Tàm sàh Ea Súp, tiah bơta ù tiah prang ro kơnrañ, nhơm trồ tiah tơngai duh lơh uă bơta chi tam kal ke dờng mờ gơ ai cồng nha ờ uă, bàr pe sơntìl gle gơ ai gŏ wơl jơnau tơl pràn gơdờp niam ngan. Gĭt goh bơta pràn do, uă hìu làng bol neh khin cha tam gơl bơh ală bơta chi tam ờ huan geh cồng nha nàng tam tờm gle. Hìu bơnhă mò Trần Thị Phượng, ơm tàm thôn 5 là dùl tàm ală hìu lơh lài. Tàm bă ù ơnàng rlau 5 sào ù lài do tam điều mơya cồng nha lơh geh ờ uă, mờr 5 nam do mò Phượng neh tam gơl tam sơntìl gle lụk truk. Nàng tơngguh uă cồng nha lơh sa, hìu bơnhă mò bơcri priă blơi ală ding tuh dà tềm pềr pơgồp bal mờ đèng măt tơngai, gơ tềm pềr priă tă lơh mơkung rơcăng lài dà tuh. Tŭ do, mờ rlau 500 tờm gle neh gơ ai sa sùm, pah nam broă lơh tơrlòng lài do cèng wơl priă lơh geh mờr 100 tơlak đong ai hìu bơnhă mò Phượng dê in.

“Bơh lài tus tŭ do kung tam uă sơl bơta chi che rao, mơya tŭ tam gơl tus tờm gle gŏ kung là geh cồng nha sơl tài bơh gơ gơ ai sa sùm gùt nam mờ ù tàm do ro kơnrañ ngan. Añ lùp bơsram geh tam tờm chi do gŏ kung di sơl, kờñ ngan, kung gơ ai sa pah ngai den tàng kung gŏ gơlơh ai he in priă jền sùm”.

Jăt mò Đặng Thị Thanh Nhung, Phó Củ tịc Duh broă sùm Anih duh broă Làng bol sàh Ea Súp, càr Dăk Lăk yal, tờm gle bơh sơnrờp cèng wơl cồng nha lơh sa ai bàr pe hìu làng bol in, mơya broă tam uă chi tam do tàm ƀòn lơgar kung gam sơl bàr pe bơta gơ kơryan. Tŭ do, bă ù tam gle mìng geh lơh dềt rah rài, ờ tơrgùm bal, ờ hềt gơgơs geh tiah tam phan tơrgùm bal dờng. Bơta do, lơh broă lơh bal tam, tăc mờ gơhòi gơ jà mpồl lơh sa kă bro bơcri priă lơh gơlik phan gam tìp uă kal ke.

Bulah bè hơ̆, jăt mò Nhung, uă sơntìl gle geh tơl pràn gơdờp niam mờ bơta nhơm trồ tiah ro duh bơh ƀòn lơgar dê, ƀươn tam, priă tă bơcri ờ uă mờ geh tơngai gơ ai sa wơl lơyah, gơ ai priă jền sùm. Do là ală jơnau dipal mờ bơta lơh sa mờ rài kis làng bol tiah ù ro kơnrañ, kal ke dê. Bơh mùl màl hơ̆, sàh Ea Súp gam pơlam gùng rề ơnàng bă ù tam gle jăt gùng dà gơgơs tiah tam phan tơrgùm bal, mơkung jơh nùs hòi jà mpồl lơh sa kă bro tus sền, bơcri priă lơh bal tam mờ tăc phan lơh geh.

 “Anih duh broă Làng bol sàh neh lơh ală broă rơndăp lơh mờ pơyua ală jơnau đơs kơ̆p kờñ bơcri priă, hòi jà ală mpồl lơh sa kă bro bơh tiah ndai tus ƀòn lơgar sàh nàng lơh bal mờ ală hìu làng bol, bơtàu tơngguh pràn kơldang rlau tai gơ wèt mờ tờm gle”.

