Tàm bă ù ơnàng dùl lồ mờ nggùl sầu riêng tam bơrlŭ bal mờ kơphê pơgăp 200 tờm ờ hềt geh màh sồ tiah tam, mò H’Myka Mlô tàm sàh Ea Knuếc, càr Dăk Lăk lài do mìng tăc phan bơna bơh cau kă phan lơm. Giă tăc blơi, drà tăc tài bè hơ̆ kơldìng uă tàm gah lòt gùng. Tŭ geh gơnoar ătbồ ƀòn lơgar dong kờl lơh sồ tiah tam, mò H’Myka Mlô gơn kơnờm sươn chi hìu bơnhă dê rơ̆p geh jơnau yal tơnggĭt, anih loh làng tàm ală jơnau yal tơnggĭt, bơh hơ̆ ai tơl bơta nàng mpồl lơh sa kă bro tăc mờ lơgar in gĭt, lùp tơn, tơngguh uă giă tăc mờ kơ̆ kơl jăp drà tăc.

 “Tŭ do, den Anih duh broă sàh geh kwang bàng bơto pơlam ai bol hi in bè lơh sồ tàm gah broă lơh sa sươn sre, ală cau lơh broă sa bol hi kơ̆p kờñ mờ dùl nùs ngan bal. Jơh ală hìu bơnhă rơcăng nùs nhơm, rơcăng jơh ală sră pơ àr nàng lơh jơnau yal tơnggĭt lơh sồ tiah tam”.

Bal mờ hìu bơnhă mò H’ Myka Mlô, uă hìu làng bol lơh broă sa mờ mpồl lơh broă bal tàm càr Dăk Lăk kung neh rơcăng lài pà sră nggal, jơnau tơnggĭt bè bă ù, anih ù ơm mờ ală tŭ tam phan nàng lơh loh làng, lơh màh sồ tiah tam. Ồng Trần Văn Thắng, Kwang Lam bồ Mpồl lơh broă bal Broă lơh sa sươn sre Tơlir Krông Pắc, đơs là, ală broă lơh do mùl màl là broă lơh niam wơl gùng dà lam lơh sa mờ ătbồ broă ală anih lơh gơlik phan gam geh ală mpồl lơh broă rơcăng. Tàm mpồl lơh broă bal, rlau 70% tus 80% bă ù neh geh jơnau sồr VietGAP dê, mơkung lơh jăt cih yal pah ngai tàm internet tàm uă nam do. Broă lơh loh làng jơnau tơnggĭt dơ̆ do pơgồp bơnah dong phan lơh geh bơh sươn sre ƀòn lơgar dê đơs nền bơta niam, pờ ơnàng drà tăc mờ lơgar ndai mờ tơngguh uă pràn tàm pơrlòng.

“Bol hi kung neh geh bơta rơcăng bè cih yal pah ngai tàm điện tử, tiah tam mờ lơh VietGap bơh uă nam do, ờ gŏ di là tŭ do hơ̆ sồng sơnđờm. Bol hi rơ̆p pơn jăt tai lơh pràn lơh sồ. Tŭ geh tŭ niam tăc mờ lơgar ndai, ală mpồl lơh sa kă bro gơtùi ai phan bơna tăc tus drà ală lơgar. Añ dòn pràn tàm pơrlòng bơh sầu riêng Việt Nam dê rơ̆p rơhời geh tơngguh tai”.

Dăk Lăk tŭ do geh rlau 410 màh sồ tiah tam sầu riêng, mờ bă ù pơgăp 11 rbô lồ mờ 73 anih dăp ơn klơm geh pà màh sồ. Tàm tŭ hơ̆, kờp jơh bă sầu riêng ƀòn lơgar dê pơgăp 44 rbô lồ, plai sầu riêng nam 2026 digơlan geh pơgăp 500 rbô tấn. Bơnah broă kờñ pal kờp sền wơl, lơh loh làng, cih yal mờ tàm tơrbŏ tài bè hơ̆ uă ngan. Bulah bè hơ̆, ƀòn lơgar jơh nùs lơh ngan lơh sir kơnòl broă do.

Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, jơnau kờñ bơh broă lơh dê ờ gŏ di gơ ơm wơl tàm broă tă sờr dùl anih gơkòl bè sră nggal halà jòi gĭt anih tờm lơh lơm. Kwơmàng rlau, do là ală tŭ tam gơl gùng dà lơh sa, ătbồ mờ tàm tơrbŏ drà kă bro, lơh bơnàng jă nàng gah phan sầu riêng bơtàu tơngguh song dơ pă loh làng, kơnhăp jŏ mờ tơngguh uă pràn tàm pơrlòng tàm drà ală lơgar.

“Đơng lam neh sồr bol hi tus nam 2030, gah Broă lơh sa sươn sre pal geh êt ngan rlau jơh bơh 30% khà lơh jăt tam gơl sồ jơh gùt gah. Broă ai jơh ală jơnau tơnggĭt ơn tàm bơnàng jă sồ là broă lơh kwơmàng nàng kờñ lơh song dơ pă loh làng jơh ală broă lơh sa kung bè ală jơnau sồr bơta niam, lơh geh di ngan jơnau sồr bơh tơl gah phan tăc mờ lơgar ndai dê tàm tơngai tus”.

Bơta tờm ngan ờ gŏ di là ai sră nggal mờ pơ àr tơmŭt tàm anih sồ, mờ bơ̆t bơtàu ală jơnau yal tơnggĭt geh tơl pràn gĭt nền măt, pà gĭt ngan ngồn, cih yal mờ tam pà, gơ jăt bal tơl tiah tam, anih dăp ơn klơm mờ jơnau tơnggĭt lơh sa gơtùi sền swì lơh cơng. Do kung là broă lơh loh làng nùs nhơm Jơnau lơh nền tàm pơrjum 57 Ƀộ Chính trị dê, ai jak chài măy mŏk, tam gơl pa bơceh lơh mờ jơnau jơnau tơnggĭt sồ lơh bơta pràn gơn kơnờm bơtàu tơngguh.

Dong kờl Dăk Lăk mờ ală ƀòn lơgar lơh jăt kơnòl broă do, Ƀộ Broă lơh sa sươn sre mờ Tiah ơm kis gam ai mpồl lơh broă tus kâp hơđơm, tàm bơta kâp sàh dơ̆ sơnrờp geh jàu kâp bàr pe kơnòl broă bè màh sồ tiah tam. Ồng Nguyễn Quang Tin, Phó Lam bồ Vụ Jak chài mờ Măy mŏk gơ wèt Ƀộ Broă lơh sa sươn sre mờ Tiah ơm kis đơs là, tŭ jơnau yal tơnggĭt geh tàm tơrbŏ, jơnau tơnggĭt tiah tam ờ gam tai là sră nggal ơn prăp mờ gơgơs jơnau yal tơnggĭt ngui bal, drơng lơh sa, sok sền bơta niam, lơh gơlik phan, kă bro phan mờ tăc mờ lơgar ndai.

“Do ngan là dùl tàm ală bơta kwơmàng ngan: đal gĭt măt mờ gơtùi sền swì geh phan bơna, tơnơ̆ hơ̆ gơtùp jòi gĭt nền anih tờm lơh tus tơl phan bơna. Ală cờn jơnau yal tơngĭt digơlan rơ̆p geh 5 cờn, bơh Anih tờm jơnau yal tơnggĭt dà lơgar tus ală ƀộ, gah, ƀòn lơgar; mpồl lơh sa kă bro; sàh, mpồl lơh broă bal mờ làng bol. Tŭ geh ală jơnau yal tơnggĭt tàm tơrbŏ bal, ală jơnau tơnggĭt gơlik geh tàm ală tŭ lơh sa, kă bro, kă bro phan kung bè ătbồ broă, đơng lam lơh jăt gơtùi geh jòi ai di ngan mờ song dơ pă loh làng”.

