù tiah tam kơphê tàm Dăk Lăk neh đơs nền bơngă lam lài tàm broă lơh jăt jơnau sồr kơryan roh brê mờ hoàc hươr brê bơh Mpồl tam klăc câu Âu dê (EUDR). Ală mpồl lơh sa kă bro tiah do ờ mìng lơh tam gơl niam wơl ală broă lơh sa mờ gam lơh ală anih yal tơnggĭt mờ jòi gĭt anih tờm lơh nàng kờñ tơnggŏ là phan bơna khi dê ờ lơh roh brê- jơnau sồr kờñ ngan nàng tăc tàm drà câu Âu.

Video Player is loading.
Current Time 0:00
/
Duration 0:00
Loaded: 0%
Progress: 0%
Stream Type LIVE
Remaining Time -0:00
 
1x

Tơnơ̆ rlau 01 nam càr Dăk Lăk lam lơh jòi tơrgùm jơnau yal bè tiah tam kơphê, nàng lơh geh jơnau sồr kơryan roh brê bơh Mpồl tam klăc câu Âu (EU) dê, neh geh rlau 25 rbô nă cau lơh broă sa tàm 8 kơnhoàl, ƀòn drà dềt, ƀòn dờng tus bal, geh: Krông Năng, Cư M’gar, Buôn Đôn, Ea H’Leo, Krông Ana, Cư Kuiñ, ƀòn drà dờng Buôn Hồ mờ ƀòn dờng Buôn Ma Thuột.

Kờpm jơh bă ù neh geh tơl jơnau yal mờ geh sră cơng tàng pơgăp 27 rbô lồ, kơphê lơh geh mờr 90 rbô tấn. Nhai 04 nam 2024, Simexco Dăk Lăk là mpồl lơh sa kă bro bơh sơnrờp tàm dunia geh pà 2 pang sră cơng tàng 4C- EUDR lơh geh tơl jơnau sồr bơh EUDR dê. Mpồl lơh sa kă bro do kung neh lơh app EUDR, dipal mờ jơnau cih pa bơh EU dê. Jăt ồng Lê Đức Huy, Kwang Lam bồ dờng Simexco Dăk Lăk, broă gờñ lơh geh ală jơnau sồr bơh EU dê là dùl bơta ƀươn bơh kơphê Dăk Lăk dê tàm drà kă bro: “Bal mờ bơta crăp rơcăng bơh cau lơh broă sa Việt Nam dê kung bè ală lơh bal kơ̆ kơl jăp bơh Việt Nam dê den tus tŭ do bulah ờ hềt lơh jăt mơya bàr pe hìu coh măy khi kung gam dờp blơi sơl mờ khà jờng nàng pơn jăt tai pơn jờng ală mpồl lơh bal do lơh bal mờ gơ̆p nàng bơtàu tơngguh mờ gròi sền kràñ rlau jăt ală jơnau sồr ờ lơh roh brê bơh câu Âu”.

Jơnau cih kơryan roh brê mờ hoàc hươr brê- EUDR dê geh lơh jăt tàm nhai 01 nam 2026 tus. Jơnau cih do gơdờp tơn tus gah kơphê- dùl tàm ală bơta phan tăc mờ lơgar ndai tờm ngan, geh tus pơgăp bơh 40% tus 50% kờp jơh khà tăc mờ lơgar ndai bơh Việt Nam dê tus drà EU. Jăt ồng Trịnh Đức Minh, Củ tịc Tơrgùm ală mpồl kơphê Buôn Ma Thuột, gơ wèt mờ càr Dăk Lăk, càr tờm tam kơphê bơh jơh gùt lơgar dê bal mờ rlau 200 rbô lồ, broă lam lơh gờñ broă lơh jăt jơnau cih do, pà gŏ bơta sơrbăc mhar bơh gơnoar ătbồ càr Dăk Lăk mờ ală mpồl lơh sa kă bro dê, dong gah phan kơphê- gah tăc phan mờ lơgar ndai tờm ngan càr dê tơngguh uă bơta pin dờn, priă jền mờ bơngă tàm drà ală lơgar.

