Ka kau bơkah niam, geh ai giă jơnhoa rlau mờ phan bơna dồ bơta pal tàm drà dunia bal mờ ală bơtàu tơngguh pa drà kă bro dê, neh lơh geh tŭ niam nàng gah phan ka kau bơh càr Dăk Lăk dê kis wơl mờ bơtàu tơngguh.

Ồng Lý Quốc Bảo ơm tàm thôn 16, xã Ea Đar, kơnhoàl Ea Kar, càr Dăk Lăk dê pa tơnhàu sir kàl lơh ka kau nam 2023- 2024. Pah dơ̆ pik tơnhàu mờ priă tăc phan bơna tàm jơh kàl lơh sa, geh ồng cih wơl nền nòn ngan tàm dồ pang sră dềt. Kờp jơh khà tàm 2 pang pơ àr, ồng Bảo pà gĭt, mờ mờr 1 lồ ka kau, kàl lơh ka kau nam 2023- 2024 do hìu bơnhă ồng lơh geh 5 tấn nggùl gar ka kau jềng, bồ kàl tăc geh 30 tơlak đông dồ tấn. Tơnơ̆ hơ̆ tơn, giă gơguh tus 60 tơlak đong dồ tấn. Tàm pơgơl mờ gar ro, giă lồi kàl gơguh tus 180 tơlak đong dồ tấn. Tam gơl niam bơh drà kă bro ka kau dê mờ broă geh drà blơi sùm, lơh ồng Lý Quốc Bảo chờ hờp ngan. Ồng, đơs: Tờm ka kau gơ ờ gŏ di bè tờm ndai gơ geh plau uă ngan dơ̆ mờ dum uă ngan dơ̆ jăt pah poh den tàng lòt rwàng dồ dơ̆ mờ pờng bơcah ai gar sùh uă den he hòi đah mpồl lơh bal mŭt pơndiang, gam dồ êt den he wơl kơng sir tơm tơn tàm tŭ giă gơguh tus 35, 50 rbô đong dồ kĭ mờ làng bol neh chờ hờp ngan rao, mơya tŭ tăc sir gơ gơguh tus 55 rbô đong mờ tŭ do gơguh tus 60 rbô đong den làng bol brơn brài ngan.

Jăt mò Nguyễn Hồng Thương, Kwang ătbồ Mpồl lơh broă bal ka kau Nhất Tâm, kơnhoàl Ea Kar, yal: gah phan ka kau tàm càr Dăk Lăk gam ơm tềng đăp tŭ tơngai kis wơl mờ bơtàu tơnguh. Bơta hơ̆ ờ mìng tài bơh ală tềl tơnggŏ niam ngan tàm drà kă bro dunia mờ gam kơnờm bơh ală mpồl lơh sa kă bro, mpồl lơh broă bal tàm càr, neh cơnđoà guh dồ cơnđoà jòng tàm lơh li la, tơngguh uă cồng nha lơh geh mờ bơta niam phan bơna; jòi cau lơh broă bal mờ rề ơnàng drà kă bro. Dilah bè lài do, cồng nha lơh geh ka kau tàm càr Dăk Lăk dê mìng pơgăp 1 tần 3 tại gar ro tàm dồ lồ, tŭ do uă sươn lơh geh rlau 2 tấn, geh tŭ gơguh tus 3 tấn. Lài do, phan bơna ka kau uă ngan mìng lơh geh tàm khà gar ro lơm neh gơ sràt mờ ƀòk ka kau, den tŭ do uă mpồl lơh sa kă bro neh păt cah geh ƀơ ka kau mờ lơh gơlik geh chocolate. Bơnah să ka kau geh tus 30% bơta kơn jơ̆ gar sùh dê, lài do ndrờm bè sơrbì pơlai soh gời, mơya tŭ do geh lơh gơlik gơs dà lơh sràt lơh gơkờñ ngan cau ngui sa, giă tăc geh tŭ gơguh tus 200 rbô đong dồ lĭt. Bơta bơkah niam, ală phan bơna li la neh dong ală mpồl lơh sa kă bro, mpồl lơh broă bal geh priă cồng uă, geh priă jền nàng bơcri niam rlau ai lơh sa in, dong bơta lơh bal đah cau lơh broă sa- mpồl lơh sa kă bro mờ mpồl lơh broă bal gơgơs kơ̆ kơl jăp jŏ jòng, geh kwơ ngan ngồn. Mò Nguyễn Hồng Thương, pà gĭt: Mpồl lơh broă bal sền gròi tus làng bol tàm jơh ală broă, bơh sơnrờp là sền gàr sươn chi tơn chơ̆t tu kơryan kòp lơh aniai, tơngguh uă cồng nha lơh geh. Lồi nam geh priă jờng ai ală làng bol lơh niam in. Jơh kàl tơnhàu, mpồl lơh broă bal rơ̆p lòt tus tơl hìu, ngan là ală hìu cồng nha lơh geh ờ huan uă nàng bơto bơta chài, ai làng bol in càn phơng, càn sơnơm nàng lơh sa thàn kàl lơh sa mờ lơh geh cồng nha uă.