Dăk Lăk gam jơh nùs lơh ngan tam gơl gùng dà ătbồ broă pa gơ wèt mờ gah phan sầu riêng. Tŭ tơl tiah tam, anih dăp ơn klơm mờ phan bơna ndrờm geh jơnau tơnggĭt geh lơh loh làng, sền swì geh mờ tàm tơrbŏ, jơnau yal tơnggĭt rơ̆p gơgơs phan ngui kwơmàng nàng ătbồ, sok sền bơta niam, song dơ pă loh làng ală anih lơh gơlik phan mờ tơngguh uă bơta kwơ phan lơh geh bơh sươn sre ƀòn lơgar.

Jơnau lơh nền sồ 36 nam 2026 bơh Chính phủ dê neh lơh tơrmù sră nggal ai màh sồ tiah tam, hìu dăp klơm phan, ai tơl bơta ƀuơn rơlao nàng làng bol mờ mpồl lơh sa kă bro in. Mơya, nàng ală jơnau geh ai pa mŭt tàm mùl màl, pal geh mpồl lơh broă bơto sồr, lơh broă bal tơn mờ làng bol lơh broă sa. Tàm jơnau đơs ngai do, cau cih jơnau tàm gah do neh geh dơ̆ lùp ồng Lê Quốc Thanh, Kwang Lam bồ Anih tờm Dong kờl bơto pơlam broă lơh sa suơn sre Dà lơgar bè gơnoar bơh mpồl dong kờl bơto pơlam broă lơh sa suơn sre dê tàm broă lơh do. Jà làng bol mờ ală bơyô iăt bal.

Ơ ồng, lơh jăt Jơnau lơh nền sồ 36 nam 2026 bơh Chính phủ dê, mpồl lơh broă dong kờl pơlam broă lơh sa suơn sre geh gơnoar bè lơi tàm broă dong kờl ală càr, ƀòn dờng bal mờ làng bol lơh broă sa suơn sre lơh jăt ală jơnau geh ai nàng ai màh sồ tiah tam, hìu dăp klơm phan bè lơi?

Ồng Lê Quốc Thanh: “Chính phủ ai ngui Jơnau lơh nền sồ 36 nàng lơh tơrmù jơh sră nggal nàng ai màh sồ tiah tam kung bè hìu dăp klơm phan in. Mơya, bơh tàm sră nggal tus mờ ală broă lơh mờ măi mok tŭ ai tàm broă lơh kung gam gơtìp kal ke. Ngan là he pal geh dùl mpồl lơh broă bal.

Ni sơna, Anih tờm Dong kờl bơto pơlam broă lơh sa suơn sre Dà lơgar neh sền sơwì ală pang sră bơto sồr nàng dong kờl làng bol cih măt geh màh sồ. Dơ̆ bàr, bơto sồr lơh jăt Jơnau lơh nền sồ 36, lơh bè lơi tam gơl bơh sră nggal gơs ală broă lơh mùl màl nàng làng bol kơlôi sơnơng.

Pơn jăt tai, bol añ rơ̆p bơto mpồl dong kờl bơto pơlam broă lơh sa suơn sre, bơto ờ mìng ai mpồl dong kờl bơto pơlam broă lơh sa suơn sre in mờ gam geh bal mpồl dong kờl pơlam broă lơh sa suơn sre mpồl bơtiàn in. tàm hơ̆, làng bol di lah kờñ geh bơto, bơsram tào den bol añ tŭ lơi kung rơcang lài. Tŭ do gơtùi pơgồp bal broă bơsram tào tơn mờ pờ tơlik tàm internet, làng bol gơtùi tus bal.

Tus do, bol añ rơ̆p bơyai lơh bơsram tàp ai mpồl dong kờl bơto pơlam broă lơh sa suơn sre tàm gùt lơgar in nàng ring bal tàm jơnau wă, ring bal broă lơh jăt, gơs mpồl tờm bơto sồr làng bol tàm ală tiah in.

Bol añ kung kơ̆p kờñ mpồl lơh broă dong kờl pơlam broă lơh sa suơn sre mpồl bơtiàn bơh ală mpồl lơh broă, bè mpồl Ơruh pơnu, Mặt trận, ală cau gơtùi dong kờl làng bol, lơh broă bal mờ làng bol. Gơnoar atbồ kấp sàh kung pal sền gròi tus mờ broă do sơl, pal geh ală cau gơtùi dong kờl làng bol, geh sồ điện thoại nàng làng bol gơtùi lùp ală bơta lơi.

