Să soh àu ram, bồ ndau sơgơn, gòm chèu dờng ndơ̆p jơh să nàng sền gàr pràn kơldang să jan tŭ trồ tiah mrềt noăt ir gơmù tus 10 độ C, bi Nguyễn Thị Yến là cau tàm Hợp tak xã Drơng broă lơh broă sa sươn sre thôn Ngăm Mặc, xã Lãng Ngâm, kơnhoàl Gia Bình, càr Bắc Ninh ià thùng toìh mờ ca neh bŏ lề jăt di jơnau bơto pơlam bơh kwang bàng dong kờl bơto pơlam lơh broă sa sươn sre dê nàng tuh ai sươn blơn sràt, biăp sơvê gam mờr tus tơngai sa nàng ờ ai tu kòp in lơh aniai. Bi Yến pà gĭt, tŭ geh ală kwang bàng dong kờl bơto pơlam lơh broă sa sươn sre mờ geh bal cau jak gah broă lơh sa lơgar Nhờk dê rê bơto pơlam sơl bơta chài, tam jăt tơl ală jơnau sồr sàng goh, hữu kơ bơh lơgar Nhờk dê bi gŏ biăp bùm cồng nha lơh geh mờ bơta niam bal mờ giă tăc jơnhoa rlau. Bi Yến, đơs: Lơh sa jăt tơl jơnau sồr lơgar Nhờk dê ờ gŏ kal ke ờ. Bol hi lơh ală bơta chài, cih tàm sră pơ àr, ờ ƀồm sơnơm hoá họk mờ pal bŏ lề ca, tòih nàng ờ gơtìp tu kòp lơh aniai. Lơh cồng nha ngan.

Hợp tak xã Drơng broă lơh broă sa sươn sre thôn Ngăm Mạc, xã Lãng Ngâm, kơnhoàl Gia Bình, càr Bắc Ninh là dùl tàm ală hợp tak xã geh Anih tờm Dong kờl bơto pơlam lơh broă sa sươn sre Dà lơgar mờ Anih lơh broă Lơh broă bal Dunia lơgar Nhờk Jica dong kờl nàng bơto pơlam, pơlam tàp cau lơh broă sươn sre in lơh gơlik phan lơh geh bơh sươn sre bơkah sàng goh jăt tơl jơnau sồr lơgar Nhờk dê mờ tam gơl bồ tơngoh kơlôi sơnơng tăc tàm drà kă bro jăt gùng dà “tam nàng tăc”, ala tài “tăc phan he tam”.

Ồng Phan Duy Phượng, Kwang ătbồ Hợp tak xã thôn Ngăm Mạc, xã Lãng Ngâm, kơnhoàl Gia Bình, càr Bắc Ninh pà gĭt, nàng rơcăng ai drà kă bro sa tềp bơhiàn yau dà lơgar nam Giáp Thìn 2024 in, Hợp tak xã neh rơcăng lài phan bơna gơguh tus 200 tấn kruăc Canh, mờr 300 tấn biăp, bùm, plai ală bơta, hơ geh tơl phan bơna bơkah sàng goh jăt tơl jơnau sồr VietGap dê, geh tem jòi gĭt anih tờm lơh gơlik loh làng ngan. Ồng Phan Duy Phượng, đơs: Lài do kung tam sơl biăp sơvê tờm dờng, biăp ƀăp sŭ ală bơta, bơh tŭ Jica rê ndo den lơh niam rlau, geh cồng nha rlau, biăp bol hi dê kis dờng ring bal mờ ờ gơtìp tu kòp sa aniai, drà tăc yòm, ală sră dan blơi phan ờ tơl phan. Sa tềp do bol hi tăc tơl khà lơm mờ ờ gŏ jơngkah ờ, tơngai tus tăc tàm drà hơ pơrgon mờ cau ngui sa biăp hợp tak xã bol hi dê là biăp bơkah sàng goh.

