Rơndăp lơh ală dra ìs tềng cờn jơnhoa bơh rơkàng hìu dê tiah gơtùi dờp jơh bơta àng tơngai dê jroh, là bơta ƀươn sền gŏ tàm broă lơh puăc kơnrồ dùl tơngai bơh anih lơh Tuấn Hậu dê tàm ƀòn drà dềt Phú Túc, kơnhoàl Krông Pa. Ală pèt puăc kơnrồ dờng kàr mpàng tê geh săc bơh bơnah mrih bơkah ngan rlau jơh, geh pèt puăc jòng, ờ geh tơngi, tơnơ̆ tŭ pơnđùm pơgăp 60 phuk mờ phan tĕ pơnrơ ngan (mìng là boh, iơm, tòih, mrĕ phe mờ plang) rơ̆p geh cèng ìs tềng dra (rơng) bơh 3 tus 4 jiơ. Ồng Trần Quang Tuấn, Cau tờm anih lơh puăc kơnrồ dùl tơngai Tuấn Hậu pà gĭt, pah ngai tơngai niam, ồng ìs geh 2 dơ̆, bơh 9 jiơ tus 12 jiơ klo ngai mờ bơh 12 jiơ klo ngai tus 3 jiơ mho. Ồng Tuấn pà gĭt, bơh dồ phan sa ờs mờng pah ngai bơh làng bol jơi bơtiàn Jrai dê tàm ƀòn lơgar, puăc kơnrồ dùl tơngai Krông Pa tŭ do neh geh tăc rơ̆ ru tàm drà. Ồng Tuấn, đơs: Phan bơna do sơnđờm bơh phan sa ờs mờng pah ngai bơh cau Jrai dê, bơh hơ̆ làng bol ai bơta hơ̆ nàng lơh phan sa ai năc in tàm tơngai lài. Is ồn bè pơnđùm phan tĕ den bol añ pơnđùm phan tĕ jăt bơta is ồn bơh hìu bơnhă dê, ờ gŏ lơh bal mờ tàm drà ờ, krơi is is ồn bè hơ̆. Pah dơ̆ geh bơyai lơh chờ bè ală phan bơna bơh cau lơh broă sa dê lơh geh den hìu bơnhă geh tus bal sơl. Geh chờ pơrjum drà jà tus den he rơ̆p jơh nùs lơh bal nàng yal tơnggĭt ală phan bơna do tus mờ cau ngui sa in geh niam rlau.

Bal mờ anih lơh Tuấn Hậu, uă hìu bơnhă tàm kơnhoàl Krông Pa kung tus bal lơh puăc kơnrồ dùl tơngai, lơh geh ală măt kă bro phan pin dờn mờ geh sră cơng là là phan bơna OCOP bơh tiah he dê. Mò Hồ Thị Mười, Cau tờm anih lơh sa Mười Đức ƀòn drà dềt Phú Túc, kơnhoàl Krông Pa neh geh mờng chài mờr 30 nam lơh sa mờ lơh puăc kơnrồ dùl tơngai. Jăt mò Mười yal, pah ngai anih lơh sa mò dê lơh pơgăp 50 kĭ puăc kơnrồ ris. Tơngai mờr tus ngai sa tềp geh ngai lơh tus 5 tạ, 7 tạ puăc kơnrồ nàng lòt jun ală anih tăc phan in, lơh geh priă jền kung geh đau sơl. Mò Mười, yal: Tŭ do, den hìu bơnhă kung gam geh 3 sơrmañ kơnhòal pà mờ mờr tus den kơnhoàl kung dan he tơngguh tus 4 sơrmañ, phan bơna he dê sơrlèt ală bơta niam rlau, phan bơna kung bơkah rlau, nàng tăc tàm drà mờ he kung kơlôi tus là broă niam sàng goh phan sa mờ ală phan bơna niam rlau.

Bi Hoàng Thị Minh Châu, ơm tàm ƀòn drà dềt Phú Cần, kơnhoàl Krong Pa, kung là cau sùm blơi puăc kơnrồ dùl tơngai nàng pà hìu bơnhă tàm ƀòn tờm in pah dơ̆ sa tềp tus. Bi Hoàng Thị Minh Châu, đơs: Añ kờñ ngan sa puăc kơnrồ dùl tơngai tàm Krông Pa, Gia Lai tài bơh kơnrồ tàm do geh bơta bơkah is gơ dê, ƀô bơkah, bơrlăng lơm, geh ìs mờ bơta duh trồ tơngai dê dờng ngan, sa geh bơta gŏ gơlơh tàm lơmpiăt pơnrơ is ngan. Pah nam mờr sa tềp là añ sùm blơi bàr pe kĭ rê lơh phan pà cau hìu bơnhă, ồng mò, mè bèp mờ oh mi in.

