Ià tàm tê điện thoại ngăc ngar, mìng bơh bàr pe broă lơh ƀươn soh bè cùp rùp, cih dồ êt phan bơna, anih tờm lơh, giă tăc blơi, broă dong kờl ai pà, ồng Đồng Xuân Liền, Kwang ătbồ Mpồl lơh broă bal Nam Bình, kơnhoàl Dăk Song, càr Dăk Nông neh ai geh phan bơna gar tiêu jù tăc tàm ală drà kă bro tàm internet, bè: Buudien.vn, Shoppee.vn mờ Ocop.vn. Ồng Liền pà gĭt, mpồl lơh broă bal neh geh Mpồl Cau lơh broă sa mờ Ƀưu điện càr bơyai lơh bơto pơlam nàng ai phan lơh geh bơh sươn sre tăc tàm drà kă bro tàm điện tử. Bơh chờm, ồng mờ ală cau tàm mpồl lơh broă bal gơlơh pa ngan, mơya mìng dồ tŭ tơngai lơyah lơm, broă ai phan bơna he dê tăc tàm pang tăc phan tơn tàm internet neh ƀươn soh ngan. Ồng Liền, đơs: Bơh bơto pơlam rê, pờ sền tàm gơnru sră nggal bơto pơlam dồ lơ̆ bal, kơnờm oh kòn kòn sau bơto pơlam tai ƀà den añ ai geh phan bơna bơh mpồl lơh broă bal dê tăc tàm drà kă bro phan tàm internet. Tơnơ̆ dồ tŭ tơngai ờ jŏ neh geh sră dan blơi phan, neh geh sră hơ blơi phan ai mpồl lơh broă bal in, do là bơta chờ hờp ngan.

Bơh tŭ tam gơl tus gah tăc phan tàm internet, mò Nguyễn Thị Ngọc Sen ơm tàm sơnah ƀòn Nghĩa Đức, ƀòn dờng Gia Nghĩa ờ gam pal ntoăt jê duh jơng làm bă tiah tăc rơpung jàl bè lài. Mò pà gĭt, lài do, phan bơna rơpung jàl lơh gơlik mìng tăc uă ai ală hìu ràng tăc phan in halà tăc tơn mờ cau năc kwèng in. Bơh tŭ mŭt bal drà kă bro phan tàm internet den hìu bơnhă mò mìng geh broă pik tơrgùm, klơm kơnhăp kơrhia rơ̆p geh cau lơh broă Ƀưu điện dê tus ai phan, jun dờp năc blơi phan in. Jơnau yal tàm drà kă bro phan điện tử bơh mò Sen dê pà gŏ, ală phan bơna rơpung jàl, bè: Kim Long, Hoàng Long, Kim Hoàng Hậu…geh tam tàm hìu krơh jăt tơl jơnau sồr VietGap dê. Ală broă pơlam sơngka sền gàr, ơn phơng, tuh dà…geh lơh jăt broă lơh ntờc dềt. Lời tĕ ală jơnau gơlơh pa krơi ngan bơh chờm bè măy mŏk, mò Sen chờ hờp tŭ ală phan bơna he dê lơh geh neh tăc tàm drà kă bro phan tàm internet geh cồng nha, geh tŭ tìp mờ năc blơi phan tàm uă tiah rlau. Mò Nguyễn Thị Ngọc Sen, đơs: Geh Mpồl Cau lơh broă sa càr jà lòt pơrjum cribơyai, hơ̆ sồng  geh gĭt ai phan bơna bè rơpung jàl tăc tàm drà kă bro tàm internet. Kung là chờ hờp ngan, tăc geh phan bơna he dê tus  bơdìh càr nàng phan bơna he dê ngai sơlơ gơguh tai. Tŭ do,  dồ kàl tăc geh 1 tấn nggùl mơya kơ̆p kờñ tơnơ̆ do den dồ kàl pal tăc geh bơh 4 tus 5 tấn den priă lơh geh bơh he dê gơguh tai.