Ờ mìng cèng wơl bơta kwơ lơh sa, tờm gle gam geh đơs geh uă bơta ƀươn bè tiah ơm kis, ngan là tàm bơta tam gơl nhơm trồ tiah ngai sơlơ uă ngan. Gle kis dờng, tơl pràn kis wơl pràn, dong gàr ù, kơryan cò pơrdô ù mờ gơ jồp carbon niam ngan. Mờ pơgăp 3 rbô 500 lồ gle tŭ do gam geh, Dăk Lăk kung gam uă ù tiah nàng bơtàu tơngguh gah phan gle jăt gùng kơnhăp jŏ dilah geh bơcri di gùng, bơh rơndăp tam tiah tus lơh jăt ală jơnau sồr ătbồ brê. Jăt ồng Nguyễn Hoàng Tiệp, Phó Kwang Lam bồ Anih tờm Dờp dờn Ătbồ brê kơnhăp jŏ, broă lơh jăt ală jơnau sồr ătbồ kơnhăp jŏ, is ồn là sră cơng tàng FSC gơ wèt mờ brê gle (pà gĭt brê mờ ală phan bơna bơh brê geh ătbồ jăt gùng kơnhăp jŏ), dong tơngguh uă bơta kwơ phan bơna mờ rề ơnàng tŭ niam tăc tàm drà.

“Cíñ phủ neh ai lơh jăt Jơnau lơh nền sồ 06 Cíñ phủ dê bè nhơm hìu krơh, tàm hơ̆ kung geh cih loh bè rơndăp broă lơh tam brê đơs bal kung bè tam brê gle đơs is, gơrềng tus broă lơh tơrmù sang nhơm ƀơ̆. Tài bè hơ̆, Dăk Lăk pal geh ală pơlam loh làng ai làng bol in tàm bơta chài tam phan pah ngai nàng tơrmù sang nhơm ƀơ̆”.

Jăt pơlam gùng bơtàu tơngguh broă lơh sa sươn sre kơnhăp jŏ, càr Dăk Lăk gam rơhời rề ơnàng bơta wèt sền gơ wèt mờ tờm gle, bơta chi geh đơs bềng bơta pràn tàm ală bă ù ro prang. Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis càr Dăk Lăk pà gĭt, nàng lơh gơtùi pràn do, ƀòn lơgar rơ̆p ai geh broă rơndăp lơh tơrgùm bal, ndrờm bal bơh broă rơndăp ù tiah tiah tam, lam tam tus lơh gơlik phan niam mờ tăc phan lơh geh.

 “Càr rơ̆p tơrgùm rơndăp ù tiah tam tam gle, hòi jà mpồl lơh sa kă bro, mpồl lơh broă bal bơcri bơtàu tơngguh tam gơ jăt bal mờ lơh gơlik phan niam, mơkung chồl pràn lơh bal jăt ală anih lơh gơlik. Bơh hơ̆, tơngguh uă bơta kwơ phan bơna, rề ơnàng drà tăc blơi tàm lơgar mờ tăc mờ lơgar ndai, pơgồp bơnah lơh geh broă lơh, gơguh priă lơh geh ai làng bol in”.

Bơh ală broă lơh tơrlòng lài bơh sơnrờp pà gŏ cồng nha mờ pơlam gùng loh làng bơh gơnoar ătbồ ƀòn lơgar, tờm gle gam rơhời pà gŏ, do ờ mìng là chi tam gơdờp mờ bơta trồ tiah ờ niam, mờ gam là gùng lòt pa tàm bơtàu tơngguh lơh sa tơlir tàm Dăk Lăk. Tŭ geh lam lơh sa rơndăp tăp sèng, gơ jăt bal mờ lơh bal ală bơta kwơ mờ lơh gơlik phan niam uă, gle ờ mìng dong lơh geh tai broă lơh broă sa ai làng bol tiah kal ke in mờ gam pờ gơlik uă ù tiah bơtàu tơngguh kơnhăp jŏ ai gah broă lơh sa sươn sre ƀòn lơgar in tàm jŏ tơngai.