Mpồl Lơh broă bal Ea Tân, kơnhoàl Krông Năng, càr Dăk Lăk geh 220 hìu lơh bal tam kơphê kờp jơh bă kơphê ơnàng rlau 330 lồ. Ồng Nguyễn Trí Thắng, Kwang ătbồ đơng lam Mpồl lơh broă bal pà gĭt, kờñ tơngguh priă jền lơh sa den pal lơh bal lơh gơlik phan jăt broă lơh dờng nàng tơrmù priă tă bơcri bơh chờm, lơh gơlik bơta niam phan bơna ring bal lơh geh ală jơnau sồr, sră cơng tàng ală lơgar dê. Ồng Nguyễn Trí Thắng, đơs: “Giă blơi den mpồl lơh broă bal sùm blơi jơnhoa rlau mờ giă tàm drà tăc blơi mờ mpồl lơh broă bal gam dong kờl ală cau tàm mpồl bè bơta chài lơh phan mờ mpồl lơh broă bal blơi wơl kơphê niam ngan hơ̆. Tơnơ̆ 4, 5 nam den uă ngan cau tàm mpồl neh bơtàu tơngguh geh lơh sa hìu bơnhă mờ kwơmàng ngan rlau jơh là gơ kơ̆ kơl jăp."

Lơh pràn lơh bal tàm lơh gơlik, tăc phan bơna lơh gơlik geh ală anih tăc phan sa niam sàng goh là broă mờ Kông ty Kong kơnòl is dồ nă să (Trăc ñiệm hữu hạn Một thàñ viên) tăc mờ blơi phan lơgar ndai ngai 02- nhai 09 càr Dăk Lăk (Simexco DakLak) gam bơ̆t mòn ală broă lơh geh tàm drà tăc blơi. Tus bal tàm ală anih lơh bal, cau lơh broă sa geh mpồl lơh sa kă bro bơcri sơntìl, phan bơcri tàm broă lơh sa sươn sre nàng iang nùs lơh sa mờ blơi jơh phan bơna mờ giă tăc blơi kơ̆ kơl jăp. Ồng Lê Đức Huy, Kwang Lam bồ dờng Simexco Dak Lak pà gĭt, kơnờm lơh bal, mpồl lơh sa kă bro kung rơcăng lài geh anih phan ngui lơh phan niam ngan. Ồng Lê Đức Huy, đơs: "Kơnòl mờ gĭt wă bơh cau lơh broă sa dê gơgơs là ală cau lơh broă bal. Cau lơh broă sa gơgơs ală cau lơh sa kă bro broă lơh sa sươn sre. Tŭ geh bơta gĭt wă bè hơ̆ cau lơh broă sa lơh broă gơ là niam ngan. Hơ̆ là bơnàng jă kơ̆ kơl jăp ngan nàng ală kông ty ai phan lơh geh bơh sươn sre bơh he dê tus mờ dunia”.

Jơh gùt càr Dăk Lăk tŭ do geh rlau 470 mpồl lơh broă bal lơh broă tàm gah broă lơh sa sươn sre, tàm hơ̆ geh pơgăp 150 mpồl lơh broă bal mŭt bal tàm ală anih lơh bal lơh gơlik phan bơna kă bro. Ồng Huỳnh Bài, Củ tịc Mpồl tam klăc bal Mpồl lơh broă bal càr Dăk Lăk pà gĭt: bơnah uă ală anih lơh bal gam tơrgùm tàm ală phan bơna pràn tờm ngan, bè kơphê, tiêu, kòi phe, ală bơta chi sa plai…Broă lơh bal neh rơhời bơsong jơnau geh lơh is, lơh dềt, lơh rah rài, ờ kơ̆ kơl jăp, ai lơh sa jăt gùng dà tơrgùm bal, lơh geh jơnau kờñ drà tăc blơi dê. Ồng Huỳnh Bài, đơs: “Rơhời mŭt bal mờ ală anih lơh bal do nàng pơlam mpồl lơh broă bal kung bè ală hìu làng bol lơh bal mờ ală mpồl lơh sa kă bro dồ bă kơ̆ kơl jăp nàng gàr niam bè broă pơlam lơh sa kung bè bơta niam phan bơna”.

Jăt ồng Nguyễn Hoài Dương, Kwang lam bồ Sở Broă lơh sa sươn sre mờ Bơtàu tơngguh Ƀòn lơgar càr Dăk Lăk dê, tàm tŭ giă tăc blơi phan lơh geh bơh sươn sre sùm gơ tam gơl den broă sơlơ lơh bal tai tàm lơh broă lơh sa sươn sre gơgơs jơnau ờ gơtùi pleh klàs. Gah broă lơh sa sươn sre gam hòi jà bơcri priă bơ̆t bơtàu ală anih lơh bal tàm lơh gơlik tăc phan bơna, is ồn là mờ ală tờm chi pràn tờm ngan bơh càr dê. Ồng Nguyễn Hoài Dương, đơs: “Bơtàu tơngguh ală tiah lơh sa tơrgùm bal, lơh geh bơta ƀươn bơta pràn bơh tơl tiah dê nàng chồl tơngguh lam lơh sa jăt broă lơh tơrlòng lài lơh bal lơh broă bal gơhòi gơ jà geh uă cau bơcri priă tus geh mờ ală tiah broă lơh sa sươn sre ƀòn lơgar nàng lơh bal lơh broă bal tăc phan bơna mờ is ồn là chồl tơngguh lơh phan bơh sươn sre lơh gơlik geh priă jền gơguh tai mờ tăc phan lơh geh bơh sươn sre kơ̆ kơl jăp ai cau lơh broă sa in”.

Mờ bơta dồ nùs bal bơh cau lơh broă sa, mpồl lơh broă bal, mpồl lơh sa kă bro mờ gơnoar ătbồ dê, uă broă lơh tơrlòng lài lơh bal lơh sa tàm càr Dăk Lăk gam lơh geh cồng nha. Do ờ mìng là jơnau mblàng ai jơnau lùp kơ̆ kơl jăp drà tăc blơi in lơm mờ gam là gùng lòt nàng tơngguh uă priă jền phan bơna. Bơta lơh bal kơ̆ kơl jăp đah cau lơh broă sa, mpồl lơh broă bal mờ mpồl lơh sa kă bro ờ mìng lơh gơlik geh bơta bơtàu tơngguh bơnĕ bơnài tàm ală bơta kwơ mờ gam là broă nàng lơh broă sa sươn sre sơrlèt ală bơta lòng bơh drà tăc blơi dê, wèt tus dồ rài broă lơh sa sươn sre kơ̆ kơl jăp.