Kơnờm bè hơ̆, uă phan lơh geh bơh sươn sre bơh càr Gia Lai dê neh geh tăc uă tus ală drà tàm dunia.

Bal mờ rlau 100 lồ plai màk, nam 2022, Hợp tak xã Lơh broă sa sươn sre mờ Drơng broă Hùng Thơm tàm xã Đăk Ta Ley, kơnhoàl Mang Yang, càr Gia Lai neh lơh sir ală sră nggal lơh sră cih mat dan pà mã sồ tiah tam phan bơna. Mò Đỗ Thị Thơm, Kwang ătbồ Hợp tak xã pà gĭt, kơnờm bè hơ̆ mờ tŭ do phan bơna hợp tak xã dê lơh gơlik neh geh tăc uă tus lơgar Lo. Kwơmàng, phan bơna plai màk ris khà dùl geh tăc tus lơgar Tây mờ Thụy Sĩ. Mò Đỗ Thị Thơm, pà gĭt: Hợp tak xã neh pơgồp bal mờ làng bol lơh broă sa mờ ală hợp tak xã ndai nàng lơh gơs ală broă pơlam lơh tam phan di tơl jơnau sồr bơh năc blơi phan lơgar ndai mờ tàm lơgar dê. Tŭ do, jăt broă lơh jòi gĭt anih lơh gơlik dùl anih tơn, nàng jòi gĭt anih lơh gơlik jăt tơl hìu bơnhă cau lơh broă sa tơn, nàng bal mờ gơ̆p bơtàu tơnguh. Tŭ do, khà phan ngui lơh gơlik phan kă bro gơguh tus bàr dơ̆ pơndrờm mờ ală nam lài.

Ndrờm bè hơ̆ sơl, Kông ty Kổ phần Lơh broă sa sươn sre Măy mok pa Hưng Sơn kung neh lơh sir ală sră nggal mờ geh pà 7 mã sồ tiah tam prìt; 3 mã sồ anih prăp ơn klơm ai 400 lồ prìt tàm kơnhoàl Đăk Đoa, càr Gia Lai. Ồng Lê Hoàng Linh, Kwang ătbồ sươn dờng tam prìt bơh Kông ty dê pà gĭt, do ờ mìng là pang vĕ lòt gùng ai prìt tăc mờ lơgar ndai in, mờ kơnờm bơh hơ̆ ngai sơlơ uă cau tam klăc lơh broă bal lơgar ndai lòt jòi dan blơi phan. Nam lài, kông ty neh tăc mờ lơgar ndai geh mờr 20 rbô tấn prìt, broă rơndăp lơh nam 2023 là pơgăp 24 rbô tấn. Ồng Lê Hoàng Linh, pà gĭt: Bơh tŭ tam, mpồl lơh sa kă bro neh lơh sră cih mat dan mã tiah tam tơn. Den tàng bơh tŭ tam, kông ty ơn prăp klơm is, tăc is phan tus lơgar ndai, ờ gŏ di kơnờm bơh cau lơh kòn gùng lơi, tơrmù priă tă lơh sa. Jơnau kờñ bơh kông ty dê tơngai tus do rơ̆p rề ơnàng drà mờ sền gròi tàm phan bơna, pleh hoàc hươr gơtìp aniai tàm broă kă bro.

