Tàm ală ngai sa tềp bơhiàn yau dà lơgar nam Giáp Thìn do tơn, bi A Linh, hìu ơm tàm ƀòn Pu Tá, xã Măng Ri, kơnhoàl Tu Mơ Rông kung gam sùm geh mat tàm sươn kơnuh sơnơm Ngọc Linh hìu bơnhă dê tềng hơđơm mƀur chi brê geh is. Kàl do, tờm kơnuh sơnơm Ngọc Linh gam tàm tơngai bĭc mrềt, mìng gam kơnuh ơm mŏ tàm tăp nha lề. Bè hơ̆ mơya jăt bi A Linh yal, tờm chi geh bĭc mrềt mơya cau tam den pal guh bĭc tài bơh gam sền ngòt prồ pì, đe bal mờ uă jơi phan brê sùm kờñ ngan sa kơnuh sơnơm Ngọc Linh. Bal mờ sươn kơnuh sơnơm ơnàng pơgăp 5 rbô tờm chi uă sơnam krơi is, A Linh là dùl tàm uă cau geh priă tơmàn bơh kơnuh sơnơm Ngọc Linh tàm kơnhoàl Tu Mơ Rông. Yal bè ală broă lơh tam kơnuh sơnơm Ngọc Linh klàs bơh rƀah bơh he dê, bi A Linh, yal: Añ lèng 100 tơlak đong tơnơ̆ hơ̆ añ blơi sơntìl kơnuh sơnơm añ rê tam. Càn priă bơcri tàm kơnuh sơnơm den bơtàu tơnguh, cồng nha dong kờl rài kis uă rlau.

Gơ wèt mờ kòn cau Sơdàng tàm kơnhoàl Tu Mơ Rông, bulah ơm kis tàm tiah geh bơta brê bơnơm trồ tiah ù tiah gơdờp ngan mờ kơnuh sơnơm Ngọc Linh mơya ờ ƀươn nàng tam geh bơta chi lơh sơnơm geh priă jền lơh sa uă ngan do. Kal ke dờng ngan rlau jơh gơ wèt mờ làng bol là giă tăc sơntìl kơnuh sơnơm Ngọc Linh kas ngan, pơgăp 100 rbô đong dùl gar mờ 300 rbô đong dùl tờm kơnuh sơnơm 1 sơnam. Nàng dong làng bol tam geh kơnuh sơnơm Ngọc Linh, gơnoar ătbồ, mpồl cau kơnhoàl Tu Mơ Rông lơh pràn broă mblàng yal, hòi jà tam gơl bồ tơngoh kơlôi sơnơng, lòt jòi priă càn bơh ngân hàng cíñ săc dê nàng tam gơtùi kơnuh sơnơm Ngọc Linh. Bi A Sơn, dùl tàm ală hìu rƀah khin cha ngan càn priă Ngân hàng Cíñ săc xã hội dê 100 tơlak đong nàng blơi sơntìl kơnuh sơnơm Ngọc Linh, tŭ do gam geh sươn kơnuh sơnơm pơgăp 3 rbô tờm, yal bè do: Sơntìl kơnuh sơnơm kas ngan. Bơh sơnrờp den kung kơlôi sơnơng ngan sơl, ngòt lèng càn dồs kơnòl blơi tờm kơnuh sơnơm gơ aniai chơ̆t den kung gơlơh ờ khin ngan sơl mơya bàr nă ùr bơklau añ lơh nền càn. Bơh chờm bơh nam dơ̆ 4, dơ̆ 5 geh gar, kờp bal geh bơh 20 tus 30 gar dồ tờm. Añ lơh geh gar, sơntìl chi kòn.