Tàm Hợp tak xã Lơh gơlik mờ Kă bro phan lơh geh bơh sươn sre bơkah sàng goh Bạch Đằng, thôn Đại Uyên, xã Bạch Đằng, thị xã Kinh Môn, càr Hải Dương, ală suơn plai thañ long kơnồng pơrhê tam tàm bă ù dờng ơning ơnàng ngan tồn lah bè tàm tiah ring đah jum dà lơgar dê. Plai thañ long là plai chi geh cau kờñ nàng blơi nàng ơn tàm sơlào pram bơta plai chi pơdơng tàm dơ̆ sa tềp. Ồng Nguyễn Văn Thuấn, Kwang ătbồ Hợp tak xã Lơh gơlik mờ Kă bro phan lơh geh bơh sươn sre bơkah sàng goh Bặc Đằng pà gĭt, thañ long tàm do geh ală bơta niam uă rlau, bơkah rlau mờ plai thañ long tam tàm tiah đah jum dà lơgar. Ồng Nguyễn Văn Thuấn, đơs: Tam ờ di kàl geh cồng nha ngan, tăc geh giă rlau. Gơtùi đơs, tàm pơrlòng den uă bơta niam rlau mờ plai thañ long tam tàm tiah đah jum dà lơgar. Bơh tiah đah jum dà lơgar lòt jun tăc tàm do pal roh bàr pe ngai, tàm tŭ hơ̆, plai thañ long tiah đah tô dà lơgar lời dùm tềng hơđang chi, bơkah rlau, mờ tăc tơn tàm drà kă bro tiah đah tô dà lơgar den tàng tàm pơrlòng niam rlau.

Bơh lòt sền ală broă lơh ală càr: Bắc Ninh, Hải Dương, Hưng Yên, ồng Naoki Kayano, Cau jak chài geh broă do bơh Jica dê jờng rơ ngan bơh tus bal jơh nùs bơh làng bol lơh broă sa sươn sre dê, ală hợp tak xã mờ ngan là bơta dùl nùs bal bơh ală anih Dong kờl bơto pơlam lơh broă sa sươn sre dê. Ồng đơs là, dơ̆ sa tềp do rơ̆p là tŭ jơnau kờñ tàm drà gơguh uă mờ là tŭ niam tăc phan lơh geh bơh sươn sre bơh làng bol lơh broă sa dê. Cau lơh sa kờñ pal gĭt nền geh ală jơnau sồr mờ jơnau kờñ tàm drà kă bro bơh ală broă lơh mblàng yal jơnau. Jica rơ̆p pơn jăt tai lơh broă mờ Anih tờm Dong kờl Bơto pơlam lơh broă sa sươn sre dà lơgar mờ ală anih tờm dong kờl bơto pơlam lơh broă sa sươn sre càr dê nàng lam lơh jơh ală broă geh gơrềng bal bè tàm tơn tìp, cribơyai halà pơrjum nàng kờñ chồl tơnguh mờ bơtàu tơnguh rlau tai lơh broă sa sươn sre tàm Việt Nam.

Jăt Kwang ătbồ Anih tờm Dong kờl bơto pơlam lơh broă sa sươn sre Dà lơgar dê là ồng Lê Quốc Thanh đơs, bơh ală cồng nha lơh geh tàm tơngai sơnrờp, tàm tơngai tus, Anih tờm Dong kờl bơto pơlam lơh broă sa sươn sre Dà lơgar mờ mpồl Jica pơn jăt tai rề ơnàng tai broă lơh do ai ală hợp tak xã mờ làng bol lơh broă sa in. Ồng Lê Quốc Thanh, đơs: Tơngai tus bol hi rơ̆p rwah tai 50 hợp tak xã tai mờ lơh tiah lơh sa bơh bol he dê sùm rề ơnàng gơgơs là tiah lơh sa niam. Mờ phan bơna bol he dê ờ mìng jăt dơ̆, jăt tŭ lơm mờ bol he rơ̆p geh phan lơh geh bơh sươn sre bơkah sàng goh tàm sùm jơh gùt nam.

Sa tềp là dơ̆ jơnau kờñ ngui sa ală bơta phan lơh geh bơh sươn sre, puăc ka gơguh uă; ngan là ală bơta biăp, bùm, plai chi bơkah sàng goh, niam jăt tơl jơnau sồr kràñ ngan bơh lơgar Nhờk dê rơ̆p geh drà kờñ ngan. Ală hợp tak xã lơh broă sa sươn sre pà gĭt rơ̆p lơh ngan gàr sùm lơh gơlik phan lơh geh bơh sươn sre bơkah sàng goh gùt nam nàng tăc mờ cau ngui sa in ờ gŏ di mìng tăc tàm dơ̆ sa tềp mờr tus do lơm gời ờ.