Tàm dơ̆ lòt lùp sền tàm tơrbŏ drà kă bro tàm càr Dăk Lăk tàm nhai 08 nam do, ồng Niick Ruzzo, kwang đơng lam bồ bồ Kông ty VOS Advisory tàm lơgar Mỹ dê gơlơh kờñ ngan mờ ală phan bơna ồi ào pa mờ phan ngui soh pa tàm hìu bơnhă lơh bơh nsồp bùñ. Ồng Niick Ruzzo đơs, ală phan bơna bơh nsồp bùñ pa krơi, is rơmis ngan mờ đềt mềr mờ tiah ơm kis neh rề ơnàng tai pơlam gùng dà nàng ồng tàm tơrbŏ bơcri priă, lơh bal kă bro. Ồng Niick Ruzzo, đơs: Añ neh lòt còp dùl tàm ală anih lơh sa sươn dờng bơh bi Nguyễn Phú Tùng dê nàng măt tờm sền gŏ tơn ală tŭ tam phan mờ mùl màl gơlơh kờñ ngan tài bơh bơta lơbơn mờ uă bơta ngui bơh phan bơna dê. Añ gơlơh gơdan gơkờñ ngan rơ̆p geh tŭ niam rề ơnàng drà kă bro mờ yal tơnggĭt phan bơna bơceh lơh bơh bi dê tus mờ uă cau in uă rlau tai.

Cau mờ ồng Niick Ruzzo đơs tus là bi Nguyễn Phú Tùng, là cau tơnggơs mơkung là Kwang ătbồ dờng Kông ty Bơcri priă bal Loofaa, tàm ƀòn dờng Buôn Ma Thuột, càr Dăk Lăk. Jăt bi Nguyễn Phú Tùng đơs, Loofaa geh gơtha là “nsồp bùñ”. Bơh broă lòt sền drà kă bro, bi Tùng sền gŏ nsồp bùñ là phan ngui geh uă bơta ngui, ƀươn ngui mờ đềt mềr mờ tiah ơm kis. Bi mờ ală cau dong broă tơn neh kơlôi sơnơng rơndăp lơh phan bơna, tơnggơs Kông ty nàng tàm tơrbŏ tăc phan. Bơh ală phan bơna bơh sơnrờp ngui tàm hìu ƀềp bè pang dă glah, dă li, phan yờ glah, ràu bơngàn, phan ràu ly…halà ngui tàm hìu um bè phan tho ngkời, che tho ngkời, kơldung ơn sơƀong, nsồp um…tàm ală tŭ lơh gơlik, ală cau lơh broă gam bơceh lơh geh ală phan bơna krơi is ngan bè kơldung ià, sơgơn, đuan, kơldung ơn priă, zĕp…Kông ty gam bơyai lơh ală dơ̆ pơrlòng rơndăp lơh nàng jòi geh ală rùp să pa geh bơta kwơ niam bơnĕ uă. Bi Nguyễn Phú Tùng, pà gĭt: Tŭ do añ geh pơgăp 50 phan bơna. Drà kă bro tăc phan tŭ do là Tây, Hongkong. Ală cau lơh broă bal bè Mỹ, Canada, Nhờk mờ Hàn Quôk kung neh lòt còp tiah tam phan, còp kông ty nàng bal mờ gơ̆p lơh broă bal. Phan bơna bol hi dê tơrgùm tàm phan bơna ngui ai hìu um in kung bè hìu bềp mờ ală phan ngui bơka niam bè sơgơn, kơldung ià, dă mơl khŏ,..geh uă cau sền gròi.

Kung jăt bi Tùng yal sơl, tŭ do pah nhai kông ty lơh gơlik gĭt nđờ rhiang rbô phan bơna ngui ai hìu um, hìu ƀềp in, is ồn gơ wèt mờ ală phan bơna ngui soh pa tŭ do den khà dồ êt rlau, gơ jăt tàm khà sră dan blơi phan kung bè anih tam phan ngui, mờr 2 nam do, Kông ty bơcri priă bal Loofaa neh lơh bal mờ 8 hìu làng bol tàm ƀòn dờng Buôn Ma Thuột mờ kơnhoàl Krông Buk, tam rlau 20 lồ bùñ nàng ai nsồp, kĭ sră hơ blơi jơh bal mờ giă hơ pơrgon 5 rbô đong dồ nai plai. Bi H Wên Êban ơm tàm sơnah ƀòn Khánh Xuân, ƀòn dờng Buôn Ma Thuột, càr Dăk Lăk dê yal, pơndrờm mờ tăc bùñ mơda den broă kĭ hơ sră hơ pơrgon mờ kông ty cèng wơl cồng nha lơh sa niam rlau. Bi H Wên Êban, đơs: Lài do tàm hìu kung neh tam sơl biăp rao, tŭ kĭ sră hơ pơrgon tăc phan mờ Kông ty Loofaa dồ nam tam geh 2 kàl bùñ, dồ kàl tơnhàu geh 30 rbô nai plai bùñ, priă lơh geh pơgăp 300 tơlak đong dồ nam.

Mờ khà lơh sa tŭ do, kông ty gam pơgồp bơnah lơh geh broă lơh sùm ai 15 nă cau lơh broă in, bal mờ priă nhai bơh 3 tus 6 tơlak đong dồ nhai. Bi Nguyễn Thị Nguyệt Hồng ơm tàm sơnah ƀòn Khánh Xuân, ƀòn dờng Buôn Ma Thuột lơh broă tàm do pà gĭt: Añ lơh broă tàm do rlau dồ nam rao. Broă lơh pah ngai là mai, koh, rơndăp lơh kơldung, sơgơn. Broă lơh tàm do gơ là gơlơh niam ngan tàm bồ tơngoh, tiah lơh broă đềt mềr, tơl nă cau gơ tam klăc gơ tàm sòr bal, priă nhai pơgăp bơh 5 tus 6 tơlak đong den kung là kơ̆ kơl jăp sơl.

Bal mờ broă bơceh lơh gơlik uă phan bơna pa bơh phan ngui nàng lơh phan bơh nsồp bùñ, bi Nguyễn Phú Tùng mờ ală cau lơh broă bal tơn kơ̆p gơn pơgồp bơnah chồl tơngguh ngui sa tơlir mờ sền gàr tiah ơm kis, mơkung lơh gơlik geh tai broă lơh, tơngguh uă priă lơh geh ai làng bol in. Bal mờ ală phan bơna gam geh tŭ do, kông ty kung gam jòi sơnơng bơceh lơh gơlik ală phan bơna pa nàng tơngguh tai bơta kwơ ngui bơh nsồp bùñ dê.