Tŭ do, ală pang sră neh geh bol añ tơmŭt tàm website Anih tờm Dong kờl bơto Pơlam broă lơh sa suơn sre Dà lơgar dê kung bè ală càr, ƀòn dờng”.

Mìng is gơwèt mờ càr Dăk Lăk, do là dùl tàm ală càr geh sền là geh bă ù tam tờm sầu riêng uă ngan tŭ do dê, Anih tờm Dong kờl bơto pơlam broă lơh sa suơn sre Dà lơgar neh lơh ală broă dong kờl lơi mờ broă rơndăp lơh tàm tơngai tus bè lơi, ơ ồng?

Ồng Lê Quốc Thanh: “Gơwèt càr Dăk Lăk, bol añ neh geh dùl ơdŭ bơto bè ngui, cih măt màh sồ, ală broă geh ai gơwèt mờ Jơnau lơh nền tàm pơrjum sồ 36 dê kung bè ală broă tam kơl jăp gơwèt mờ tờm sầu riêng bal mờ ờ uă phan tam ndai.

Bol añ neh sền sơwì pang sră mờ jào nàng ală tiah tàm càr Dăk Lăk in. Tus do, bol añ rơ̆p pơn jăt tai pờ geh ală ơdŭ bơto, bơsram tàp ai mpồl lơh broă dong kờl bơto pơlam broă lơh sa suơn sre càr in. Bol añ neh ring bal broă rơndăp lơh, lơh bè lơi nàng geh mpồl lơh broă bal mờ làng bol tàm ală ƀòn. Broă rơndăp lơh là dùl jơnau, mơya mpồl lơh broă bal mờ làng bol tàm ƀòn lơgar hơ̆ sồng di là kwơ màng. He pal geh dùl mpồl tŭ lơi kung rơcang lài nàng dong kờl làng bol tŭ làng bol kờñ”.

Ơ ồng, tàm mpồl broă dong kờl pơlam broă lơh sa suơn sre tŭ do geh broă tus bal niam bơh mpồl dong kờl bơto pơlam broă lơh sa suơn sre mpồl lơh sa kă bro dê. Ồng đơs bè lơi bè gơnoar bal mờ nùs nhơm jăk bơh mpồl do dê tàm broă dong kờl ngui bơta jăk chài, măi mok đơs bal mờ lơh jăt broă ai màh sồ tiah tam, hìu dăp klơm phan đơs is?

Ồng Lê Quốc Thanh: “Bol añ đơs là tŭ do Bộ Broă lơh sa suơn sre mờ Tiah ơm kis neh ai ngui broă bơtàu tơnguh dong kờl pơlam broă lơh sa suơn sre. Tàm hơ̆, bol añ sền mpồl dong kờl pơlam broă lơh sa suơn sre bơh mpồl lơh sa kă bro dê kung bè mpồl dong kờl bơto pơlam broă lơh sa suơn sre ală kấp ndrờm là dong kờl pơlam broă lơh sa suơn sre lơm.

He pal geh kơnòl dong kờl làng bol, lơh broă bal mờ làng bol mờ bơsong ală bơta làng bol gơtìp tŭ lơh jăt broă lơh sa, bơh broă jòi tiah tờm tus mờ màh sồ tiah tam.

Kwơ màng rơlao tai, pal lơh broă bal mờ làng bol tàm jơh tơngai lơh sa, tơrgùm geh ală gùng dà broă lơh măi mok. Ală bơta geh ai gơwèt mờ lơh sa, ờ gŏ di là broă bè jơnkah khà, ờ gŏ di là broă bè bơta bơkah phan geh lơh, ờ gŏ di là broă jơnkah sơnơm sền gàr phan tam, he sùm pal yal lài nàng cau lơh sa, sùm pal bal mờ cau lơh sa nàng phan geh lơh geh ală khà niam mờ drà kă bro kờñ”.

Ơi, dan ưn ngài ồng bè ală jơnau yal tơngit pa do!