Kơnờm bơh tam gơl bồ tơngoh kơlôi sơnơng, broă lơh, kòn cau Sơdàng đơs bal, ngan là ală hìu rƀah tàm kơnhoàl Tu Mơ Rông, càr Kon Tum tŭ do neh pin dờn tàm broă lèng càn priă rề ơnàng bă ù tam uă tờm chi lơh sơnơm đơs bal mờ kơnuh sơnơm Ngọc Linh đơs is nàng bơtàu tơnguh lơh sa hìu bơnhă. Mờ giă tăc tàm drà kờp bal pơgăp 100 tơlak đong dồ kĭ kơnuh sơnơm Ngọc Linh ris geh bal kơnuh, nha bè tŭ do, uă hìu làng bol kòn cau Sơdàng neh lik klàs bơh rƀah kơ̆ kơl jăp mờ brồ guh lơh pas. Ồng Trương Quang Tri, Kwang ătbồ Cơldŭ ai càn priă kơnhoàl Tu Mơ Rông, Ngân hàng Cíñ săc Xã hội càr Kon Tum, đơs nền cồng nha priă càn dong hìu rƀah tam tờm chi lơh sơnơm bè do: Tus tŭ do, kờp jơh dồs ai càn gơ wèt mờ tam chi lơh sơnơm đơs bal mờ tờm kơnuh sơnơm Ngọc Linh đơs is mờr 100 tơmàn đong bal mờ rlau 1 rbô nă cau càn. Bơh lòt sền, jăt sền den priă càn kung neh ngui geh cồng nha sơl. Tờm kơnuh sơnơm Ngọc Linh kung neh ngui niam ai tơl bơta ai làng bol in bơtàu tơnguh lơh sa brồ guh lik klàs bơh rƀah dồ bă kơ̆ kơl jăp.

Ờ mìng tam geh kơnuh sơnơm Ngọc Linh lơm, uă hìu làng bol kòn cau Sơdàng tàm kơnhoàl Tu Mơ Rông tŭ do kung neh gĭt lơh jăt jơnau đơs “ai phan lơyah ngai ròng phan jŏ ngai”, “lơh bơh dềt gơlik dờng”. Làng bol tàm tơngkah bal mờ gơ̆p ờ gŏ di tăc gơ jal kơnuh sơnơm mờ lời nàng gàr priă lơh geh pah nam bơh broă tơnhàu mờ tăc gar sơntìl. Mơkung tam tai kơnuh sơnơm, sơn tra, ngũ vị tử mờ bàr pe bơta chi lơh sơnơm ndai nàng geh priă jền, geh tai priă bơcri tam kơnuh sơnơm Ngọc Linh. Sa tềp bơhiàn yau dà lơgar nam Giáp Thìn 2024 do neh geh tai 562 hìu, mìng là kòn cau Sơdàng lơm tàm kơnhoàl Tu Mơ Rông klàs bơh rƀah, chờ hờp sơnam pa, sa tềp tàm bơta hờm ram, lơngăp lơngai. Ồng Võ Trung Mạnh, Củ tịc Ủy ƀan Ñân zân kơnhoàl Tu Mơ Rông pà gĭt, kơnòm bơh pơrlai geh bơta pràn tam uă tờm chi lơh sơnơm, cau Sơdàng tŭ do neh pin dờn mờ broă brồ guh klàs bơh rƀah mờ lơh pas dipal bơh ù tiah, brê bơnơm ƀòn lơgar tờm he dê. Ồng Võ Trung Mạnh, đơs: Làng bol ờ gŏ kơ̆p kơldìng, kơ̆p kơnờm wơl bơh ală priă jền bơh Dà lơgar dê nàng bơtàu tơnguh lơh sa hìu bơnhă. Pơnrơ là broă làng bol neh càn bơh ală bơnah priă càn krơi is, bơh ală priă lơh geh bơh hìu bơnhă dê nàng bơcri tam uă kơnuh sơnơm Ngọc Linh. Do là bơta tam gơl bồ tơngoh kơlôi sơnơng, broă lơh dờng ngan tàm làng bol jơi bơtiàn dồ êt nă cau dê.

Kơ̆ kơl jăp bơta pin dờn tàm gùng lòt neh săc rwah, tus jơh nam 2023 kơnhoàl Tu Mơ Rông, càr Kon Tum neh tam geh rlau 2 rbô 300 lồ kơnuh sơnơm Ngọc Linh bal mờ rlau 1 rbô 300 lồ tờm chi lơh sơnơm ndai. Bal mờ uă broă lơh bè càn is priă bơcri tam kơnuh sơnơm Ngọc Linh, tus bal tàm ală Mpồl lơh broă bal, lơh bal mờ mpồl lơh sa kă bro ...ngai sơlơ geh tai uă cau Sơdàng tam geh bơta chi lơh sơnơm kwơ ngan do. Do kung là broă lơh ngan ngồn bơh gơnoar ătbồ, làng bol kơnhoàl Tu Mơ Rông dê tàm broă pơgồp bơnah lơh sir jơh jơnau kờñ tus nam 2030, càr Kon Tum là tih tam tờm chi lơh sơnơm tờm kwơmàng dà lơgar dê là tiah tờm tam chi lơh sơnơm dờng bơh jơh gùt lơgar dê.