Jăt jơnau yal tàm pơrjum, tus tŭ do, càr Dăk Lăk neh tam geh rlau 15 rbô 200 lồ sầu riêng, gơguh 13 rbô lồ pơndrờm mờ nam 2015. Sầu riêng lơh geh tàm nam 2022 do là rlau 150 rbô tấn mờ digơlan geh gơguh tus 300 rbô tấn tàm nam 2025. Bè tăc mờ lơgar ndai, nam 2022 là nam sơnrờp sầu riêng càr Dăk Lăk dê kung bè jơh gùt lơgar, geh tăc uă jăt sră pơrgon mờ lơgar ndai tus drà kă bro lơgar Lo, tiah blơi 99% plai sầu riêng tàm dunia dê. Tàm kờp jơh 53 tiah tam geh tăc uă jăt sră pơrgon mờ lơgar ndai, càr Dăk Lăk geh 23 tiah, kờp jơh bă ù ơnàng 1 rbô 450 lồ.

Tơngai pa do, ală mpồl lơh sa kă bro mờ lơgar ndai jơh nùs ngan tàm broă rơcăng lài tiah tam phan, ñă ntàu lơh cau ala măt dan pà mã sồ ai uă tiah tam sầu riêng in. Bulah bè hơ̆ tài bơh ờ hềt loh làng đah gơnoar kwơ mờ kơnòl den tàng neh gơlik geh broă cau lơh broă sa yă mpồl lơh sa kro blơ̆ blăc. Ồng Lê Văn Thành, Kwang ătbồ Ci kụk Tam phan mờ Sền gàr phan tam càr Dăk Lăk dê đơs là, ală mpồl lơh sa kă bro pal kơrhia rlau tàm sră nggal jàu gơnoar lơh cau ala măt mã tiah tam mờ tàm jơnau hơ pơrgon blơi phan bơna, nàng pleh ală dơ̆ broă ndrờm bè do digơlan gơlik geh. Ồng Lê Văn Thành, đơs: Mpồl lơh sa kă bro pal geh cau lơh broă sa ai, jàu gơnoar lơh cau ala măt, geh sră nggal kĭ hơ niam. Ai sră hơ blơi phan bơna, là hơ mờ làng bol lơh broă sa mờ ờ gŏ di là pal hơ mờ Kụk Sền gàr phan tam mơya jơnau hơ hơ̆ kung pal geh pơyua ai Kụk Sền gàr phan tam in gĭt sơl.

Bơdìh mờ 23 mã sồ tiah tam mờ 4 anih ơn prăp tàm kơldung neh geh pà mờ geh dờp ai tăc uă jăt sră pơrgon mờ lơgar ndai, Dăk Lăk geh 15 mã sồ tiah tam gam ơm kơ̆p sền swì kĭ, 35 mã sồ gam lơh, kờp jơh bă ù ơnàng rlau 2 rbô lồ. Tơm bơh bơr mờ cau lơh ƀăo bơh VOV dê kềng dơ̆ pơrjum, ồng Trần Quốc Toàn, Phó Kwang ătbồ Ci kụk ătbồ bơta niam phan lơh geh bơh sươn sre, brê bơnơm mờ phan tàm dà càr Dăk Lăk dê pà gĭt, nùs nhơm cau tam sầu riêng dê tàm càr tŭ do gam uă jơnau kơlôi rơcăng, ờ gŏ jơh nùs lơh bal mờ mpồl lơh sa kă bro tăc mờ lơgar ndai. Ngan den tàng bè hơ̆, broă lơh bal, pà mã, blơi tăc mờ lơgar ndai, kờñ pal lơh gơ in loh làng ngan, pleh ală jơnau pơlai soh hơ̆ tơnơ̆ do. Ồng Trần Quốc Toàn, đơs: Khi đơs là khi ờ gŏ kĭ mờ cau lơi ờ, tài bơh khi kung gam ờ hềt dòn kơnờm cau lơi sơl. Añ lùp khi, ñchi gơlơh ờ gŏ dòn kơnờm, den khi đơs là tŭ do kĭ, ngai hìng hìng nau geh jơnau lơh nùs is, rồn bơklơn bol añ den lơh bè lơi do hă. Bè hơ̆ den tàng ală bơta hơ̆ là pal geh jơnau hơ pơrgon mờ cih loh ñcau là cau lơh ala măt nàng bơsong ală bơta tam pìt tam phà hơ̆. Adat Lơh sa, adat broă làng bol neh geh, mơya bơsong ală bơta tam pìt tam phà bơh làng bol dê kung gam kal ke sơl.

Năc lòt còp sền sươn sầu riêng hữu kơ tàm kơnhoàl Krông Pach, càr Dăk Lăk dê (rup: Ngô Minh Phương dê cùp)

Nàng bơsong uă ngan rlau jơh ală bơta gơkòl tàm broă lơh bal bơtàu tơnguh gah phan sầu riêng, tơnguh uă bơta pràn tàm pơrlòng tàm broă tăc mờ lơgar ndai, kwang đơng lam bồ Ủy ƀan Ñân zân càr Dăk Lăk sồr ală anih lơh broă geh gơrềng tơnguh uă cồng nha ătbồ, pơgồp bal niam mờ bơsong di tŭ ală jơnau digơlan gơlik geh, hòi jà bơyai lơh ală mpồl sầu riêng nàng lơh mờng chài gah phan geh bơta pràn do. Ủy ƀan Ñân zân càr Dăk Lăk kung neh geh broă rơndăp lơh lòt sền jăt sền, bơtàu tơnguh mã sồ tiah tam mờ anih ơn prăp tàm kơldung sầu riêng. Jăt broă rơndăp lơh pa ai lơh jăt, 6 sở ngàñ tàm càr, ală mpồl mờ mpồl đơng lam mpồl, Ủy ƀan Ñân zân kâp kơnhoàl, ala măt ală tiah tam mờ anih ơn prăp tàm kơldung neh geh jàu 16 kơnòl broă loh làng, dipal mờ gơnoar broă bơh he dê nàng lơh ală tiah tam sầu riêng kơ̆ kơl jăp jŏ jòng, pà mã sồ tiah tam mờ jăt sền nền bơh tam tus tăc bro plai sầu riêng tàm ală kàl tus.