Jơh gùt kơnhoàl Krông Pa geh pơgăp 30 anih lơh puăc kơnrồ dùl tơngai. Tàm kờp jơh 29 phan bơna OCOP kơnhoàl dê, geh 20 phan bơna geh lơh bơh puăc kơnrồ bè kơnrồ ro chế dềt, kơnrồ rañ pèt, ntìng rơpàih kơnrồ dùl tơngai, kơnrồ pơr dra ƀềp…Ồng Nguyễn Đình Nhung, Kwang ătbồ Mpồl Cau lơh broă sa kơnhoàl Krông pa, pà gĭt: nàng dong kờl làng bol bơtàu tơngguh mờ rề ơnàng lơh sa mờ drà tăc blơi, mpồl cau lơh broă sa kơnhoàl pơgồp bal mờ ală mpồl, gah, ƀòn lơgar lơh pràn mblàng yal bơto pơlam jơh nùs tus bal broă lơh OCOP lơh geh ală bơta nàng cau tờm phan in geh tŭ yal tơnggĭt phan bơna, rề ơnàng drà tăc blơi. Ồng Nguyễn Đình Nhung, đơs: Pah nam den mpồl cau lơh broă sa kơnhoàl kung geh sơl broă rơndăp lơh lơh ală broă lơh, is ồn tàm broă lơh mờ cèng ală phan bơna tus bal tàm ală dơ̆ drà phan lơh geh bơh sươn sre bơh mpồl cau lơh broă sa càr dê bơyai lơh, hơ̆ sồng ală kơnhoàl ndai bơyai lơh kung bè hơ̆ sơl. Sồr mpồl cau lơh broă kâp hơđơm lam lơh ai ală hìu lơh sa kă bro jak in, is ồn là ală hìu geh phan bơna OCOP, phan bơnă tăc tàm internet.

Mờ kờp jơh mpồl kơnrồ rlau 64 rbô nơm, tàm hơ̆ mìng là kơnrồ mìng sa ñhơ̆t lơm, Krông Pa gam ngui niam bơta ƀươn bè phan ngui lơh phan niam bơkah. Bơta pơgồp bal đah bơta geh is ƀươn ƀoài, bơta chài lơh phan pơnrơ ngan mờ ală broă lơh dong kờl neh dong gah lơh puăc kơnrồ dùl tơngai gơgơs broă lơh cèng wơl bơta kwơ lơh sa uă ai làng bol tiah do in.

Tơnơ̆ do là dơ̆ lùp ồng Võ Ngọc Châu, Kwang atbồ cơl dŭ Broă lơh sa suơn sre mờ Bơtàu tơnguh Ƀòn lơgar kơnhoàl Krông Pa dê nàng git tai bơta geh, bal mờ broă ai geh gùng dà bơtàu tơnguh gah phan poăc kơnrồ ìs dùl tơngai tàm kơnhoàl do dê tàm tơngai tus.

Ơi, dan ưn ngài ồng Võ Ngọc Châu, Kwang atbồ cơl dŭ Broă lơh sa suơn sre mờ Bơtàu tơnguh Ƀòn lơgar kơnhoàl Krông Pa dê neh tus bal mờ dơ̆ lùp do. Ơi, dan ồng pà git tơrgùm bal bè broă bơtàu tơnguh phan poăc kơnrồ ìs dùl tơngai tàm kơnhoàl do dê?

Ồng Võ Ngọc Châu: “Poăc kơnrồ ìs dùl tơngai Krông Pa là phan bơkah geh pơnrơ ngan kơnhoàl Krông Pa dê. Phan geh lơh tàm khà măt kă bro poăc kơnrồ Krông Pa, Gia Lai dê. Geh Kụk Ngui gơnoar ngăc ngar dờp tàm sồ 1319237 ngai 18 nhai 3 nam 2022, phan geh pơnrơ ngan bơh bơta bơkah poăc kơnrồ ai bơh tàm mpồl kơnrồ 64 rơbô nơm, ơm mpồl lài ngan càr Gia Lai dê, mìng là sơntìl kơnrồ dềt tàm do, ròng ê jăt broă lơh ê tàm ƀlàng ñhơ̆t tàm kơnhoàl dê, den tàng neh lơh geh măt kă bro. Kơnờm mờ hơ̆, den tàng poăc kơnrồ bơkah, niam, bal mờ hơ̆ trồ tiah tơngai duh, rañ krơi is bơh ù tiah Krông Pa dê den tàng sơlơ lơh geh bơta niam nàng poăc kơnrồ geh bơta bơkah mờ krơi is ngan, bơta krơi is mờ ờ geh tiah lơi geh. Tŭ do, tàm kơnhoàl Krông Pa geh 30 bơta phan lơh geh bơh poăc kơnrồ, tàm hơ̆ geh 2 bơta phan OCOP geh dờp 4 sơrmañ càr dê. Den tàng do kung là bơngă pin dờn ai broă bơtàu tơnguh bal mờ nùs nhơm pin dờn bơh gah do dê tàm drà kă bro kơnhoàl Krông Pa”.

