Tàm pơrjum drà yal tơnggĭt phan bơna geh bơyai lơh tàm Buôn Ma Thuột, ală cơldŭ phan OCOP mờ phan pơnrơ is ƀòn lơgar dê tŭ lơi kung bềng cau năc ñồm. Bi Huỳnh Thị Thủy, dùl nă cau ngui sa tàm càr Dăk Lăk yal: Bơta bi sền gròi lài ngan là bơta niam mờ anih tờm lơh gơlik. Bi ai lài rwah ală phan bơna rềp mềl, loh làng bè anih tờm lơh mờ is ồn là bơh cau Việt Nam dê lơh gơlik, tài bơh hơ̆ kung là broă nàng dong kờl phan Việt Nam.

“Añ kơ̆p kờñ ală phan bơna ngai sơlơ geh tơngguh uă bơta niam, yal tơnggĭt làm uă nàng làng bol in ƀươn gĭt rlau. Bơdìh mờ bơta niam, rùp bơka kung kwơmàng ngan, tài bơh cau ngui sa sùm gơlơh kờñ bơh chờm tàm kơldung sền niam măt. Dilah bal dùl phan bơna mơya geh uă bơta, uă rùp să den rơ̆p lơh geh jơnau kờñ rơ̆ ru bơh uă rơnàng cau năc blơi dê”.

Bơta tam gơl tàm mờng kwèng ngui sa do neh lơh gơlik bơta kơn jơ̆ mơya kung là gơn kơnờm nàng ală anih lơh gơlik phan in tam gơl pa. Tàm broă mai soh, mò Nguyễn Thị Đượm, cau tờm anih lơh gơlik ồi niam chài Tây Nguyên tàm sơnah ƀòn Buôn Ma Thuột, càr Dăk Lăk neh gĭt geh jơnau kờñ mờ kơ̆ nùs tam gơl nàng gàr jơng năc blơi phan. Mò Đượm yal:

“Mờ bơta kờñ tàm drà tŭ do, năc tus Buôn Ma Thuột den ndrờm bè jơh ală cau kờñ soh phan ờs mờng bơh yau mơkung geh sơl năc  den cau kờñ soh phan mai jăt rài pa tŭ do. Mơya uă ngan khi kờñ soh phan ờs mờng bơh yau uă rlau. Bơta pràn bơh he dê là he gơtùi lơh geh jơnau kờñ bơh năc blơi phan dê”.

Tàm gah phan sa, uă anih dềt kung jòi gùng pa. Bi Dương Thị Trúc Linh ơm tàm sơnah ƀòn Tuy Hoà, càr Dăk Lăk là cau tờm măt kă bro phan tĕ Út Vũng Tàu phan bơna OCOP 3 sơrmañ, yal: nùs nhơm cau ngui sa dê neh geh uă tam gơl. Cau ờ mìng sền gròi tus bơta ƀươn kwơ, giă tăc blơi mờ ngai sơlơ sền dờng màng bơta song dơ pă loh làng tàm ală broă pơlam lơh gơlik phan, bơta niam sàng goh kung bè rùp să đah bơdìh sền hèr măt bơh phan bơna dê.

“Ală phan bơna ndrờm geh lơh bơh phan ngui ƀòn lơgar, geh sră cơng tàng hữu kơ hơ̆ là ờ ngui sơnơm sền gàr phan tam den tàng geh kờñ ngan. Gùng dà ngui sa tŭ do là sa sàng goh, ngan là mờ phan bơna ai kòn dềt in. Do là dùl mpồl gơguh pràn mờ bol hi gam tơrgùm”.

Ală mpồl lơh sa kă bro dờng kung gam tam gơl loh làng bè dùl mpồl cau năc blơi phan. Jăt bi Châu Yến Duyên, Kông ty Kong kơnòl nă să is Sềm bar bèt chàng Thành Dung tàm sàh Krông Pach, càr Dăk Lăk yal: Lài do, kông ty mìng lơh gơlik ală phan sềm bar bèt kas ngan nàng tăc mờ lơgar ndai. Bulah bè hơ̆, tŭ do, kông ty ngai sơlơ sền gròi tus drà tàm dơlam lơgar mơkung lơh li la phan bơna nàng gơhòi gơ jà uă năc blơi phan rlau.

“Kông ty neh kơlôi sơnơng mờ ai tơlik măt ală phan bơna dipal mờ mpồl năc blơi phan geh priă di mơ, bè ală phan bơna bar bèt khàr li la bè rùp să mờ bơta ƀô bơkah nàng năc blơi phan in săc rwah. Bơdìh hơ̆ tai, bol hi gam lơh uă phan bơna bar bèt pơr bơkah ngan, geh giă lơh gơs phan dipal mờ ƀươn kwơ tài bơh gơtùi ngui sa mơ tơn”.

Ală jơnau yal bơh cau ngui sa mờ mpồl lơh sa kă bro dê pà gŏ, bơta pơgồp bal đah bàr gah ngai sơlơ kơnhăp ngan. Cau ngui sa kờñ phan Việt Nam tài bơh rềp mềl, song dơ pă loh làng mờ niam sàng goh; tàm tŭ hơ̆, mpồl lơh sa kă bro lơh ngan tam gơl pa nàng gàr bơta pin dờn mờ rề ơnàng bơnah phan tăc tàm drà. Bơta tàm dong kờl bal do ờ mìng dong uă phan bơna ƀòn lơgar càr Dăk Lăk dê geh măt tàm ală drà pa dờng, tus bal drà kă bro phan điện tử, mờ gam pơgồp bơnah lơh gơs măt kă bro phan Việt Nam ngai sơlơ kơnhăp pràn.