Cau lơh broă sa tàm kơnhoàl Phú Thiện, càr Gia Lai gam kong mờ hoàc hươr uă tài bơh giă bùm lô gơmù pràn, uă hìu làng bol lơh broă sa gơtìp hoàc hươr. Kàl do, mò Lê Thị Xuân ơm tàm xã Chư A Thai, kơnhoàl Phú Thiện, càr Gia Lai tam 2 lồ bùm lô bal mờ priă tă bơcri lơh mờr 200 tơlak đong. Pa do, hìu bơnhă neh rồ bùm, geh pơgăp mờr 40 tấn kơnuh, mơya giă tăc mìng geh 3 rbô đong dồ kĭ, den tàng hoàc hươr tus rhiang tơlak đong. Mò Xuân đơs là, kal ke do là tài bơh uă ir cau tàm pơrlòng tam bùm lô. Mò Xuân, yal: Bă bùm uă, khà bùm tăc yòm ờ geh bè ală nam, tăc bro drà kă bro lơyài ngan, giă nam do ờ geh bè nam lài, gơmù uă ngan tài bơh bơnah bùm uă ngan. Cau kă phan den bùm niam hơ̆ sồng blơi, ai bùm ờ niam den khi blơi khi bơcăp ngan.

Bơh bồ kàl tơnhàu tus tŭ do, giă bùm lô gơmù uă ngan. Mùl màl, bơh khà 10 rbô đong dồ kĭ, giă sùm gơmù tus mìng gam 3 rbô 500 đong dồ kĭ tŭ do. Giă lơyah, mpồl lơh sa kă bro blơi nggùl di mơ gời lơh cau lơh broă sa bòl glar. Bi Nguyễn Đình Thái, ơm tàm xã Chư A Thai, kơnhoàl Phú Thiện pà gĭt, mờ giă tăc tŭ do, sươn bùm lô hìu bơnhă dê hoàc hươr tus rhiang tơlak đong. Bi Nguyễn Đình Thái, đơs: Pơndrờm mờ ală nam den nam do lơh bùm hoàc hươr bơh 20 tơlak tus 30 tơlak đong. Tŭ do, 5 lồ den gam tơnhàu geh 1 lồ, tŭ do kung gam ơm kơ̆p giă pa mờ ơm kơ̆p làng bol tơnhàu jơla tĕ mờ giă geh gơguh dồ êt den gơguh dồ êt, ờ gơguh geh den kung gam pal tơnhàu hơ̆ sồng tam gơl lơh kòi.

Kung ndrờm bè mò Lê Thị Xuân mờ bi Nguyễn Đình Thái sơl, gĭt nđờ rhiang hìu bơnhă làng bol ndai ơm tàm kơnhoàl Phú Thiện, càr Gia Lai kung gam bòl glar ngan sơl tài bơh giă tăc bùm ờ yòm ir. Geh hìu gam ờ geh tơnhàu jơh dồ sươn bùm tài bơh tu kòp lơh aniai. Mò Nguyễn Thị Thùy, ơm tàm xã Chư A Thai, kơnhoàl Phú Thiện, càr Gia Lai, đơs: Pơndrờm mờ ală nam, drà nam do lơh uă rlau mờ nam lài, làng bol lơh nam do ơn sơnơm kung ờ di jơnau sồr den tàng gơtìp ha uă ngan, uă hìu lơ òr sơrbì jơh dồ sươn ờ dờñ geh dồ kơnuh lơi, hòac hươr jơh tơn.

Kơnhoàl Phú Thiện là tiah tam bùm lô dờng ngan rlau jơh bơh càr Gia Lai dê. Kàl do, jơh gùt kơnhoàl tam 3 rbô 500 lồ, gơguh mờr pe dơ̆ pơndrờm mờ kàl nam 2022- 2023, bùm lơh geh kờp dŭ pơgăp 68 rbô 800 tấn. Tus tŭ do, bùm lô neh tơnhàu geh pơgăp 60% bă bùm, khà gam wơl kờp dŭ tus ngai 30/04 rơ̆p tơnhàu jơh. Lài hơ̆, gah lơh broă geh gơnoar neh sồr làng bol lơh broă să tŭ rề ơnàng lơh sa, kờñ pal gơ jăt bal mờ mpồl lơh sa kă bro bơcri priă, tăc bro phan bơna. Bă bùm gơguh nisơna mơya ờ geh drà blơi sùm lơh cau tam bùm lô hòac hươr tŭ mŭt tàm kàl tơnhàu. Ồng Bùi Trọng Thành, Kwang ătbồ Cơldŭ lơh broă Lơh broă sa mờ Bơtàu tơnguh Ƀòn lơgar kơnhoàl Phú Thiện, càr Gia Lai pà gĭt, tềng đăp ală kal ke drà kă bro, kơnhoàl lam lơh ală broă lơh jòi drà kă bro nàng dong kờl làng bol in. Ồng Bùi Trọng Thành, đơs: Tềng đăp bơta do, bol hi neh hòi jà ală mpồl lơh sa kă bro lơh bal lơh geh ală bơta ƀươn ai broă tơrgùm blơi bal mờ khà uă ngan rlau jơh, mơkung sồr ală xã lơh ală anih tờm tơrgùm blơi nàng ală mpồl lơh sa kă bro in tơrgùm blơi ƀươn ngan rlau jơh, lơh geh di tơngai.

Pa do, Tập đoàn Centra Retail Việt Nam pà gĭt, ală siêu thị bơh tập đoàn do dê gam lam lơh tăc bùm lô ờ sa priă cồng, lòt bal mờ cau lơh broă sa càr Gia Lai. Jăt Tập đoàn do yal, broă lơh geh lam lơh tơn tŭ gĭt geh jơnau yal giă bùm lô Tây Nguyên kàl tơnhàu tờm gam gơmù uă ngan gơmù bơh 10 rbô đong dồ kĭ tŭ do mìng gam 3 rbô 500 đong dồ kĭ, cau tam bùm hòac hươr uă ngan. Kơno yal, broă lơh lòt bal mờ cau lơh broă sa càr Gia Lai bơh Centra Retail Việt Nam dê rơ̆p jun bùm lô làng bol càr dê tơmŭt tàm ală siêu thị Go!, Big C mờ Tops Market. Bùm lô rơ̆p geh tơrgùm blơi mờ ală siêu thị tăc mờ giă ờ geh priă cồng là 9 rbô 900 đong dồ kĭ tàm ală hìu ràng tăc phan tàm tiah tàm gùl lơgar, tiah đah Jum mờ 10 rbô 900 đong dồ kĭ tàm ală hìu ràng tăc phan tiah đah Tô dà lơgar. Mờ tàm poh bơh sơnrờp lơh jăt broă lơh do tơn, ală siêu thị rơ̆p blơi pơgăp bơh 80 tus 100 tấn bùm lô làng bol lơh broă sa càr Gia Lai dê.