Nam 2019, ồng Bùi Quang Cần ơm tàm xã Vĩnh Thái, kơnhoàl Vĩnh Linh, càr Quảng Trị geh kwang bàng Anih tờm Dong kờl bơto pơlam lơh broă sa sươn sre càr Quảng Trị pơgồp bal mờ Anih tờm Dong kờl bơto pơlam lơh broă sa sươn sre càr Thừa Thiên- Huế bơto pơlam ròng ka ti jơng bò tàm bràs, sền gàr sàng goh phan sa. Broă ròng jăt bàr tơngai ngui cế phẩm vi siñ. Giă ka ti 150 rbô đong dùl kĭ, kờp jơh priă tă ròng, hìu bơnhă ồng Bùi Quang Cần lơh geh priă cồng 184 tơlak 5 sàu măt dà ròng. Ồng Bùi Quang Cần pà gĭt, broă ròng ka ti 2 tơngai, ngui cế phẩm vi siñ geh cồng nha lơh sa uă, phan bơna sàng goh, sền gàr niam phan sa. Ồng Bùi Quang Cần, đơs: Pơndrờm mờ ală broă ròng ka ti ờs mờng lài do den ròng ka ti jăt broă pơlam ròng vi siñ geh cồng nha ngan, tơrmù piă tă kàl ròng, ròng dimơ. Ròng ka ti jăt broă pơlam ròng do sền gàr ka ti bơtàu tơnguh niam ngan, ờ geh sơnơm kháng siñ.

Broă ròng ka ti tàm càr Quảng Trị sơnđờm bơh nam 2000, mìng là ròng ka ti sú, ka ti thẻ. Bơh sơnrờp, làng bol ròng ka ti is tàm ală tiah geh dà dờng hòr tus dà lềng, tơnơ̆ hơ̆ ròng uă tus tiah rềp kềng gah dà dờng. Nàng ròng ka ti geh cồng nha, kơ̆ kơl jăp, jŏ jòng, cau lơh broă sa pal tam gơl broă ròng jăt gùng dà đòm mờ ngui bơta jak chài măy mok dê. Ồng Phan Văn Phương, Phó Kwang ătbồ Anih tờm Dong kờl bơto pơlam lơh broă sa sươn sre càr Quảng Trị, pà gĭt, broă ngui bơta jak chài măy mok ròng ka ti thẻ jơng bò sền gàr niam sàng goh phan sa mờ ờ huan bơtờp kòp,  tam klăc bal đah cau lơh sa mờ mpồl lơh sa kă bro, tơnguh uă cồng nha lơh sa mờ bơta kwơ phan bơna. Ồng Phan Văn Phương, pà gĭt, jơh gùt càr neh rề ơnàng tus 50 lồ măt dà ròng ka ti niam sàng goh phan sa. Ồng Phan Văn Phương, đơs: Bol añ bơyai lơh bơto pơlam nàng bơto pơlam ală broă lơh ai cau tờm ròng in, gơ sồr bơta chài măy mok uă ngan mờ kal ke rlau. Càr gĭt nền ka ti là phan ròng tờm ngan, kung là gùng dà nàng bơtàu tơnguh broă ròng ka ti 2 tơngai do nàng kờñ tơrmù rềs àr ai làng bol ròng ka ti in.