Tus lồi nam 2022, jơh gùt càr Gia Lai neh geh pà 99 mã sồ tiah tam ai 6 rbô 700 lồ chi tam in, mìng là prìt, plai màk, mrĕ, rơpung kài, thañ long...Bal mờ hơ̆, là 24 mã sồ anih prăp ơn klơm, mờ kờp jơh bơta pràn lơh gơlik 700 tấn plai ris pah ngai. Ồng Lê Tấn Hùng, Phó Kwang ătbồ Cơldŭ lơh broă sa mờ bơtàu tơnguh ƀòn lơgar kơnhoàl Đăk Đoa dê yal, dùl tàm ală kơnhoàl geh uă mã tiah tam ngan rlau jơh tàm càr Gia Lai, pà gĭt broă lam lơh bơh kơnhoàl dê bè do: Gah lơh broă sa sươn sre neh pơgồp bal mờ Ci kụk Tam phan mờ Sền gàr phan tam bơh Sở Nông nghiệp mờ Phát triển Nông thôn càr dê lam tìp măt, lam ală mpồl lơh sa kă bro lơh sră cih mat dan mã tiah tam ai làng bol in. Tơngai tus, Đăk Đoa geh 20 mã sồ tiah tam mờ anih prăp ơn klơm ai phan lơh geh bơh sươn sre tàm ù tiah kơnhoàl ai mìng 3 bơta phan lơh geh bơh sươn sre dê in là plai màk, prìt mờ sầu riêng. Pơn jăt tai, bol añ rơ̆p lơh tàm ală bơta chi tam ndai, kwơmàng sền gròi tus chi sa plai là tờm; lơh pràn lơh bal lơh sa, tăc sùm mờ lơgar ndai, tơnguh uă rài kis ai làng bol tàm ù tiah do in tàm ală nam pơn jăt tai.

Ală nam do, phan lơh geh bơh sươn sre tăc mờ lơgar ndai bơh càr Gia Lai dê sùm gơguh. Nam 2022, kờp jơh priă geh bơh tăc mờ lơgar ndai bơh càr dê là 660 tơlak dolar Mỹ, tàm hơ̆, mờr 80% tus bơh phan lơh geh bơh sươn sre. Lơh geh bơta do, bal mờ ală jơnau bè bơta ngac ngar, sơrbac mhar bơh mpồl lơh sa kă bro dê tàm broă ngui niam ală hiệp địñ kă bro, broă dong kờl bè tăc mờ lơgar ndai, gam geh broă rơcang lài lam lơh tiah tam phan ngui nàng lơh gơlik phan kă bro, lơh sră cih mat dan mã sồ tiah tam, mã anih prăp ơn klơm phan bơna...Ồng Lưu Trung Nghĩa, Kwang ătbồ Sở Nông nghiệp mờ Phát triển Nông thôn càr Gia Lai pà gĭt, nam do, càr lơh ngan lơh geh bơh 180 tus 200 mã sồ tiah tam mờ pơgăp bơh 40 tus 50 mã anih prăp ơn klơm phan lơh geh bơh sươn sre drơng tăc mờ lơgar ndai in. Ồng Lưu Trung Nghĩa, Kwang ătbồ Sở Nông nghiệp mờ Phát triển Nông thôn càr Gia Lai, đơs: Tàm nam do òr, gah lơh broă sa sươn sre jơh nùs yal tơngĭt jơnau, dong kờl mpồl lơh sa kă bro pà mã sồ tiah tam ai ală chi tam in nàng kờñ phan bơna bơh bol he dê geh anih lơh loh làng, yal loh làng song dơ pă nàng mŭt tàm ală drà. Càr geh gùng dà hòi jà ală mpồl lơh sa kă bro lơh gơlik phan bơh sươn sre jăt tơl jơnau sồr, geh gròi sền, yal loh làng, song dơ pă bơh broă lơh sơnrờp tus broă lồi dŭt, lơh geh jơnau sồr bơh drà kă bro kal ke ngan dê.

Bal mờ lơh bal lơh sa jăt ală broă, broă jơh nùs lơh mhar lơh sră cih mat dan pà mã sồ tiah tam phan lơh geh bơh sươn sre in là broă lơh kwơmàng bơh càr Gia Lai dê wèt tus drà tăc phan mờ lơgar ndai nàng tơnguh uă bơta kwơ phan lơh geh bơh sươn sre bơh càr dê, rơhời bơ̆t bơtàu rài lơh sa sươn sre bơtàu tơnguh kơ̆ kơl jăp jŏ jòng.