“ Lơh jăt geh EUDR rơ̆p tơngguh uă geh priă jền, tăc geh tàm drà tàm câu Âu. Dơ̆ bàr, lơh niam wơl rùp hiñ gah phan kơphê Việt Nam. Jơnau sồr bơh EU dê kal ke ngan mờ bol he lơh geh, tăc mờ khà uă tus drà EU den rùp hiñ bol he dê niam ngan”.

Jăt ồng Nguyễn Hoài Dương, Kwang Lam bồ Sờh Broă lơh sa mờ Bơtàu tơngguh Ƀòn lơgar càr Dăk Lăk, dùl tàm ală broă lơh tờm ngan bơh Dăk Lăk dê nàng kờñ lơh jăt EUDR là broă lơh dồ anih ơn prăp ală jơnau yal brê mờ tiah tam kơphê wil tơl, dipal mờ song dơ pă loh làng. Dăk Lăk gam là càr lòt lài gùt lơgar tàm broă lơh jăt jơnau cih bơh EUDR dê mờ tŭ do neh lơh geh pơgăp 50% bă. Càr ơn jơnau kờñ tus nhai 01 nam 2026, geh êt ngan bơh 70% bă kơphê geh tơnggŏ geh anih tờm lơh gơlik. Nàng lơh geh jơnau kờñ do, Dăk Lăk gam lơh ală anih yal tơnggĭt jơnau mờ jòi gĭt anih tờm lơh gơlik, ngui măy mŏk sồ mờ gĭt nền dồ anih, bơto mờ lơh broă bal đah dà lơgar mờ làng bol…wèt tus lơh dồ “anih lơh gơlik tơlir” tơl làm ai gah kơphê Dăk Lăk in đơs is mờ Việt Nam in đơs bal. Ồng Nguyễn Hoài Dương, sền swì: “Sờh Broă lơh sa sươn sre mờ Bơtàu tơngguh Ƀòn lơgar rơ̆p sền swì wơl cồng nha lơh jăt rơndăp lơh adăt EUDR, bơh hơ̆ sồr geh ală broă lơh pơn jăt tai lơh jăt geh cồng nha kung bè bơtàu tơngguh gah phan kơphê kơ̆ kơl jăp. Bulah bè hơ̆, Mpồl tam klăc câu Âu tơn jŏ tơngai 1 nam tai hơ̆ sồng lơh jăt mơya gam uă ngan broă pal lơh, kung kờñ ngan bơta rơcăng lài lòt lài, lơh lài nàng lơh gơlik geh bơta pràn tàm broă tăc kơphê tus drà câu Âu”.

Bal mờ bơta rơcăng lài, jơh nùs lơh jăt ală broă lơh tam phan kơ̆ kơl jăp, sơlơ lơh broă bal tai, pơgồp bal bơta pràn mờ tam pà bal mờng chài đah gah dà lơgar mờ làng bol, Dăk Lăk neh mờ gam đơs nền bơngă lơh lài tàm tam kơphê kơ̆ kơl jăp jăt tơl jơnau sồr EU dê. Do ờ mìng là jơnau kờñ pal geh bơh sơnrờp nàng chồl tơngguh bơtàu tơngguh lơh sa tơlir lơm mờ gam pơgồp bơnah sền gàr phan kwơ geh is dà mờ tiah ơm kis, ngan là tàm tŭ EU lam lơh ală jơnau cih jơh gùt plai ù bè bơtàu tơngguh kơ̆ kơl jăp. Cồng nha lơh geh bơh càr Dăk Lăk dê rơ̆p lơh gơlik geh bơta gơn kơnờm nàng ală tiah lơh kơphê ndai bơh Việt Nam dê pơn jăt tai wèt tus broă lơh tơrlòng lài tam phan kơ̆ kơl jăp.

Viết bình luận