Dong cau ròng phan ngui bơta jak chài măy mok lơh geh cồng nha uă tàm broă lơh sa, nam 2022, Anih tờm Dong kờl bơto pơlam lơh broă sa sươn sre dà lơgar lam lơh broă lơh ròng iar gơdờp mờ bơta duh mrềt tàm xã Cam Chính, kơnhoàl Cam Lộ, càr Quảng Trị. Pơndrờm mờ ròng phan ờs mờng bơh yau, ròng iar jăt broă lơh hữu kơ cèng wơl cồng nha uă, sền gàr niam ờ bơtờp kòp, sàng goh phan sa, sền gàr tiah ơm kis. Bơh ală ngai sơnrờp tus bal lơh broă lơh do, hìu bơnhă ồng Vũ Văn Bắc, ơm tàm thôn Đoàn Kết, xã Cam Chính, kơnhoàl Cam Lộ dờp geh bơta bơto pơlam, jăt sền bơta duh mrềt bơh kwang bàng Anih tờm Dong kờl bơto pơlam lơh broă sa sươn sre dê mờ tus bal bơsram ală ơdŭ bơto pơlam bè ròng phan jăt broă pơlam lơh VietGap dê. Ồng Vũ Văn Bắc, đơs: Kơ̆p kờñ dong kờl tai ai ală mpồl in tàm tiah do geh lòt sền, lùp bơsram uă broă lơh nàng lơh gơ in niam rlau. Ai tơl bơta, sơlơ bơtơl tai ai he in gơtùi bơtàu tơnguh, rề ơnàng ròng uă iar.

            Tiến sĩ Nguyễn Thị Hải, Kwang ătbồ Phòng Dong kờl bơto pơlam lơh broă sa sươn sre- Ròng phan- Lơh sơnơm phan ròng, Anih tờm Dong kờl bơto pơlam lơh broă sa sươn sre Dà lơgar pà gĭt, sơntìl iar gơdờp mờ bơta duh mrềt M18 ròng dipal mờ bơta trồ tiah tàm càr Quảng Trị. Jăt tiến sĩ mò Nguyễn Thị Hải, phan sang bơh ròng phan geh bơsong mờ broă lơh ngui cế phẩm siñ họk den tàng ờ geh ƀô ƀơ̆, lơh gơlik tiah lơh sa lơh geh bơta niam, sàng goh mờ lơh geh cồng nha lơh sa uă. Tiến sĩ mò Nguyễn Thị Hải, đơs: Bơh sơnrờp rơ̆p ròng iar sa puăc nàng sền swì bơta gơdờp tàm ală kơnhoàl ù tiah ƀòn lơgar bè lơi. Tàm tơngai tus, rơ̆p dong kờl ală càr nàng lơh gơlik kòn sơntìl, ai kòn sơntìl pa ròng uă tàm ală kơnhoàl ù tiah ƀòn lơgar krơi is. Lơh jăt broă pơlam ròng phan niam sàng goh siñ họk halà ròng phan jăt broă pơlam lơh bơh VietGap dê nàng lơh geh bơta niam.

Tŭ do, bàr pe broă lơh broă sa sươn sre sàng goh tàm càr Quảng Trị bơh Anih tờm Dong kờl bơto pơlam lơh broă sa sươn sre dà lơgar bơto pơlam ndrờm geh ngui măy mok jak chài, dipal mờ bơta geh ngan tàm tiah he dê. Bơta chài ròng tam phan pa, măy mok pa dong cau lơh broă sa tơnguh cồng nha lơh geh, tơrmù priă tă lơh mờ kwơmàng là dong làng bol bơtàu tơnguh kơ̆ kơl jăp mờ lơh broă sa sươn sre sàng goh, phan bơna niam sàng goh. Ồng Lê Quốc Thanh, Kwang ătbồ Anih tờm Dong kờl bơto pơlam lơh broă sa sươn sre dà lơgar pà gĭt, Anih do gam lam lơh dùl ròt ală broă lơh dong làng bol lơh broă sa kơ̆ kơl jăp tàm ală gah broă tam phan, ròng phan, phan tàm dà. Ồng Lê Quốc Thanh, đơs: Jơh ală phan bơna tŭ do mờ bol añ kơ̆p kờñ ai bơto pơlam lơh den broă sơnrờp pal kơlôi tus sền gàr niam sàng goh phan sa. Dilah lơh sa ờ niam ờ sàng goh den drà kă bro ờ gŏ bài. Ờ mìng tàm drà tăc mờ lơgar ndai lơm mờ drà tàm lơgar kung kờñ pal lơh gơlik phan bơna niam sàng goh sơl.

Cau lơh broă sa sươn sre càr Quảng Trị gam rơhời tam gơl pa broă ròng phan jăt gùng dà đòm jăt mờ ngui bơta jak chài măy mok.