Gơ ơm tàm broă lơh ai tơl bơta tam gơl sồ broă lơh sa sươn sre in, bơh nam 2022 tus tŭ do, Mpồl Cau lơh broă sa càr Dăk Nông neh pơgồp bal mờ Ƀưu điện càr pờ ơdŭ bơto pơlam ai cau lơh broă sa in bơta chài ai phan bơna tăc tàm drà kă bro phan tàm internet. Ală ơdŭ bơto pơlam tơrgùm dong kờl bơto bơtê bơta chài sồ, bơta chài lơh broă tàm anih sồ ai kwang bàng mpồl, cau tàm mpồl, ală hìu bơnhă lơh sa, ală mpồl lơh broă bal, mpồl lơh bal in. Mơkung bơto pơlam pờ măt nàng ai ală phan bơna tăc tàm drà kă bro mờ kă bro tàm bơnàng sồ, bơto pơlam cau lơh broă sa lơh jăt ală broă pơlam lơh broă jăt broă lơh tơrlòng lài drà kă bro phan tàm internet. Ồng Hồ Gấm, Kwang ătbồ Mpồl Cau lơh broă sa càr Dăk Nông pà gĭt, tŭ do, cau lơh broă sa mờ ală mpồl lơh broă bal, mpồl lơh sa kă bro gam tìp uă kal ke bè broă ngui măy mŏk yal tơnggĭt jơnau, sră nggal cơng tàng ală jơnau sồr bơta niam phan bơna nàng ai tăc tàm drà kă bro phan tàm internet. Den tàng bè hơ̆, broă dong kờl cau lơh broă sa mờ ală mpồl lơh broă bal là kwơmàng ngan rlau jơh. Ồng Hồ Gấm, Kwang ătbồ Mpồl Cau lơh broă sa càr Dăk Nông, đơs: Lài ngan là ală phan bơna mờ geh tơl jơnau sồr cơng tàng OCOP den pal geh ai tăc tàm drà internet, geh đơs niam mờ khà uă, geh anih tàm rài lơh sa. Rơhời bol he pal ai jơh ală phan bơna tăc tàm drà kă bro phan tàm internet nàng blơi tăc, tàm pơgơl dồ bă loh làng ờ ndơ̆p mpồn, song dơ pă, ƀươn khòm tơrgùm, ƀươn tăc.

Tăc tàm drà kă bro phan tàm internet, phan lơh geh bơh sươn sre bơh cau lơh broă sa càr Dăk Nông dê geh tŭ niam song dơ pă loh làng jơnau yal tơnggĭt phan bơna, yal tơnggĭt uă, tơngguh tŭ niam tìp mờ năc blơi phan geh bơta pràn, mơya kung gơ sồr uă rlau bè bơta niam, rùp să kơldung ơn prăp phan bơna. Ngan ală bơta do gơ sồr cau lơh broă sa pal tam gơl gùng dà lơh sa, sền gròi tus ală jơnau niam lơngăp lơngai, tơngguh uă bơta niam phan bơna, ơn prăp mờ lơh phan tơnơ̆ tŭ pik tơnhàu niam rlau. Geh bè hơ̆, broă tăc tàm drà kă bro phan tàm internet hơ̆ sồng ngan ngồn cèng wơl cồng nha, nàng cau lơh broă sa in lơh geh is tŭ niam ai să tờm phan bơna he dê in.

Hơ̆ là cồng nha lài ngan bơh broă ai phan lơh geh bơh suơn sre càr Dăk Nông dê tus tàm drà kă bro phan tàm internet (điện tử). Tơnơ̆ do cau lơh ƀăo tàm gah jơnau đơs do geh dơ̆ lùp ồng Phạm Tuấn Anh, Kwang atbồ Sở Broă lơh sa mờ Bơtàu tơnguh Ƀòn lơgar càr Dăk Nông bè broă lơh bè lơi nàng lơh pràn broă tăc phan lơh geh bơh suơn sre tàm drà kă bro phan điện tử, ai tơl bơta broă lơh tam gơl sồ tàm broă lơh sa suơn sre tiah do dê.

Ơi, dan ồng pà git ờ uă cồng nha geh pơnrơ ngan bơh broă ai phan lơh geh bơh suơn sre càr Dăk Nông dê mŭt tàm drà kă bro phan điện tử?

Ồng Phạm Tuấn Anh: “Gơwèt mờ gah broă lơh sa suơn sre, dùl tàm ală bơta kwơ màng ngan bol añ sền gròi là lơh bè lơi bơtàu tơnguh, lơh pràn geh broă tăc phan geh lơh bơh suơn sre jăt gùng dà broă lơh cèng geh cồng nha uă ngan ai làng bol lơh broă sa in. Den tàng, bơdìh mờ ală gah broă tăc phan ờs mờng bè lài do, bơh ală hìu tăc, ală mpồl lơh sa kă bro, ală mpồl lơh broă bal, den dùl tàm ală broă lơh hơ̆ là ai tus tàm drà kă bro phan điện tử. Tŭ do, Sở Broă lơh sa mờ Bơtàu tơnguh Ƀòn lơgar neh pơgồp bal mờ Sở lơh sa măi mok mờ Kă bro lơh broă mờ Bưu điện càr nàng ai jơnau tơngit ai khà măt ală hìu lơh sa suơn sre tơmŭt tàm pang web bơh Bưu điện dê. Mờ bol añ neh ai geh ờ uă bơta phan geh lơh bơh suơn sre, tàm hơ̆ is ồn là ală phan geh geh dờp phan OCOP tơmŭt tàm drà kă bro phan điện tử. Cồng nha tŭ do bol añ neh tơmŭt geh 107 dơ̆ phan geh lơh geh dờp phan OCOP tơmŭt tàm ală drà kă bro điện tử shopee, postmart, voso mờ ocop”.