 Bơh dồ tờm chi jŏ nam gơtìp roh bơngă, rơndăp anih lồi dŭt tàm sră cih măt ai lài bơh cau lơh broă sa dê, tờm ka kau Dăk Lăk gam ai geh anih ơm dipal. Jăt ồng Trương Ngọc Quang, Kwang ătbồ Kông ty Trăc ñiệm hữu hạn Ka kau Nam Trường Sơn, kơnhoàl Krông Ana, càr Dăk Lăk yal, bơta niam bơkah geh tơngguh uă neh dong ai ka kau gar ro tàm Dăk Lăk in sùm tăc geh mờ giă jơnhoa rlau êt ngan là bơh 30% pơndrờm mờ giă tàm drà kă bro dunia. Càr Dăk Lăk kung neh geh gùng dà pa bè bơtàu tơngguh gah phan do den tàng rơ̆p gơhòi gơ jà tai uă mpồl lơh sa kă bro geh bơta pràn, pờ gơlik geh bơta gơn kơnờm lơh broă bal pa. Ồng Trương Ngọc Quang, đơs: Dăk Lăk gam lơh gùng dà pa bè ka kau. Den bol hi gơn kơnờm mờ gùng dà pa do, rơ̆p geh tai uă mpồl lơh sa kă bro tus mờ càr Dăk Lăk nàng tơrgùm tàm broă lơh ală anih lơh gơlik phan kung bè lơh geh jơnau kờñ ală lơgar dê bè tăc gar ka kau mờ lơgar ndai, cèng wơl priă lơh geh sùm ai cau lơh broă sa mờ ală cau tam ka kau in…

Dăk Lăk neh geh tŭ geh rlau 2 rbô lồ ka kau tàm ală bă ù ờ gơdờp mờ kơphê tàm jơh ală kơnhoàl, ƀòn dờng tàm càr mờ là anih àng bơh tiah ka kau đah jum dà lơgar dê, jăt rơndăp ù tiah geh sền swì ring bal là jơnau lơh nền  sồ 2015 nam 2012 bơh Ƀộ Nông nghiệp mờ Phát triển Nông thôn dê. Bulah sơrlèt tŭ tơngai gơmù ờ pràn jŏ jòng, mìng gam rlau 1 rbô lồ tàm nam 2020, mơya càr Dăk Lăk kung gam sơl là càr lam bồ gùt lơgar bè bă ù, cồng nha lơh geh mờ priă jền. Tus tŭ do, bal mờ bơnàng jă cồng nha lơh geh mờ bơta bơkah niam geh lơh bơh tŭ tơngai kal ke ngan rlau jơh, bal mờ pràn chồl dờng bơh drà kă bro dunia dê, ka kau Dăk Lăk sơlơ geh tŭ tơngai niam ngan nàng kis wơl mờ ơnàng gùng bơtàu tơngguh.