Tŭ do cau kă bro gam tong lài dồ ết priă blơi plai sầu riêng càr Dăk Lăk mờ giă bơh 80 rơbô đong tus 95 rơbô đong dùl kĭ, là tềl tơngŏ niam ngan bơh drà kă bro. Mơya, broă lơh nền lài giă, tong lài dồ ết priă mờ giă jơnhoa ngan kung geh uă bơta pơhìn ờ niam lơh roh giă priă, roh priă tong lài, ờ lơh jat sră pơrgon rơ̆p gơlik geh dilah bơta geh ngan drà kă bro geh tam gơl dờng. Bơdìh hơ̆, bơta tàm pìt kă bro, bơcăp giă, koh aniai tờm chi tam ndrờm bè ală kàl lài do, kung lơh làng bol cau lơh broă sa ờ suk ơm ngan. Ồng Y Khoan Kbuôr, ơm tàm xã Cư Pơng, kơnhoàl Krông Búk, càr Dăk Lăk, pà gĭt: “Tŭ do, rài kis ring lơngai, sầu riêng gam geh giă, lơh sa hìu bơnhă bơtàu tơnguh. Añ sền gŏ tàm ƀòn lơgar geh ală cau kơnòm să pơnđơl pràn lơh ngan tàm broă sơng ka sền gàr sầu riêng”.

Nàng gàr niam lơngăp lơngai rơndăp tăp sèng tàm tơngai tơnhào plai sầu riêng, gơnoar atbồ ală tiah bal mờ mpồl kwang bàng ală tiah tàm càr Dăk Lăk neh bơt bơtàu, lam lơh broă lơh sơlơ tơnguh tai broă lơh tàm dră mờ cau lơh tìs mờ ală broă lơh lơh tìs tàm kàl tơnhào plai sầu riêng nam 2024. Mơkung lòt sền tiah ơn prap phan, tiah tơrgùm phan, lòt sền gròi sền tàm ală tiah tờm, ngan là ală suơn sầu riêng ngài hìu làng bol, jat sền ală broă lơh blơi, tăc bro plai sầu riêng, tơlik mpồl dong kờl tơnhào phan tam mờ tăc bro plai sầu riêng. Đại tá ồng Trần Quang Hiếu, Phó Kwang atbồ Kwang àng càr Dăk Lăk pà gĭt:“Bol añ rơ̆p rcang lài gĭt loh ală bơta, pơgồp bal mờ ală sở, gah broă sơlơ tơnguh tai atbồ Dà lơgar bè lơngăp lơngai lơh sa, is ồn là gơrềng tus mã tiah tam phan, mã kơldung ơn phan mờ ală broă lơh blăc pơrlồm kă bro. Mờ di tŭ sền gŏ, tam dră wơl  mờ lơh glài ală cau geh broă lơh tìs kơñau phan. Sơlơ tơnguh tai atbồ Dà lơgar bè broă lơh mut mờ lik tàm lơgar, bè gùng lòt rê, bè atbồ gah broă kă bro geh ală bơta nàng gàr niam lơngăp lơngai, rơndăp tăp sèng tàm tiah do dê”.

Càr Dăk Lăk tŭ do geh rlau 32 rơbô 700 lồ sầu riêng, tàm hơ̆ geh pơgap 16 rơbô lồ neh ai tơnhào, là càr geh bă ù tam sầu riêng dờng ngan rlau jơh gùt lơgar dê. Nam 2023, sầu riêng Dăk Lăk lơh geh khà 285 rơbô tấn mờ nam do kờp dŭ rơ̆p lơh geh rlau 300 rơbô tấn.