Ơi, broă ai phan lơh geh bơh suơn sre càr Dăk Nông tơmŭt tàm drà kă bro phan điện tử tŭ do gam gơtìp ală bơta kal ke lơi ơ ồng?

Ồng Phạm Tuấn Anh: “Bŭ lah ală phan geh lơh bơh suơn sre đơs bal, phan OCOP đơs is neh geh tơmŭt tàm drà kă bro phan điện tử, mơya, cồng nha bè đah kă bro ờ hềt geh jăt mờ jơnau kơ̆p kờñ. Tàm do geh ală tơngu me, lài ngan, phan bơh he dê lơh ờ hềt geh tơl ală jơnau tơngit tờm nàng di pal mờ jơnau kờñ bơh cau ngui sa dê. Dơ̆ bàr, bơta niam phan bal mờ ờ uă bơta ndai ờ hềt tơl pràn tàm pơrlòng. Dơ̆ pe, bơnah uă làng bol lơh broă sa kung gam ờ hềt tam gơl. Tài làng bol ờ hềt git tàm broă tăc phan tàm điện tử. Den tàng làng bol geh nùs nhơm kơlôi rơcang. Tus do bol añ kung rơ̆p lơh broă mờ ală mpồl lơh broă gơrềng bal, lơh bè lơi nàng bơto, dong kờl làng bol tam gơl jơnau git wă, sền gah tăc phan tàm drà kă bro phan điện tử là dùl tàm ală gah broă tờm, tềm pềr priă tă. Mờ bơh drà kă bro phan điện tử do, geh pơgồp bal tàm broă yal rùp rài phan geh lơh geh bota pràn càr Dăk Nông dê”.

Nàng pơn jăt tai tơnguh cồng nha broă tăc phan lơh geh bơh suơn sre tàm drà kă bro điện tử, lơh pràn broă tam gơl sồ tàm broă lơh sa suơn sre, càr Dăk Nông geh ală gùng dà broă lơh lơi ơ ồng?

Ồng Phạm Tuấn Anh: “Bol añ gam geh broă rơndăp lơh mblàng bơh ală bơta kal ke, ală broă lơh gam ờ pràn bơh să tờm dê nàng ai geh ală gùng dà broă lơh di pal. Lài ngan den lơh bè lơi nàng phan geh lơh geh ndrờm bal bè bơta bơkah, gàr tơl bè khà geh, khà uă, di pal mờ jơnau kờñ bơh drà kă bro dê. Nàng bơsong bơta do bol añ lơh pràn bơh mpồl lơh broă bal. Lơh mpồl lơh broă bal rơ̆p pơgồp bal mờ ală hìu làng bol lơh broă sa, ală phan geh lơh jăt jơnau kờñ. Bơdìh hơ̆ tai, bol añ rơ̆p tơrbŏ bal mờ ală mpồl lơh sa kă bro, ală anih kă bro phan điện tử nàng lơh bè lơi geh broă dong kờl, ai tơl bơta niam ngan nàng làng bol lơh broă sa in tŭ tơmŭt phan tàm drà kă bro phan điện tử. Pal lơh bè lơi nàng làng bol gŏ là, do là dùl gah tăc phan geh cồng nha, lơngăp lơngai, dong kờl tơmù uă priă tă, mờ là gah yal mhar ngan bè phan geh lơh bơh làng bol dê. Bè hơ̆, tàm do bol he pal tam gơl bè jơnau git wă, bồ tơngoh kơlôi sơnơng, bơta do ờ di geh lơh gơs mơ, he pal geh ală gùng dà broă lơh ndrờm bal, mblàng yal ndang, bơto sồr ndang nàng lơh bè lơi làng bol git, gŏ geh cồng nha lơh sa uă tàm broă do”.

Ơi, dan ưn ngài ồng Phạm Tuấn Anh, Kwang atbồ Sở Broă lơh sa mờ Bơtàu tơnguh Ƀòn lơgar càr Dăk Nông.