Ơi, niam să ồng! Ơ ồng, jăt Ală jơnau neh lơh nền bơtàu tơngguh gah phan kơphê kơ̆ kơl jăp tus nam 2030, càr Dăk Lăk gĭt nền bă tam kơphê pơphê pơgăp 200 rbô lồ, mờ cồng nha lơh geh kờp bal 2 tấn nggùl tàm dùl lồ. Bè hơ̆, nàng lơh geh ală jơnau kờñ do, càr neh geh ală broă lơh loh làng bè lơi, ơ ồng?

Ồng Nguyễn Thiên Văn: Tàm lam lơh jăt Ală jơnau neh lơh nền  bơtàu tơngguh gah phan kơphê, càr Dăk Lăk rơ̆p tơrgùm lam lơh jăt niam broă lơh sa. Jăt tàm bơta sră wăc sềr rùp bè lơh broă sa sươn sre, ù tiah trồ tiah, càr rơ̆p hòi jà mờ bơto sồr làng bol săc rwah bă ù dipal nàng bơcri sơngka sền gàr mờ tam pa wơl kơphê. Bol hi rơ̆p lơh ală tiah lơh sa mờng tam phan uă, tơrgùm tàm ală broă lơh lơh sa niam sàng goh, lơh sa geh sră cơng tàng, bal mờ jơnau kờñ 80% bă ù geh tam phan jăt gùng dà do. Bơdìh hơ̆ tai, càr rơ̆p bơcri priă tàm ală rbòng dà nàng geh tơl dà tuh ai chi tam in. Càr pơn jăt tai lam lơh ală broă lơh pik tơnhàu, prăp gàr tơnơ̆ tơnhàu, lơh bè lơi 95% phan bơna geh ìs pơr di jơnau sồr.

Ơi, tŭ do ală jơnau sồr bè ală jơnau sồr bơta niam ngai sơlơ kal ke ngan, ngan là gơ wèt mờ ală phan bơna lơh geh bơh broă lơh sa sươn sre geh uă bơta pràn bè tăc mờ lơgar ndai bè kơphê, bè hơ̆ nàng lơh geh gơ wèt mờ ală jơnau sồr pa bơh drà kă bro dê, tơngai tus, càr Dăk Lăk rơ̆p sền gròi tus broă do bè lơi, ơ ồng?

Ồng Nguyễn Thiên Văn: Bol hi gĭt nền pal geh tiah tam phan, pal geh bă ù dờng. Dơ̆ bàr là jăt ngui ndrờm bal ală broă lơh sa gơguh jak, đềt mềr mờ tiah ơm kis mờ tềm pềr tàm priă tă nàng lơh gơlik geh phan bơna geh sră cơng tàng dipal mờ ală jơnau sồr bơh drà kă bro tàm lơgar mờ ală lơgar ndai. Jăt tàm bơta phan bơna geh niam bè hơ̆, bol hi tơrgùm tàm bơtàu tơngguh ală mpồl tiah lơh sa mờ măy mŏk nàng hòi jà ală mpồl lơh sa kă bro gơhòi gơ jà tàm lơh sa tàm ală mpồl tiah lơh sa mờ măy mŏk càr dê. Bơh hơ̆ rơ̆p lơh gơlik phan niam gơ wèt mờ ală phan bơna broă lơh sa sươn sre tăc mờ lơgar ndai lơh gơguh tai priă jền. Bal mờ hơ̆, lơh ală măt kă bro phan măt kă bro phan bơna kung bè sền gàr dong kờl bơto pơlam anih lơh kơphê Buôn Ma Thuột nàng cèng phan bơna he dê bal mờ bơta niam, mờ ală broă lơh lơh sa gơguh jak bè hơ̆ lòt tăc tàm drà tàm lơgar mờ dunia.

Ơ ồng, nàng bơtàu tơngguh gah phan kơphê kơ̆ kơl jăp den kung gam kờñ ngan sơl bơta lơh bal kơ̆ kơl jăp jăt ală anih lơh gơlik phan. Bè hơ̆, càr rơ̆p geh ală gùng dà broă lơh lơi nàng dong kờl cau lơh broă sa mờ mpồl lơh sa kă bro tàm broă bơtàu tơngguh lơh sa, nàng tơngguh uă bơta kwơ mờ rề ơnàng drà kă bro jăt ală anih lơh bal do taih?

Ồng Nguyễn Thiên Văn: Càr Dăk Lăk rơ̆p lam lơh ală broă lơh lòt bal mờ cau lơh broă sa, pơn jăt tai lơh kơ̆ kơl jăp ală mpồl dong kờl cau lơh broă sa, bè anih priă jền, anih tờm kơlôi sơnơng, anih kơlôi sơnơng jak chài, nàng kờñ dong làng bol gĭt geh ală gơguh jak jak chài măy mŏk mờ priă jền drơng lơh sa. Mơkung hòi jà mpồl lơh sa kă bro tàm gah phan kơphê lơh pràn bơtàu tơngguh lơh sa, tơngguh uă priă jền, lơh geh jơnau kờñ bơtàu tơngguh lơh sa- mpồl bơtiàn. Càr Dăk Lăk rơ̆p tơrgùm ală broă lơh ndrờm bal tă bơsong ală anih gơkòl, geh ală broă lơh tam gơl pràn ngan rlau jơh mờ lơh pràn pà kâp, pà gơnoar kung bè lòt bal mờ mpồl lơh sa kă bro nàng gơhòi gơ jà ală mpồl lơh sa kă bro tus bơcri priă tàm Dăk Lăk, kung bè lơh bal mờ ală mpồl cau lơh broă sa nàng lơh bơnah broă tàm ală anih lơh bal phan bơna lơyah ngan rlau jơh nàng jun phan kă bro càr Dăk Lăk tus mờ drà kung bè là tus bal lơh phan niam uă ală phan bơna broă lơh sa sươn sre càr dê tàm hơ̆ geh kơphê.

Ơi, dan ưn ngài ồng uă ngan neh hơ jơnau lùp bơh bol hi dê?