Mpồl cau hùc dà kơphê bơkah gơrề uă, gam lơh gơlik geh drà kă bro bềng bơta pràn bal mờ priă jền sơrlèt uă ngan mờ kơphê kă bro phan. Gŏ geh tŭ niam do, uă mpồl lơh sa kă bro tàm càr Gia Lai neh lòt lài bơcri priă niam ngan, wèt tus ală broă lơh gơlik jơh bal bơh sơntìl chi, tam tus lơh gơlik phan niam uă. Ồng Nguyễn Tiến Định, Kwang Lam bồ Kông ty Bơcri priă bal kơphê Việt Nam United, kơnhoàl Cư Prông, càr Gia Lai pà gĭt: “Bol hi gŏ kơphê bơkah là gùng dà bơh gah kơphê gùt plai ù dê tài bè hơ̆ bol hi rơ̆p ờ ơm bơdìh. Tàm ală tŭ lơh broă mờ hìu làng bol lơh broă sa bol hi kung rơcăng lài yal jơnau gĭt wă mờ cau lơh broă sa nàng khi in gĭt kờñ tăc geh kơphê giă jơnhoa rlau den pal tơngguh uă bơta niam kơphê nàng lơh geh priă jền niam rlau”.

Ờ mìng là jơnau bơh mpồl lơh sa kă bro dê lơm, kơphe bơkah kung lơh gơlik geh ală tam gơl bơta mờng kwèng lơh sa bơh cau lơh broă sa dê mờ ală mpồl lơh broă bal dê. Bơh sền gròi khà lơh geh tus lơh sa kơ̆ kơl jăp, làng bol neh đòm jăt broă lơh hữu kơ, pik tơnhàu săc rwah, ràu plai mờ ìs tềng rơng dra. Tàm kơnhoàl Đăk Đoa, Mpồl lơh broă bal Broă lơh sa sươn sre mờ Drơng broă ala Lam Anh neh lơh geh cồng nha mờ broă lơh tơrlòng lài tam phan hữu kơ jăt bơta geh is trồ tiah brê bơnơm dê. Phan bơna kơphê bơkah bơh mpồl lơh broă bal dê ờ mìng lơh geh sră cơng tàng OCOP 4 sơrmañ kâp càr mờ gam tăc geh tàm uă drà kal ke ngan tàm dơlam mờ bơdìh lơgar. Ồng Lê Hữu Anh, Kwang Lam bồ Mpồl lơh broă bal, yal: “Bơh rùp hin cau lơh broă sa song dơ pă dê, geh bơta pin dờn uă tàm bơta kwơ gar kơphê dê, bol hi neh tam gơl broă sơngka sền gàr sươn chi, tơngguh uă bơta phan bơna. Bơta do ờ mìng dong tơnguh priă jền kơphê lơm mờ gam pơgồp bơnah tơn jơh jơgloh tơrmù rƀah, dong làng bol lơh pas bơh tờm kơphê tơn”.

Tŭ do, Gia Lai neh lơh gơs 34 anih lơh bal lơh gơlik gơ jăt bal mờ tăc bro kơphê, mờ kờp mjơh bă ù rlau 43 rbô 500 lồ; gơ tơrgùm 26 mpồl lơh sa kă bro mờ 8 mpồl lơh broă bal. Uă mpồl lơh sa kă bro neh khin cha lơh gơlik kơphê ờ ngui sơnơm sền gàr phan tam (hữu kơ), bơcri priă lơh gơlik phan niam uă nàng kờñ tơngguh uă bơta niam mờ gơguh bơta kwơ phan bơna. Nàng kơphê niam uă mờ kơphê bơkah sơrlèt rlau mờ broă lơh bơh ală broă lơh tơrlòng lài dê, gơnoar ătbồ ală ƀòn lơgar tàm càr gam lam lơh uă broă lơh dong kờl dipal mờ rài kis geh ngan, bơh broă rơndăp ù tiah tiah tam tus tàm tơrbŏ mpồl lơh sa kă bro mờ drà kă bro ală lơgar. Ồng Đoàn Ngọc Có, Phó Kwang Lam bồ Sờh Broă lơh sa mờ Tiah ơm kis càr Gia Lai, pà gĭt: “Tus nam 2030, bơdìh mờ broă tam uă kơphê bơkah 2 rbô 340 lồ, Gia Lai rơ̆p ai 80% bă kơphê jơh gùt càr dê geh lơh gơlik jăt ală jơnau sồr geh sră cơng tàng. Bơdìh mờ broă bol he tam uă kơphê bơkah mờ kơphê jăt jơnau sồr nàng lơh geh jơnau kờñ drà kă bro dê, Gia Lai kung gam lơh ngan gơhòi gơ jà bơcri priă nàng gơgtùi bơ̆t bơtàu anih lơh broă, ală hìu măy lơh gơlik phan niam uă phan bơna kơphê nàng tơngguh khà lơh gơlik phan niam uă kơphê tàm ù tiah càr dê, kung bè tơngguh bơta kwơ bơh phan bơna kơphê dê”.

Bal mờ ală lơh ngan sùm bơh mpồl lơh sa kă bro, cau lơh broă sa mờ gơnoar ătbồ dê, kơphê Gia Lai gam rơhời đơs nền anih ơm tàm sră wăc sềr rùp ù tiah kơphê niam uă dunia. Broă tam gơl bơh lơh gơlik uă bu ba tus tơrgùm tàm bơta niam mờ bơta kwơ kơ̆ kơl jăp, kung cèng wơl priă lơh geh uă rlau ai cau lơh broă sa in, mơkung pơgồp bơnah tơngguh bơngă măt kă bro kơphê Việt Nam dê.