Ơi, bè hơ̆, jăt ồng bơta niam lơi lơh geh phan bơkah krơi is bơh poăc kơnrồ ìs dùl tơngai Krông Pa dê?

Ồng Võ Ngọc Châu: “Bơta niam lơh geh bơta krơi is bơh poăc kơnrồ ìs dùl tơngai Krông Pa dê là bơta bơkah bơh poăc kơnrồ ìs dùl tơngai Krông Pa geh lơh gơs tài uă bơta krơi is. Lài ngan, poăc là bơh mpồl kơnrồ mìng là sơntìl kơnrồ dềt kơnhoàl dê geh ròng tàm ƀlàng ñhơ̆t geh is tàm tiah do, do là tiah geh trồ tiah rañ mờ tơngai duh krơi is. Bơta do dong kờl mpồl kơnrồ kis pràn kơl dang mờ poăc tăt, bơkah mờ thồm, Broă lơh poăc kơnrồ dùl tơngai là bơta tờm ai geh broă lơh jăt broă lơh ờs mờng dê là ìs dùl tơngai, gàr wơl bơta bơkah geh is mờ bơta ris bơkah bơh poăc dê. Broă lơh do geh dong kờl poăc kơnrồ ìs rañ, kung gam geh bơta sùh, bơta đềt, bơta bơkah krơi is bơh poăc kơnrồ dùl tơngai dê pơn drờm mờ ală tiah ndai. Bơdìh hơ̆ tai, geh dùl bơta tai niam chài pơgồp bal lơh geh bơta krơi is đah poăc kơnrồ ìs dùl tơngai Krông Pa dê, cèng broă lơh mờ phan sa krơi is ai cau ngui sa in. Ală bơta do neh pơgồp bal tàm broă lơh geh bơta bơkah poăc kơnrồ dê, is ồn mờ geh pơnrơ ngan tàm càr mờ càr ndai”.

Ơi, bè hơ̆, gơnoar atbồ kơnhoàl bal mờ gah mpồl lơh broă geh gơnoar rơ̆p dong kờl kơnhoàl bơtàu tơnguh gah phan poăc kơnrồ ìs dùl tơngai bè lơi tàm tơngai tus, ơ ồng?

Ồng Võ Ngọc Châu: “Pah nam, Anih duh broă Làng bol kơnhoàl sồr ală gah lơh broă bal mờ anih lơh broă geh gơnoar bơyai lơh ală dơ̆ ràng tơlik drà kă bro phan geh lơh bơh broă lơh sa suơn sre tàm kơnhoàl dê nàng yal phan geh lơh bơh poăc kơnrồ ìs dùl tơngai. Pah nam, kơnhoàl kung ai ală cau tờm lơh phan OCOP tus bal yal măt kă bro tàm kơnhoàl, bơdìh càr mờ ală càr, ƀòn dờng. Jơnau kờñ bơh broă lơh do dê là nàng yal măt kă bro mờ mờ yal phan geh lơh bơh poăc kơnrồ ìs dùl tơngai Krông Pa dê tus mờ ală tiah ndai. Nàng bơtàu tơnguh kơl jăp, kơnhoàl geh gùng dà broă lơh nàng dong kờl bơta chài lơh pa nàng geh gơguh uă bơta kwơ măt kă bro, pờ ơnàng drà kă bro mờ bơtàu tơnguh broă pơgồp bal bơta kwơ bơh broă lơh tus broă tăc phan geh lơh. Poăc kơnrồ ìs dùl tơngai Krông Pa ờ mìng là phan bơkah krơi is kơnhoàl dê mờ gam là bơta pràn kwơ màng lơh pràn broă lơh sa mờ yal rùp rài bơh kơnhoàl dê”.

Ơi, dan ưn ngài ồng!